Read South Giziga PSA 73 Bible Online

PSA 73 - South Giziga bible

PSA 73

¹Dimis ngi wuzla dimis ngi Asafay. Buymisemuŋ naŋ mezle avu Israyeleye gisiŋ, naŋ mezle avu mizli misi mevel mileɗeɗeheye gar.

²Amma a ndir mata ɓa sar a biy, a ndir mata ɓa i diɗi.

³Asi mizli magam gwat gar gu na, suloŋ a giy ti taŋ, yo i ra hĩyã gwat ngi gi ngi mizli miziriɗa mi ngi Buymisemuŋ tayna vuna.

⁴Ko gwat makica mizli tayna anta, hã pam kine, a zlumburam le kwikwiɗ kwikwiɗ, kwacay pirkimiˀ pirkimiˀ.

⁵Bonoy ngi mizli mekelemeye, a ca taŋ ta, yo bonoy maluma mizli na, anta duko taŋ duk le ta.

⁶A gam zlokok zlokok ti huhumo vu taŋ na, moˀore a tiɓa taŋ le keslsle kaɓa zana miwa le ti wi.

⁷Taŋ muzlumburam haɗa tuwa na, a puraka mizli hiris le, wuluk ngir mevel taŋ, naŋ ɓaˀ ar li babaraŋ.

⁸A singiram ar mizli, yo a ɓam mi motropo, a ɓam di i mi ngi taŋ mapuraka vu taŋ ka mizli madiɗahay tuwa.

⁹Mi mabo ti balam taŋ i ngi zi Buymisemuŋ, yo irne taŋ a pul gwat pal le a ruwuyo manja zi ta.

¹⁰Na ma na, mizli ngi Buymisemuŋ, a mbiɗam hiri ng'ar ɓi nah tuwa ya ma, a saka mingiɓi taŋ kaɓa yam.

¹¹Dar a ɓam na: «Buymisemuŋ a sa si na mbri mbrike? Mimadiɗa, a sin gwat le kwa?»

¹²Puraka miziriɗa mi tayna ayɗi: a roko pulam vu gwat taŋ, yo zlili taŋ ara sik nga mbuŋ!

¹³Ya mindir ɓa mevel ɗu a ndir leɗeɗe na, i ngatara lambaˀ gisiŋ, yo ya mubuna haŋ ɗu ɓa ngi biga i ci ar ɓi ta na, i ngatara lambaˀa.

¹⁴Vur hin gar na, ara kiɗikiy, yo vur miprik gar na, ara kutikiy ti bonoy.

¹⁵Da yi ɓi le zleˀe: «Mbak i ɓi ka taŋ vuna ya na,» naɓa i njika ziri ɗikey, cil ɗuwoy na le.

¹⁶Yi wuluk ɓa i sla wala nah, keɗ keɗ na, naŋ tuwaˀ avu ya.

¹⁷Hã i ci ng'ar hay ngi Buymisemuŋ, i sla wala ngi gwat masa gi avu taŋ tumbuŋ muduba.

¹⁸Gisiŋ, kisa pa taŋ ar li maslir kuleɗ kuleɗe, ɓa ki hizigiɗa taŋ ng'ar li zizi.

¹⁹A haŋhaŋ sina, a ngizlam le! A kiɗam mi le leɗeɗ, talalaˀ ti zluwun madiɗaŋ.

²⁰Bumbulvuŋ, kisa susuyumo wuluk taŋ tir walahay avra, kaɓa musuwun masusuyum a dirba mbur mupuɗuk le tir hinje.

²¹Ti ya muro ti mevel haɗa zleˀe, yo ti mevel mijiy, hã sesẽŋ a hur membezleŋ ngi vu ɗu na,

²²naɓa yi gilaw zleˀe, ko i sli wala ngi ɓi neˀ ta, ya sĩw lambaˀ kaɓa gwat misãmi, amma ya a ciki ɗik ɓula.

²³Asi y'ada ndrehhe avu ka, ki jiy le kaw avu haŋ hazum.

²⁴Ki sa ru ti yakaɓa ka muwuɗu, a dirba nah, kisa tiɓiy ti ɗuva hirnga.

²⁵I wa ɗu mekelem a muŋ zleˀe maka? A ruwuy aka, yi hiyĩ gwat mekelem mbak ka le ta. Asi ya tuwa, ya ati ka si.

²⁶Dum vu ɗu ati mevel ɗu a hĩhĩyam le ɓula, amma majihiy jah gidaŋ gidaŋ i ka Buymisemuŋ, yo zlili ɗu i ka, hã ngi sete.

²⁷Mbur maru kileŋ avu ka na, a ziza hutuŋ naŋ, yo mbur mapuluw mbak, magi sulome na, ki zizaŋ ma.

²⁸Amma cifi a ciki ɗik ka Buymisemuŋ na, a pusikiy vu, yi ɗum ɗu le a ciki ɗik, ka Bumbulvuŋ, Buymisemuŋ, ɓa i til mi ti ɓi ngi slra ɗik, ka miga gar.