Read South Giziga PSA 89 Bible Online

PSA 89 - South Giziga bible

PSA 89

²Bumbulvuŋ, gi mezle ɗik mihaɗa na, i wuɗ i zli di dimis ndrehhe, gi teŋteŋ ɗike, i wuɗ i til di mi da dideˀ ndrahay gar masa ya ka taŋ nga mbuŋ nga mbuŋ na.

³Naŋ kanah gisiŋ, i ɓa njah: «Gi mezle ɗik a ɗuv virzi le ngi caˀa, gi teŋteŋ ɗike, ki cica ɓi nah le gidaŋ gidaŋ a muŋ.»

⁴Ki ɓi na: «I jumˀay le ati Davite, gawla ɗu, ya muwunaŋ, i ɓaŋ le ɗaˀ le:

⁵I sa ci buy ar li ɗike ndrehhe i mbur ngir tizer ɗiki, i sa ga ɓa zumabuy ɗik a ndir nga naŋ nga naŋ, hã ngi samadin.»

⁶Bumbulvuŋ, anja modro ɗik ngi muŋhoy a hunumukuw asi gwat ngi zuma hirng'aka maga na, yo anja a hunumukuw ar kus ngi mizli ɗikey a muŋ asi gi teŋteŋ ɗik na.

⁷Mbur ngi wi ati Bumbulvuŋ a muŋ i waka? A wuzla gwatay, mizli mahuruk hurukam a mbuŋ taŋ gar na, mirak rak ati naŋ da kwa?

⁸Buymisemuŋ, ar li ngilawuy ngi mizli ɗikeye, ki ga taŋ zluwun haɗi teˀe, Buymisemuŋ ki gi zluwun da mbur haɗa fineˀ mugun hirnga ɗikeye gar.

⁹Bumbulvuŋ, ka Buymisemuŋ miwa si gazlavay kurzluˀ gar, Bumbulvuŋ misi kaɓa ka i waka? Ka gidaŋ, yo ka teŋteŋ ar gwat ngi gi ɗikeye ndrehhe.

¹⁰Mubuliy maslikiɗ jirif jirif na, matikaŋ ˀay gu i kaha, yo da yam ngi raˀa ara ngi diɓel na, mambuzla nga ruwuy i kaha.

¹¹Rahap ngoŋngoŋ na, minjirslaŋ i ka! Yo mizliɗa hirnga ngi mesene ɗikey mber mber na, i ka ti gidaŋ ɗiki!

¹²Muŋ i ngi ɗiki, yo hirwuy i ngi ɗike ma, duniya kurzluˀ ati gwat ngi raˀahay gar na, miga taŋ i ka.

¹³Li vay muŋ ati vay ruwuyo i ka miga taŋ, muwã Tabor ati Hermoŋ, ara zluzluɓam ti zila slimiɗ ɗike.

¹⁴Hirbazla ada avu ka, hirbazla migidaŋ, haŋ vay hazum ɗik a ro paɗ a muŋ!

¹⁵Zuma buy ɗike, a cici le ti jiviɗ naŋ jeŋŋe, kaslsla, yo mapur a mbuŋ ɗike, i gi teŋteŋ ati gi kaslsla ɗiki.

¹⁶Bumbulvuŋ, mizli misinaka jukuw salalaya le na, ara mumulom! t'ada a mihiri ɗike, asi ki ra pura taŋ ti hiri mezleŋ.

¹⁷Vur hin gar na, a sa jiɗam mececẽleŋ vur kaha, a sa cicam hirnga deŋ a muŋ na vur jeŋŋe ɗiki.

¹⁸Naŋ kanah, mavula taŋ gidaŋ muwãˀ naŋ na i kaha, ndra maslikiɗam hirnga paɗ a muŋ na, mbele ka vuna.

¹⁹Micika vu ndra, naŋ vur ka Bumbulvuŋ, buy madiɗa ndra, naŋ vur ka Bumbulvuŋ mipal ngi Israyel.

²⁰Ti di numuŋ ada, angi ka mibiga vu da mizli miteŋteŋ ɗikey na, ki ɓa t'ani: i jini mbur gambara le, i ga ɗongor le da mangal gawla a wuzla mizli ɗuwoyo.

²¹I lum gawla ɗu le, i Daviti, i paŋ mal ɗu mipal ngi vulaŋ slra,

²²i sa jaŋ kaw gidaŋ gidaŋ, yo i sa vulaŋ gidaŋ ti hirbazla ɗu.

²³Mesene naŋ anta sa lumaŋ ti gurjike ta, mbur mislikiɗa ɓi anta sa tikaŋ ˀay gu ta,

²⁴asi mizli mazliram ti naŋ tahaya, i sa njirsla taŋ a mbuŋ naŋ, mizli magam mesene ti naŋ na, i sa kiɗa taŋ.

²⁵Gi mezle ɗu ati gi teŋteŋ ɗu na, a sa ndir ati naŋ, a sa lum bugawla mbele ya.

²⁶I sa vulaŋ gidaŋ ngi zuma buyo hã sesẽŋ a mubuliy Meditarane, waɗ sesẽŋ a mizaw Efrat.

²⁷Naŋ a sa ziliy: «Baha! Buymisemuŋ ɗu! Gidigil muwã milih ɗu!»

²⁸Ya kwana, i sa tiri di mangal ɗu modogom, buy madidiɗa mifineˀ buy ngi si ruwuyoy gar.

²⁹I sa ndir teŋteŋ ava hã ngi sete, jumoˀay ɗu ati naŋ a sa gi gisiŋ gisiŋ.

³⁰Tizer naŋ a sa zum buy hã ngi sete, yo zumabuy naŋ a sa zik kaɓa muŋ.

³¹«Ɓimujuwa ɗu, da ziri naŋhay ara pulakaŋ, yo ɓi ya ɓi micica le na, da t'anta sipaka ta,

³²ɓi ɗuwoy ngi bigi jiviɗe, da ara ngilakaŋ, yo ɓimuɗuva ɗuwoyo, da t'anta jaka taŋ a hirnga ta na,

³³i sa zuɓ ganday ngi kuta taŋ asi cine mi taŋ ta na, yo i sa kiɗa taŋ asi malambaˀ taŋ na.

³⁴Amma gi teŋteŋ ɗu avu taŋ na, y'anta ngila ɓi nah ta ɓula, yo jumoˀay ɗu ati taŋ kwana, y'anta sa gi slir ara ta.

³⁵Y'anta sa ngila ɓi ngi jumoˀay ɗu ta, ɓi ya mubo di le ti balam ɗu na, y'anta sa mbiɗa ta.

³⁶I hudum le sar purla ngi wãˀ ti slimiɗ ɗu mipal na, i ɓi na: Ĩˀĩ, y'anta sa tikina Davite ta ndiɗaˀ wãˀ.

³⁷Tizer naŋ a sa ndir i buy ngi caˀa, zumabuy naŋ a sa ndir a mbuŋ ɗu, naŋ da naŋ da kaɓa pasa.

³⁸A sa ndir naŋ da ndrehhe, gidaŋ gidaŋ kaɓa kiya, ɓa ngi gi sedewo mijeŋŋe vurˀe ar birngiŋ.»

³⁹Mbur ka micaŋ i buyo, i ka vuna mupulaŋ fuk, yo mihirsaŋ a muŋ, ki ji mevel le araŋ.

⁴⁰Jumoˀay ɗik ati gawla ɗike, ki ngila ɓi nah le, ki hizigaŋ loppol ngi hirnga naŋ le a ruwuy, ki jupaŋ di le jap japa.

⁴¹Ki wahaŋ mohol mugun hirnga walahay naŋ le gar, li naŋ muguno ti moholhaya, ki waha taŋ le.

⁴²Mizli macohomoy gar na, ara vakaŋ gwataya, midigwi naŋhay ara zakaŋ.

⁴³Mesene naŋhaya, ki tiri ti taŋ bugawlahay le, ki vula mumul le da mizli mazliram ti naŋ tahaya.

⁴⁴Ki mbiɗa gwat ngi vurum naŋ, ɓa a kiɗ tehhe i naŋ a muŋ, ki jinaŋ ar vurumo ta.

⁴⁵Dudok naŋ misi ti naŋ na, ki zizaŋ di le avra, ki putukusoŋ janga naŋ ngi buyo le a ruwuy.

⁴⁶Ki maŋ hin ngi gi gawla naŋ le duguleˀe, ki paŋ mesem le haɗi.

⁴⁷Bumbulvuŋ, kisa kiɗa mi ngi ɗum ɗike, hã ti vunaka? Ki sa kiɗa mi ngi ji mevel ɗik fõh fõh na, hã ti vunaka?

⁴⁸Wuluka hin ngi siifa ɗu keŋ ɗagay, naŋ duguleˀe. Ki ga mbur titira ɓa kisa kiɗa mi naŋ ti lambaˀ sukwa!

⁴⁹Mbur mandir ti siifa, manja a muc na, ada kwa? Malih avu muco gu i waka?

⁵⁰Bumbulvuŋ, gi mezle ɗik misi zleˀe tuwa, naŋ anta mata kwa? Gwat ka miɓa taŋ ɗaˀ ɗaˀ le da Davit, kisa gaŋ taŋ gisiŋ tuwa, t'anta mata kwa?

⁵¹Bumbulvuŋ, wuluk ar gawla ɗikey, mizli mazaka taŋ na, waɗ ar mizli gar, ka mupula taŋ asi haŋ ɗu na.

⁵²Bumbulvuŋ, buy ka muwuna na, mesene ɗikey a zakaŋ le, naŋ mira ru gar na, ara cirɗam tazlay araŋ.

⁵³Sise da Bumbulvuŋ, hã ngi sete! Amin! Amin!