Read South Giziga PSA 80 Bible Online

PSA 80 - South Giziga bible

PSA 80

¹Dimis ngi wuzla dimis ngi Asafay. I dimis ngi wulka ɓi. I mulumo di ar ɗerewol ngi buy ngi dimisi. Dimis ngi gujuvur.

²Aw mijigina Israyel, cin ɗagay takwa. Ka maru ti mizli ngi Zozefey, kaɓa i ginew taˀ gezleŋ, yo ka muar kerubeŋhey na, bugo vu takwa.

³Buga gidaŋ ɗike, a mihiri ngi sukwi ngi Efrayim, ngi Benjameŋ waɗ ngi Manase, yo so laha ndra takwa.

⁴Buymisemuŋ, mo ti ndra a muŋ, tiɓa ndra kuy kuy, ɓa i sa lahama.

⁵Bumbulvuŋ, Buymisemuŋ, misi gidaŋ wãˀ, mizli ɗikey ara diram dibiɗ ngbaŋ, na kisa pula ji mevel ar taŋ na, hã ti vunaka?

⁶Ki vula taŋ ngi zumo i ɗaf mufukuɗa ti tuwuy, yo ki wa taŋ tuwuyo cer cer makir ɓa a sakaŋ.

⁷Ki gi ti ndra ɓa midigwi ndrahay a tiram asi ndra, yo mesene ndrahay a lumam mizli le ngi singir angi taŋ.

⁸Buymisemuŋ misi gidaŋ wãˀ, mo ti ndra a muŋ, tiɓa ndra kuy kuy, ɓa i sa lahama.

⁹Ki muɗo gudubun baɗ a Ezipte, joˀ kisa hirva ar hirwuy ngi sukwi mekelemey, ka muɓula taŋ avra na.

¹⁰Ki ɗiya hirwuyo, ɗiyeˀ ɗiyeˀ a mbuŋ naŋ, ɓa a pi dimbasl nga ruwuyo ɓa a naha hirwuyo gar.

¹¹Susuɗuk naŋ a sirta muwãhaya le sirik sirit, mihaŋ naŋhaya, hã a kam ɓaˀ ɓaˀ ng'ar miter madiɗahay.

¹²A ka mihaŋ naŋhaya zingit zingit, sesẽŋ ng'ar mubiliy, yo si virzi naŋ a pi wirwir, hã a ndila mizaw madiɗaŋ.

¹³Ki ngila zluɓ naŋ avra vur mike? Mbak ani mizli macohomo, ara huloko yi naŋ.

¹⁴Fedem ngi ɓuh ara hiryaŋ, gwat misãmi ngi ɓuhoy ara zumakaŋ.

¹⁵Buymisemuŋ misi gidaŋ wãˀ, mawa a muŋ so, puro hiri keɗ keɗ paɗ ti muŋ. kilo widi ngi guva ngi gudubun hana,

¹⁶Jigina gudubun, ka minga ti haŋ ɗike, i mangal misenna, ka migilaŋ.

¹⁷Inga pura ayɗi, a wuraka le, yo a ngumaka le, muwur naŋhaya, buca taŋ, anja ɓa a zizam a mbuŋ ɗike!

¹⁸Buca haŋ ɗike bac ar mbur mujoˀ tir hazum ɗiki, ar mbur ka mi gila na.

¹⁹Naɓa ndr'anta i sa baˀam avu ka mata. Ki sa pula ndra ti siifa, i sa zilukuw slimiɗe.

²⁰Bumbulvuŋ, Buymisemuŋ, misi gidaŋ wãˀ, mo ti ndra a muŋ, tiɓa ndra kuy kuy, ɓa i sa lahama.