Read South Giziga PSA 91 Bible Online

PSA 91 - South Giziga bible

PSA 91

¹Mbur maɗum ti Buymisemuŋ Mimadiɗa na, kite ara hin a susuɗuk ngi Buymisemuŋ misi gidaŋ wãˀa.

²Ya mbur ma na, i ɓa Bumbulvuŋ: «Ki li ɗum ɗu, ki li ɗu muguno ti mohol, ki Buymisemuŋ ɗu, i ra njih hiri asi ka.»

³I Buymisemuŋ malihuw avu ngamngam mangukuw di, yo avu jiji mozorbono.

⁴A sa ɗumuw ɗum asi kirpasl naŋ, kisa ɗum asi kirpasl naŋ, kaɓa zuŋ kucukur asi kirpasl ngi mumuŋ, gi teŋteŋ naŋ na, i mbaray, yo i libiti.

⁵K'anta sa zluwun ti gwat ko neˀ ta: ko gwat ngi muɗa didak misi ti duvuɗu, malla ko ti luvut malahaka ti papas,

⁶ko ti jiji mozorbono maliˀi ti duvuɗu, ko ti jiji doflo ma liˀi ti wuzla papasa.

⁷Ko da mizli durmuk a micam le a ciki ɗik, malla ko mizli durmuk kuruˀ tekeɗe kwana, ko gwat masa guw ka neˀ le anta.

⁸Ka ɗuva hiri taˀ si na, makutaka mizli malambaˀhay ti bonoy na, kisa puraŋ.

⁹Haˀaw Bumbulvuŋ, ki li ɗum ɗu! Da ki tiri ti Mimadiɗa le i hay ɗik na,

¹⁰ko ɓi malambaˀ masa ndiluw anta, ko hiryi masa gumbaˀa hay ɗik anta.

¹¹Asi Buymisemuŋ a sa vula jiviɗ da modro naŋhaya, ɓa a jiginukuw ar li ka maru gar.

¹²A sa zuɓukuw paˀ paˀ a haŋ taŋ, ɓa ki dunuko sar avu ɗugur ta.

¹³Ki sa ru kirap kirap ar moboro malla ar kwecesle, kisa kirpa dirlenge ati kawa.

¹⁴A ɓi: «I sa lahaŋ, asi naŋ mugumbuˀ avu ya na, yi sa cik vu a hirnga naŋ, asi a si na slimiɗ ɗu le.

¹⁵Da ara ziliy na, i kil widi naŋ, angi bonoyo i sa ndir ava, i sa cukoŋ, i sa ɗuvaŋ hirngaŋ.

¹⁶I sa jaŋ hutuŋ subur, yo i sa bigaŋ di ɓa a sina, yi milih naŋ.»