Read South Giziga PSA 78 Bible Online

PSA 78 - South Giziga bible

PSA 78

¹Dimis ngi wuzla dimis ngi Asafay. Haya mizli ɗuwoy, cinaka ɓi ya mujuwa na kuy kuy, jikaka slimiɗ ngi cine mingiɓi ya maɓa na.

²Y'ani wukum ɓi ani ti wi, yo ɓa i dubunukum ɓi mucuh le zleˀe.

³I ɓi ndra micinaka le, yo ndra misinaka le, miyi ndrahay a slufam ndra ɓi nah le.

⁴Ndr'anta ndiram ti ɓi nah teˀ avu ziri ndraˀahaya ta, amma, slimiɗey ngi vula dudok da Bumbulvuŋ, gidaŋ naŋ ati gwat ngi zuma hirngahay naŋ miga taŋ na, i sa slufaka hiri naŋ ava da dideˀ ndraˀahaya.

⁵Buymisemuŋ a ɗuva jiviɗ ngi sipi le da sukwi ngi Zakopo, a vul ɓimujuwa le a si ruwuy Israyele. A pula jiviɗ da dideˀ ndraˀahaya, ɓa a dubunaka ɓi tayna da ziri taŋhay,

⁶ɓa tizer taŋ misi nga mbuŋ, ziri, taŋ masa ya ka taŋ na, a dubunaka taŋ. Kanah na, naɓa ziri taŋhay kwana, a sa slufaka da ziri taŋhay aya.

⁷Anja ɓa dideˀ ngi ziri taŋhay a pulaka vu taŋ mbak wãˀ da Buymisemuŋ, yo gwat madiɗahay, Buymisemuŋ miga taŋ na, anja ɓa a puyukom taŋ hirnga ta, waɗ ma na, ɓimuɗuva naŋhay na, anja ɓa a jaka taŋ a hirnga.

⁸Kanah na, t'anta sa gam kaɓa dideˀ taŋhay na mata. Dideˀ taŋhaya zleˀe na, hirnga taŋ gidaŋ teˀe, yo i mislikiɗa ɓihey ma, mevel taŋ anta deŋ ar li purla ta, yo a ɗuvaka wuluk taŋ taˀ wãˀ ar Buymisemuŋ ta.

⁹Dideˀ ngi Efrayimeye, i mizli mikaˀ kaˀ vu kuy kuy, ti gulumoy a duba, tapas kiɗa vu migi na, a kilam le.

¹⁰A sipaka jumoˀay taŋ ati Buymisemuŋ na ta, a ngumam sipa ɓi naŋ muɗuva na ta ma.

¹¹Gwat madiɗahay, naŋ miga taŋ, waɗ gwat ngi zuma hirngahay, naŋ mibiga taŋ di gar na, a puyukom taŋ hirnga le.

¹²Buymisemuŋ a gi cekenehey le a mihiri ngi dideˀ taŋhaya, a ga taŋ ar li mazilaka Soˀaŋ, a hirwuy Ezipte.

¹³A wucaha mubuliye wucah, ɓa a cuh ti taŋ ti raŋ, a cica yama toŋ toŋ kaɓa mohol.

¹⁴Ti papasa, aru ti taŋ, musure ngi gazlavay ɗew ɗew ɓaˀ a mbuŋ taŋ, yo vur duvuɗ gar na, aru ti taŋ ti vu mapusluɗa li a mbuŋ taŋ.

¹⁵A wuzlaɓuh mikirɗak kirɗaka, a cira mandazlaya le kpah, ɓa a sam yam mabo vilvil tir vigiɗ mijileŋ.

¹⁶A ki zlazlaray ar mandazlay muwã, a ga ɓa yam a ɓul ar taŋ kaɓa a mizaway.

¹⁷Gar ti nah kwana, ara gam mungra avu Buymisemuŋ ti gidaŋ na si, ar li mikpazlaŋ kpazlaŋ, ara slikiɗam ɓi avu Mimadiɗa.

¹⁸A cam a kwacay Buymisemuŋ waˀwaˀa, a cufuɗakaŋ ɓa a zumam avu may taŋ.

¹⁹A jiginam mi avu Buymisemuŋ, a ɓam: «Buymisemuŋ a ndila le ngi vula ndra gwat ngi zum a wuzlaɓuh mikirɗak kirɗaka kwa?

²⁰Haˀaw ɓula, a kiɗa muwã le pasl ti gandaya, yam a bawa, hã a zuɓ mekepel nay nay, amma a vula ndra ɗaf ati useˀ da ndra mizli naŋhaya gar gu kwa?»

²¹Akẽh na, Bumbulvuŋ micina ɓi hana na, a ji mevel ar sukwi ngi Zakopo, a slikiɗ himaˀ ar sukwi Israyele.

²²Asi mike na, a pulaka vu taŋ mbak wãˀ da Buymisemuŋ zleˀe ta. Buymisemuŋ a sa laha taŋ na, a tiɓaka ɓi nah zleˀe ta.

²³Dambalaka Buymisemuŋ a pula jiviɗ le da gazlavay a muŋ, a wuna mifiliw ngi muŋhoyo le.

²⁴A po taŋ man ti muŋ ka vuŋ, ɓa ngi zumo, a vula taŋ alkamari ngi muŋ.

²⁵Mbur gar na, a zum di i ɗaf ngi modro ngi Bumbulvuŋhoy, Buymisemuŋ a vula taŋ gwat ngi zumo ka taŋ mawuɗam.

²⁶Dar Buymisemuŋ, a muŋ, a ɓula himiɗ misi tisi pas ngi miprike, a go himiɗ tir vay ruwuyo ti gidaŋ naŋ.

²⁷A po useˀ sirtititi nga hirnga taŋ kaɓa lagwada, waɗ ɗiyuwoy kiriɓ kiriɓ haɗi kaɓa muyuŋ a mizaw.

²⁸A po taŋ di nga wuzla walahay guɗuko, gun gun ciki guɗuk taŋhaya.

²⁹A zumam, hã a mbam fineˀ gidaŋ, a lumam gwat taŋ mawuɗama le.

³⁰Amma a kiɗaka mi ngi zum vuna t'aruŋ, yo a roko di mbuf mbuf a balam aruŋ si na,

³¹Buymisemuŋ a zuɓ himaˀ fõh fõh ng'ar taŋ, a kiɗa mizli migidaŋ gidaŋ ngi si taŋhaya, a zlumbura gawla Israyeley a ruwuy.

³²Gar ti nah kwana, ara gam mungra nga mbuŋ na si, gwat madiɗahay, Buymisemuŋ miga taŋ na, a tiɓaka ɓi nah ta.

³³Dar Buymisemuŋ a kiɗa mi ngi hin ngi siifa taŋ kutum ka himiɗ macuhu, yo a kiɗa mi ngi zik taŋ ar duniya ti ɓi ngi muɗa didak gurjik gurjikey lambaˀ.

³⁴Ti Buymisemuŋ mira kiɗa taŋ vagay vagay na, taŋ a mbuɗoko hiri ng'avaŋ, a tumbulokoŋ, a moko ng'avaŋ.

³⁵A wulkam keŋ, Buymisemuŋ i mandazlay muwã taŋ, yo Buymisemuŋ Mimadiɗa, i micika vu a hirnga taŋ.

³⁶Amma mi mabo ti balam taŋ gar na, i ngi gi gilaw da Buymisemuŋ, ˀirne taŋ i ngi gaŋ slir.

³⁷A cicaka mevel taŋ dar gidaŋ gidaŋ ar Buymisemuŋ ta, yo jumoˀay naŋ ati taŋ na, a pulaka vu taŋ mbak wãˀ vurˀe ta.

³⁸Amma Buymisemuŋ, naŋ i mupura ircece, ara pula malambaˀ taŋ, mbak ngizl taŋ kuɗupo jak. A muca mevele le sar mbeˀ mbeˀe, a bo ti ji mevele njoy wãˀ ta.

³⁹Buymisemuŋ a si na le, taŋ i dumvu ngataraŋ, a cohom ka himiɗ mucuh le, mamo mata.

⁴⁰A mbiɗam hirnga le avu Buymisemuŋ sar mbeˀ mbeˀ a wuzlaɓuh mikirɗak kirɗaka, yo a jiginam mi le ava ar li muˀulo nah.

⁴¹A cam a kwacay Buymisemuŋ tuwa ma ni, a gaka gwat ngi ji mevel da Buymisemuŋ mipal kine ngi Israyele.

⁴²Gwatay naŋ miga taŋ vur taŋ na, a puyukom taŋ hirnga le, yo naŋ muloho taŋ tisi haŋ ngi mbur mazlir ti taŋ ta,

⁴³gwat ngi bigi gwatay, naŋ miga taŋ a Ezipte, waɗ gwat migam ɗaˀ tahay, naŋ miga taŋ ar li mazilaka Soˀaŋ na, a puyukom taŋ hirnga le.

⁴⁴Yam ngi mizawaya, a tiri taŋ pumbusu, ɓa Eziptehey a saka gu mata.

⁴⁵A slino taŋ bibirey ɓa a saka taŋ pumbuso, waɗ gecey wenewene, tiɓeˀ tiɓeˀ li gar avu taŋ.

⁴⁶A vula gwat ngi sifi taŋhaya da jaray a zumaŋ, migir ngi slra taŋ, a vula da yuk ɓa a zumaŋ.

⁴⁷A hirya guva ngi gudubun taŋhaya ti vuŋ misi yam, yo yi ngi bazlawar taŋhaya, a hirya ti vuŋ misi burkataŋ.

⁴⁸A pula ginew taŋhaya mbak da vuŋ misi yam ɓa a kiɗa taŋ, yo gezleŋ ngi ginew taŋhaya mbak da vuŋ a ndisl, ɓa a kiɗa taŋ.

⁴⁹Angi kiɗa mi naŋ na, Buymisemuŋ a vunoho mevel naŋ matiɓi ka vu ng'ar Ezipteheye: himaˀ naŋ mufõh fõh, waɗ modro naŋ mingizla vuhoyo ndac, a slino taŋ nga ga taŋ bonoy.

⁵⁰A ga mevele wãˀ, a jigina taŋ avu muco mata, amma a pula taŋ mbak da mozorbono a ngizla taŋ.

⁵¹A kiɗa ziri modogom ngi Ezipteheye cek vagay vagay, i ziri micikiɗeffe ngi kwacay tizer ngi Kamay.

⁵²Joˀ a ɓa mizli naŋhaya ɓa a cohom le kaɓa ginewey, aru ti taŋ sek a mbuŋ naŋ kaɓa tumuŋhoy, nga wuzlaɓuh mikirɗak kirɗaka.

⁵³Aru ti taŋ ti setette, manja zluwun, yam a nda mesene taŋhaya yik yik.

⁵⁴Aru ti Israyeleye nga hirwuy naŋ mipal, a muwã naŋ mitiɓa ti gidaŋ naŋ.

⁵⁵A ɓula sukwi ngi mizli mekelemey avra baɗ a mbuŋ taŋ, a wuɗuka taŋ hirwuyo wuɗak wuɗak, waɗ a cifa Israyeley ar hay ngi Kanaˀanay vuna.

⁵⁶Amma Israyeley a slikiɗam ɓi, a cam a kwacay Buymisemuŋ Mimadiɗa, ɓimuɗuva naŋhay na, a jaka taŋ a hirnga ta.

⁵⁷A zuɓam jiviɗ malambaˀ, yo a vulam mizli ngi jihey kaɓa dideˀ taŋhay. A ngizlam le avu jiviɗe kaɓa luvut mumulaka le ti lek muguduɗoŋ.

⁵⁸A gakaŋ gwat ngi ji mevel ti gi mikuli da kulihey ar li miɗingir ɗingireye, a slikiɗakaŋ suloŋ ti kuli taŋhaya.

⁵⁹Buymisemuŋ mupura keɗ keɗ na, a ji mevel, a pula sukwi Israyele mbak wãˀ avra.

⁶⁰A pula hay naŋ misi a Silo, guɗuk naŋ miɗiya a wuzla mizli.

⁶¹Yo akoti naŋ mabiga gidaŋ ati dudok naŋ na, a pula ɓa mesene naŋhay, a zuɓaka, a cohom di.

⁶²Buymisemuŋ a ji mevel le angi mizli naŋhaya, a pula taŋ ɓa mesene taŋhay a ngizlaka taŋ ti maslalam.

⁶³Vu a zlizlira gawlahaya le, mbak mbur mazli dimis ngi hunuma diilihey anta mata.

⁶⁴A kiɗaka masayaya le ar vurum, mbak ngwas wudiga taŋhaya, a tuwaka taŋ kaɗam kaɗam mata.

⁶⁵Dar Bumbulvuŋ a puɗuk bizliwir kaɓa mbur mihinje le zleˀe, kaɓa mbur gambara mbaazla muvulaŋ gidaŋ le.

⁶⁶A kiɗa mesene naŋhay makilama ti dirba, yo a tika taŋˀ ay le, hã ngi sete.

⁶⁷A pula dideˀ ngi Zozefeye baˀ murvay, a ngum zuɓa sukwi ngi Efrayime ta.

⁶⁸Amma a muɗ di ceɗ i sukwi ngi Zuda, muwã Siyoŋ, naŋ mawuɗo.

⁶⁹A ndira hay naŋ a diga, gidaŋ gidaŋ ka li muŋ, yo a ɗuva ɓa a ndir ngi sete kaɓa hirwuy.

⁷⁰Buymisemuŋ a muɗa gawla naŋ Davite le ceɗe, ara zuɓo di ar li jigina tumuŋhoy.

⁷¹A zuɓo di ti naŋ miɓaˀ asi tumuŋ naŋhay, ɓa a tiri di mijigina sukwi ngi Zakop, mizli naŋhay, yo Israyel zlili naŋ.

⁷²Davite, a jigina taŋ le ti mevel purla, a jigina taŋ le ti sin ngi Buymisemuŋ muvulaŋ di.