Read South Giziga PRO 14 Bible Online

PRO 14 - South Giziga bible

PRO 14

¹Ngwas misi sinmijileŋ, a ja haya kuy kuy, amma ngwas gilawa, a hirya haya ti haŋ naŋ a muŋ.

²Mbur magi gwat mikaslsla na, a zluwun ti Bumbulvuŋ, amma mbur magi gwat muslurkoɗ na, a pura Bumbulvuŋ hiris le.

³Mbur gilawa, a ɓi mi ngi huhumo vu, amma mingiɓi ngi mbur misi sinmijileŋ, a jiginaŋ.

⁴Da sla ngi huvoy anta na, naɓa dirgwaɗa njoŋ, amma gidaŋ ngi slahaya, a so ti gwat ngi migam haɗa.

⁵Migi sedewo mikaslsla, a tikin vu ta, sedewo misi slire, a ɓi ɓi ngi slir.

⁶Mbur maɓi mi ngi sliŋ, a sipi sinmijileŋ, a lum ta, amma mbur misi lesle, sin i gwat mutuwaˀ ava ta.

⁷Kirih kileŋ avu mbur gilawa, k'anta lum mingiɓi ngi sin neˀ le ava ta.

⁸Sinmijileŋ ngi mbur maji lesle, i sli wala ngi gwat ngi gi naŋ, amma gilaw ngi mbur mijinjigwiɗe, i tikina vu.

⁹Gilaway a singiram ar gi malambaˀa, amma gi mezle, naŋ a wuzla mizli mikaslslahay.

¹⁰Ɓi mutuwaˀ misi a mevel mburo, i naŋ misina pal naŋ tewle, da mevele, naŋ ar mumul na, mbur ngi vra mamumul ati naŋ anta.

¹¹Hay ngi mbur misi moˀore, a sa tiri diŋ, amma guɗuk ngi mizli mikaslslahaya, a sa sik.

¹²Mbur mekeleme, a pura gwat ngi gi naŋ, naŋ kuy, dambalaka ar kiɗa mi naŋ na, a zuɓ di jiviɗ nga mucu.

¹³Ko ar ndurɓo hiri kwana, mbur a singir, yo mumul a kiɗ mi ti niˀic.

¹⁴Mbur musloh sloh na, gwat ngi gi naŋ a mbaŋ kutum, mbur mezle a funaŋ na ti nah so.

¹⁵Mbur misin ɓi ta na, a tiɓa ɓi maɓaka gar, amma mbur maji lesle, a ga gwat naŋ gar ti wuluku.

¹⁶Mbur misi sinmijileŋ a zluwun ti gi malambaˀa, a mbiɗaŋ duba, amma gilawa, a ga kutumo si, asi a ɗuva wuluko le taˀ, naŋ kuy.

¹⁷Mbur mazik ti ji mevel ta na, a gi gwat ngi gilaway, mbur misi were, a so ti gi mesene nga hirnga naŋ.

¹⁸Mbur misin ɓi ta na, mi nga naŋ, i gwat ngi gilaway, sin ngi gi gwata, i loppol ngi mizli misam ɓi le.

¹⁹Mizli malambaˀhaya, a hurukom a mbuŋ mizli mezlehey, yo misi moˀoreheye, a kutukom a mizlingre mizli mijeŋŋehey.

²⁰Mbur misi viya, ko cil naŋ kwana a hirsaŋ, amma mbur misi zlili, ngama naŋhaya mbeˀ mbeˀe.

²¹Mbur mahirsa cil naŋ na, a gi di i mungra, amma mbur mapura ircece da mizli muroko luɓ luɓoy na, a mumul.

²²Mizli mawuɗam ɓi malambaˀ na, ara zizam takwa? Amma mizli mawuɗam gi mezle na, a sa ndiram ti ji ngama, yo a sa ndiram ti ɓi mikaslsla.

²³Slra gar na, a pul gir, amma gi mi kwaliy kwaliy na, a vus vu.

²⁴Misi sinmijileŋŋeheye, zlili i loppol ngi hirnga taŋ, amma mijijigwiɗeye, gwat taŋ i gilaw na si.

²⁵Migi sedewo mikaslsla a lih hutuŋ, amma mbur magi slir na, a zizi vu.

²⁶Mbur mazluwun ti Bumbulvuŋ na, naŋ anta zluwun ko neˀ ta, asi ziri naŋhay a ɗumom a cikeˀe.

²⁷Zluwun ti Bumbulvuŋ i miviɗiviɗi ngi siifa! A kiraha mburo kileŋ avu mazaɓ ngi muco.

²⁸Da mizli a gam le haɗa na, a ga dudok da buyo, amma da mizli anta na, naɓa busukum ngivi dagwal naŋ a diɗ le.

²⁹Mbur maji mevel kutum ta na, naŋ ti lesl haɗa, amma mbur maji mevel kutumo, a njik di i gilaw naŋ.

³⁰Mevel leleŋ na, i siifa vur dumvu, amma suloŋ i waˀa mivi mazãˀã tesle.

³¹Mbur maguzuvura mbur hĩhĩy na, a zi di i mbur migi naŋ, amma mbur mapura ircece da mbur misi murga na, a cikaŋ di i hirnga.

³²Mahizigiɗa mbur misi moˀore, i malambaˀ naŋ maga na, amma mbur mijeŋŋe, ko ar muc naŋ kwana, vula mevele naŋ da.

³³Sinmijileŋ, naŋ a mevel mbur misi lesle, amma a mevel gilawaya, ada kwa?

³⁴Gi jeŋŋe na, a gila mizli nga mbuŋ, amma mungra, a pa mesem da mizli.

³⁵Buy a ga mezle da gawla naŋ misi were, amma a vunaha himaˀ naŋ ng'ar mbur mapi mesem.