Read South Giziga PSA 74 Bible Online

PSA 74 - South Giziga bible

PSA 74

¹Dimis ngi wuzla dimis ngi Asafay. Aw Buymisemuŋ ɗu, ki pula ndra fuk wãˀ kahana vur mike? Ndra ginew ɗikey, ka majigina ndra na, ki ndir ti himaˀ fõh fõh ng'ar ndra vur mike?

²Jum ngi mizli, ka mitiri ti taŋ ngi ɗikey diga zlezle, sukwi ka muwuɗ hirdam hirdam, ɓa a ndir i ngi ɗik, waɗ muwã Siyoŋ, ka miɗiya hay ɗik anga na, wuluk keŋ ar taŋ ɗagay.

³Jiɗ, ara pura Siyoŋ misi i diŋ ngi set na: Buymisemuŋ, gwat ngir hay ɗikeye, mesene ɗikey a hiryaka taŋ le gar.

⁴Mizli mazliram ti ka ta tayna, a wudam widi ngi luuma bugawla cǝruw cǝruw, daˀ ar li ngi zlir ɗik ati ndra vuna si, a ng'aka drapo taŋhayakaˀ kaˀ a diga.

⁵Taŋ kaɓa munguma widisey, pak pak ti zlimbe taŋhay a wuzla dum mingiriɗi.

⁶Gwat miciɗa ti ciɗey, migam taŋ wuya a hur hay ɗike gar na, mbak zlimbe ati tokom ngi ɓiri mazil mi, ngurof ngurof.

⁷A wuraka hay ngi ɗik ka Buymisemuŋ le, hay ngi zila slimiɗ ɗik ara a hiryaka le, a wahaka le wãˀ.

⁸A ɓam ar wala taŋ vur ndra: «I sa kiɗaka taŋ pay arleˀeŋ.» Li zlir ɗik ati ndra misi asi ruwuy gar na, a wuraka taŋ le war war.

⁹Gwat mabiga, ka Buymisemuŋ k'ada na, ndr'anta puraka mata. Mijiviɗ ɗikey anta mata. Yo a sa kiɗ mi hã ti vunaka na, ko mbur loŋ asi ndra misina anta.

¹⁰Na so na, Buymisemuŋ ɗu, mbur mazlir ti ka ta mazuw na, a sa kiɗa mi nah ti vunaka? Mesene ɗik maɓi ɓi malambaˀ ar ka mbak le ta na, a sa kiɗa mi naŋ hã ti vunaka?

¹¹Ki muɗa haŋ ɗik avra vur mike? yo ka haŋ gijaw si mbrike?

¹²Haˀaw Buymisemuŋ, ki Buy ndra madiɗa diga zlezle ngbaŋ, buy milih ndra asi ruwuyo ndrehhe i kaha.

¹³Ki ga ti gidaŋ ɗike, ɓa mubuliy a cinuw mi cunuˀ cunuˀu, ki kuyupo hirnga ngi ngoŋngoŋhoyo le asi yama.

¹⁴Gwat misãmi madiɗaka hurumo, ki kuyupo hirnga naŋ le, joˀ ki vula da gwat ngi ɓuhoy, ɓa a humbuɗakaŋ.

¹⁵Miga ɓa yam a bo vilvil, yo ɓa mizaway a ɓulom gar na, i ka, yo mizaw misi yam miviheye, mihisika taŋ ngbasl ngbasl gar na, i kaha.

¹⁶Papasa, i ngi ɗiki, yo duvuɗo, i ngi ɗike ma, i ka muɗuva pas ati kiya, mbur gar ar li naŋ, ar li naŋ.

¹⁷Maakway ngi ruwuy gar na, misla taŋ i kaha, yo viya ati hin pasa, miga taŋ i kaha.

¹⁸Bumbulvuŋ, pura ɓi ani, wulka keŋ ayɗi: mesene ɗik ara zuw, sukwi ngi mizli gilaway ara ɓam ɓi malambaˀ ar ka.

¹⁹Mizli ngi si mevel ɗikeye, anja ki vula taŋ da gwat ngi ɓuhoy, ɓa a humbuɗaka taŋ ta. Mizli misi murga ɗikeye, ki puyuk hirnga ti siifa taŋ ta.

²⁰Jumoˀay ɗik ati ndra na, ndir di keŋŋe a hirnga, li ngi ɗumoy misi asi ruwuy gar na, a tiri le, i li ngi misi moˀorehey, a nikam le, mbaf mbaf ng'ar taŋ.

²¹Mbur muguzuvura le na, anja ki pula ɓa a pi mesem mata. Amma anja mbur misi murga malla mbur migeˀ ircece le gar na, a hunumuw.

²²Haˀaw Buymisemuŋ ɗu, slikiɗ purtaˀ, cici ar ɓi ɗik ayɗi, mizli gilaw tayna mazukuw, ko mbak le ta na, wulka keŋ ɗagay ayɗi.

²³Widi ngi mesene ɗikey, yo mi muwuwwo mbak le ta ngi mizli mazliram ti ka ta na, ki puyuk di hirnga ta.