Read South Giziga PSA 79 Bible Online

PSA 79 - South Giziga bible

PSA 79

¹Dimis ngi wuzla dimis ngi Asafay. Wo Buymisemuŋ ɗu, sukwi mekelemey a tiɓaka hirwuy ngi ɗike le, a cam le ti dili ng'ar hay ɗik mipal a, a tiram ti Zeruzaleme le i diŋ.

²Vagay ngi gawla ɗikeye, a vulaka taŋ le da mogodokoy ɓa a ndaka taŋ. Vagay ngi mizli miteŋteŋ ɗikeye, a vulaka taŋ le da gwat ngi ɓuhoy.

³Yo a paka pumbus taŋ le, ara ɓul gap gap ka yam, gun hirnga ngi Zeruzaleme, ko mbur midik taŋ anta.

⁴Pura midigwi ndrahay ara zam ndra, mizli mugun hirnga ndrahay ara singiram ar ndra, yo ara buruɗam ndra.

⁵Bumbulvuŋ, kisa kiɗa mi ngi ji mevel ɗik ar ndra, hã ti vunaka? Ji mevel ɗik ar ndra matiɓi njilim njilim ka vu na, anta sa kiɗ mi ta wãˀ kwa?

⁶Anja ki zuɓ himaˀ na, ng'ar sukwi ngi mizli misinukuw ta na jaka, ng'ar sukwi ngi mizli mahuruk hurukam a mbuŋ ɗik ta na.

⁷Asi a tiɓaka gwat ngi sukwi ngi Zakopoyo le ti gidaŋ, yo a musukuɗoko hirwuy naŋ le tur.

⁸Ki mbiɗa ndra hirnga asi mungra ngi dideˀ ndraˀahaya ta, amma sawa kutum, pura ndra ˀircece, asi i hĩhĩyam le wãˀ.

⁹Aw Buymisemuŋ milih ndra, jina ndra, ɓa ngi biga dudok ɗiki. Laha ndra, pula mungra ndrahay avra, ɓa ngi biga slimiɗ ɗik mazil haɗa na.

¹⁰Ka mapula sukwi mekelemey mbak a ɓam: «Buymisemuŋ taŋ naŋ amaka» na, vur mike? Ka mapula cuwal ngi gawla ɗikey mikiɗahay na, biga daˀ a mihiri ndra aka, ɓa sukwi tayna vuna a purakaŋ!

¹¹Cina niˀic ngi mizli dangayay na ti mevel mezleŋ, mizli migaka taŋ kiita ngi muc tayna na, jina taŋ ti gidaŋ ɗiki, ɓa a ndiram ti siifa.

¹²Bumbulvuŋ ɗu, Hirwuy ngi ciki ndrahay muzukuw na, mataŋ di makaw tarnaˀa.

¹³Amma ndra mizli ɗikey, ndra ginew ngir gezleŋ ɗikey na so na, i sa gukuw muguzlum ndrehhe, yo i sa tilam mi ti hunum ɗike, hã ngi set, ngi samadin.