Read South Giziga PSA 85 Bible Online

PSA 85 - South Giziga bible

PSA 85

¹Dimis ngi wuzla dimis ngi sukwi Kore. I mulumo di ar ɗerewol ngi buy dimis.

²Bumbulvuŋ, ki biga le, k'ada ki wuɗ hirwuy ɗike. Dideˀ ngi Zakopoy i mijahay le zleˀe, amma ki mo ti taŋ le a muŋ.

³Ki zuɓa malambaˀ ngi mizli ɗikeye le avra, mungra taŋ na, ki pula ɓi nah le wãˀa.

⁴Ki kiɗa mi ngi zuɓa himaˀ ɗik na le, ki muca mevel ɗik misi ka vu na le.

⁵Buymisemuŋ milih ndra, mo ti ndra a muŋ, pula ɓi ngi ji ndra a kwacay na teˀe.

⁶Ki sa ndir ti mevele fõh fõh ar ndra ndrehhe si kwa? Ji mevel ɗike, a kiɗ mi ta wãˀ si, hã avu dideˀ ndrahay nga mbuŋ nga mbuŋ kwa mbrike?

⁷Masa mawa nga vula ndra siifa, da ndra mizli ɗikeye, ɓa i mumulom mbele ka na, i ka vuna ta kwa?

⁸Bumbulvuŋ, biga ndra gi teŋteŋ ɗik na, yo laha ndra.

⁹Ɓi ngi Bumbulvuŋ, Buymisemuŋ maɓa na, i ra cina. A ɓi ɓi ngi vula zuy da mizli naŋhay ati mizli miteŋteŋ naŋhaya, amma anja a mam ng'ar gi gwat taŋ ngi gilaway na mata so!

¹⁰Buymisemuŋ a wuɗ ɓa laha mizli mazluwunam di na wurenna, joˀ dudok naŋ a sa ndir a hirwuy ndra.

¹¹Gi teŋteŋ ati ɓi mikaslsla a zliram le, zuy zuy ati ɓi mijeŋŋe, a jam vu le kuɓuy.

¹²Ɓi mikaslsla a puso ti ruwuy, yo ɓi mijeŋŋe a po sar paɗ ti muŋ.

¹³Mavula cifi ar wuya i Bumbulvuŋ ti hirnga naŋ, yo hirwuyo kwana, a ga ndra gwat ngi sifihey.

¹⁴Ɓi mijeŋŋe ara ru ɓaˀ a mbuŋ Buymisemuŋ, joˀ sar naŋ akaŋ jiviɗe birre.