Read South Giziga PRO 15 Bible Online

PRO 15 - South Giziga bible

PRO 15

¹Zila mi ti ˀay mezle na, a tisl mevel, amma ɓi mutosl toslo, a slikiɗ mevel.

²Irne ngi mbur misi sine, a ga ɓa mbur a wuɗ dubuna sin ngi gi gwata, amma mbur gilawa, manih a balama i gilaw naŋ na.

³Bumbulvuŋ a pur ko amaka gar, ara singila misi moˀorehey ati mizli mezleheye.

⁴Mi ngi vula gidaŋ na, naŋ ka widis ngi siifa! Mi musloh sloh kwana, a hĩhĩya wuluk ngi mburo.

⁵Gilawa, a pura cine masirkaŋ na hiris le, mbur mangum a mbiɗakaŋ hirnga na, i misi lesle.

⁶Mbur mijeŋŋe na, hay naŋ i zlili, amma lum ngi mbur misi moˀore, i mendere.

⁷Irne ngi mbur misi sinmijileŋ, a budugo di i sin, amma mevel ngi gilawaya, i ɓi mekelem kaˀ a ruwuy.

⁸Mikuli ngi misi moˀoreheye, a ga Bumbulvuŋ kuyta wãˀ, amma diradibiɗ ngi mizli mikaslslahaya, a hĩyã teˀe.

⁹Gi gwat ngi misi moˀoreheye, a ga Bumbulvuŋ kuyta wãˀ, amma a wuɗ di i mbur maɓi ɓi mijeŋŋe.

¹⁰Mbur mapula jiviɗ mezle na, a kutakaŋ ti bonoy kuyta wãˀ, mbur mapura mbiɗi hirnga hiris le na, a sa mucu.

¹¹Li cifi ngi mizli mumucahay ati li mijileŋ ngi ruwuyo, taŋ a mbuŋ Bumbulvuŋ, na sokkota mevel ngi mizli titrahay jak kwa!

¹²Mbur mukuwa na, a wuɗ a mbiɗakaŋ hirnga ta, naŋ anta ra cufuɗ ɓi avu mbur misi sinmijileŋ ta.

¹³Da mevel a ro ti mumul na, mihiri a wucuɗ deŋ, amma da cine ndum anta a mevele ta na, naɓa i nduruɓo hiri.

¹⁴Mbur misi ti wuluk ngi lesl na, a sipi di i sin, amma mbur gilawa, a zum di i gilaw naŋ vuna.

¹⁵Mbur misi ar bonoyo, hin ngi siifa naŋ gar i malambaˀa, amma hin ngi siifa ngi mbur misi ar mumulo, i muguzlum mandir caˀa.

¹⁶Zuwen mbur misi zlili neˀkini, yo ara zluwun ti Bumbulvuŋ, a funa mbur misi zlili haɗa, mandir ar li lik na le.

¹⁷Zuwen lar lambaˀ madukuw di, ar li mawuɗokuw, a funa makiɗukuw sla misi mal, luguɗ luguɗ ar li magam ti ka mesene na le.

¹⁸Mbur maji mevel kutumo, a slikiɗ tiri, amma mbur mandi ɓi na, a muca tiri.

¹⁹Jiviɗ ngi masafaya, i hadaw pal naŋ, amma jiviɗ ngi mizli mikaslslahaya, i jiviɗ mibirre.

²⁰Mangal misi sinmijileŋ, cine, a mumul di, amma mangal gilawa, a pura mumuŋ hiris le.

²¹Mbur manja lesle, a mumul ti gilaw naŋ na, amma mbur misi ti lesle, a zuɓ jiviɗ naŋ cirre.

²²Gwat mbur mujuwa le a mevele ngi gi gar, da a ngil wuy vurˀe ta na, a gi ta, amma da ngilawuy ada haɗa na, a gi ɓula.

²³Mbur misina mbiɗa mingiɓi le na, i mumul ava! Mingiɓi miɓa le kasl ar pas naŋ na, naŋ kuy haɗa.

²⁴Mbur misiɓi le na, jiviɗ ngi siifa aru di nga muŋ, a gaŋ ɓa a mbiɗi duba avu jiviɗ maru ng'ar li ngi mizli mumucahay a ruwuyo.

²⁵Bumbulvuŋ ara mbizla hay ngi mizli muhuhumo vuhoyo, amma ara jigina guva ngi ngwas wudiga.

²⁶Wuluk mikaslsla ta na, a ga Bumbulvuŋ kuy ta wãˀ, amma mingiɓi mezle na, i ɓi mubuna le ndar.

²⁷Mbur misi slra naŋ i hul na, a so ti hiryaˀay a wazlaray naŋ, amma mbur mangum a kakaŋ mi ti gwat ngatara ta na, a sa ndir ti siifa.

²⁸Mbur mijeŋŋe a wuluk kwaɗay, ɓa a sa mbiɗa mi da mburo, amma misi moˀoreheye, a ɓaka mi trop trop lambaˀ.

²⁹Bumbulvuŋ a cici zar avu misi moˀoreheye, amma a cine diradibiɗ ngi mizli mijeŋŋeheye.

³⁰Pura vu ti hiri mezle na, a vul mumul haɗa, yo ɓi mezle na, a vul gidaŋ.

³¹Mbur majika slimiɗ asi ɓi ngi mbiɗi hirnga malih vu na, a sa cifi ti hay naŋ a wuzla misi sinmijileŋhey.

³²Mbur mangum a sirkakaŋ ta na, a hiris di i vu naŋ tehhe a muŋ, amma mbur mangum a mbiɗakaŋ hirnga na, a lum lesl mezle le.

³³Da mbur ara zluwun ti Bumbulvuŋ na, ara dubun sinmijileŋ, ɓa mbur a lum dudok na, sey a hin hirnga dumbuŋ.