Read South Giziga PSA 76 Bible Online

PSA 76 - South Giziga bible

PSA 76

¹Dimis ngi wuzla dimis ngi Asafay. I mulumo di ar ɗerewol ngi buy dimis. Dimis ngi gujuvur.

²Buymisemuŋ a biga vu naŋ le angi hirwuy Zuda, slimiɗ naŋ ara zil haɗi asi ruwuy Israyele.

³Guɗuk naŋ, naŋ a Salem, yo li cifi naŋ, naŋ a Siyoŋ.

⁴Buymisemuŋ mingila gwat ngi vurumoy na, a Siyoŋ a diga: i luvut mǝngǝk ngǝk a mi lekey, mbarayay waɗ maslalamay.

⁵Haˀaw Buymisemuŋ ɗu, ki wucuɗ pilngiɗ pilngiɗ, yo dudok ɗike, kuy naŋ a zli ta wãˀ, ka fineˀ muwãhay misi zle ngi sete.

⁶Soje gambara tayna, a tiɓaka taŋ gwat taŋhaya le gar, a hinjam le ɗokɗok muwãˀ naŋ. Migi vurum tayna, ko gwat anta asi haŋ taŋhaya neˀ le mata.

⁷Buymisemuŋ ngi Zakop, ka mubuca taŋ ɓar na, mota ngi vurumoy ati pilis miɗiɗi taŋhaya gar a tikam is le.

⁸Kay, ki gi zluwun da mburu! Daka miji mevel le na, ma cici a mbuŋ ɗike gu i waka?

⁹Ka muslo kiita le zle a muŋ na, duniya gar a zluwun, a cifi teˀ teˀe.

¹⁰Ko da ka Buymisemuŋ, ki ra slikiɗ ngi gi kiita, ɓa ngi laha mizli muluɓ luɓ ngi si ruwuyo kwana, kanah ma.

¹¹Ko himaˀ mufõh fõh ngi mizli na kwana, i ngi vuluw dudoko, mizli milaham le avu himaˀ nah vuna kwana, a sa gukuw muguzlum.

¹²Bumbulvuŋ, Buymisemuŋ kumo, ɓakaŋ ɗaˀ le, kisa vulakaŋ gwata, yo jaka mi naŋ gisiŋ. Kum mizli mugun hirnga ngi Buymisemuŋ magi zluwun da mbur na, sakaŋ ti gwat ngi vul kumoyo.

¹³Buymisemuŋ a ma huhumo vu ngi yarmahaya nga ruwuy, yo a ga zluwun da buy madiɗa ngi si ruwuyoyo.