Read South Giziga PSA 72 Bible Online

PSA 72 - South Giziga bible

PSA 72

¹Dimis ngi wuzla dimis, Salomoŋ mutoho taŋ. Aw Buymisemuŋ, pula jiviɗ da buy madiɗa, ɓa a gi kiita misi purla ati ka. Vula wuluk mijeŋŋe da mangal ngi buy madiɗa.

²Anja a jigina mizli ɗikeye jeŋ jeŋ, yo anja a jigina misi murga ɗikeye ti jiviɗ naŋ.

³Muwãhay a soko ti jam ɗik da mizli, li miɗigaray a soko taŋ ti gi jeŋŋe ɗiki.

⁴Misi murga ngi wuzla mizli, anja buy a ga taŋ gwat ti jiviɗ naŋ, anja a cifi milaha mizli migeˀ irceceheye, yo anja a kurpaka mizli magaka taŋ bonoyo.

⁵Anja buy madiɗa a ndir ti siifa hã avu duniya masa kiɗ mi, a zik haɗa kaɓa pas ati kiya na ya!

⁶Anja buy a ndir kaɓa vuŋ magi ar guvahay, kaɓa yam mahuluɓa hirwuy!

⁷Ar zumabuy naŋ, anja mbur mijeŋŋe a sik, anja zlili a ɓul ngi caˀa, kaɓa kiya misi a muŋ na ya!

⁸Anja a wa li, zle a mi mubuliy, hã a mi mubuliy vay diga, yo zle a mi mizaw Efrat, hã sesẽŋ angi hirwuy mira kiɗo mi!

⁹Mizli ngi wuzlaɓuhoy a sa huruk hurukam ti mi liwis a mbuŋ naŋ, mesene naŋhay a sa bugumom mereɓe!

¹⁰Buy madiɗa ngi Tarsis waɗ ngir matura mikileŋ kileŋheye, a sa slinakaŋ ti gwat ngatarahay, buy madiɗa ngi ruwuy Saba ati Sebahay a sa wurkaka buutu da naŋ.

¹¹Buy madiɗahay gar a sa huruk hurukam a mbuŋ naŋ, sukwi ngi mizli ngi si ruwuyoy gar a sa gam gawla naŋ.

¹²Haˀaw, a sa laha mbur misi murga mazilaŋ. waɗ mizli migeˀ ircecehey misi mijini taŋ anta.

¹³A sa wuluk ar mbur misi murga waɗ ar hĩhĩyaŋ, a sa laha siifa ngi mizli misi murgahaya.

¹⁴A sa laha taŋ avu guzuvura vu waɗ avu moˀore, asi avu naŋ na, siifa taŋ naŋ puɗaw.

¹⁵Anja Buymisemuŋ a juw hutuŋ subur buy madiɗaŋ! A sa vulaka ɓiri tapasl tapasl misi a Saba da naŋ, a sa diram dibiɗ vurˀe teˀ le ta, a sa ɗuwulakaŋ mi vur hine vur hine.

¹⁶Anja daw a gi haɗa asi ruwuyo, anja a gam hirnga zingit zingit a muwãhaya, hurzlozlo kaɓa muwã libaŋ, tir walahaya, a pur sikiniy kaɓa giziŋ a ɓuh.

¹⁷Anja slimiɗ ngi buyo, a zil hã ngi sete, anja a ndih asi pasa zlar gar! Anja mizli a ɗuwulam mi ar wala taŋ ti slimiɗ naŋ, yo anja sukwi ngi mizli gar a ɓam, buy madiɗa naŋ ar mumul.

¹⁸Sise da Bumbulvuŋ, Buymisemuŋ ngi Israyel, magi cekenehey i naŋ pal naŋ!

¹⁹Gaka sise ngi caˀa da Bumbulvuŋ misi ti dudoko! Anja hirwuyo gar a nihi ti dudok naŋ! Amin, haˀaw, anja a gi kanah gisiŋ!

²⁰Davit, mangal ngi Zese, diradibiɗ naŋ a kiɗ mi aka.