Read South Giziga PSA 75 Bible Online

PSA 75 - South Giziga bible

PSA 75

¹Dimis ngi wuzla dimis ngi Asafay. I mulumo di ar ɗerewol ngi buy dimis. ˀAy naŋ: «Ki pula ɓa a hiryi ta...»

²Haˀaw Buymisemuŋ ndra, i ra hunumukuw, i ra hunumukuw, asi k'ada gweˀ avu ndra, gwat ka miga taŋ ngi pur hiri ngal ngal na, i ra slufaka ɓi nah da mizli.

³Buymisemuŋ a ɓi: «Ar hin ya muɗuva le na, yi gi kiita mijeŋŋe.

⁴hirwuyo, zliv a jijik ngbir ngbir ti mizli ngi raˀahaya gar gu zleˀe, amma ɓi micica virzi naŋ gidaŋ gidaŋ na, i ya takwa?»

⁵I ɓa mizli majijahama: «Ki jijaham ta!» yo miziriɗa mingiɓi ɗuwoyo: «Ki puraka vu kumo dum hirnga ngi mizli le ta!

⁶Naŋ kanah, ki puraka vu kumo dum hirnga ngi mizli ta, pulaka ɓi mi kum ngi sliŋ na!»

⁷Sinaka sin le, gi madiɗa anta so tisi pas ngi miprik malla tisi pas ngi pastaˀ ta, ko anta so ti wuzlaɓuh mikirɗa kirɗak ta ma.

⁸Asi migi kiita i Buymisemuŋ, a ma mbur mekeleme nga ruwuy, a slikiɗa mbur numuŋ.

⁹Bumbulvuŋ a ro kaw ti sikiɗ a haŋ, peɗe peɗe ti mbaazla migbãhha minaha le trǝ̃h. Miziriɗa mi ngi ɗikey misi asi ruwuy gar na, a sa sakaŋ, hã fraw fraw ti virzi naŋ kpeleleˀ wãˀ.

¹⁰Ya na, yi sa hunuma Bumbulvuŋ ngi Zakopo ndrehhe ti dimisi, yo i sa til mi ti ɓi naŋ miɓa ani:

¹¹«Miziriɗa mi ɗuwoyo, i sa kiɗa mi ngi huhumo vu taŋ na wãˀ, amma mizli mijeŋŋeheye, mumul taŋ a sa sik nga mbuŋ.»