Read South Giziga PRO 19 Bible Online

PRO 19 - South Giziga bible

PRO 19

¹Zuwen mbur misi viya maga gwata ɗalla, a funa mbur maɓi ɓi sloh sloh, yo i gilaw ma na le.

²May gwat manja wuluk kuy kuy na, gwat mezle anta ara ta. kil katakata a lum ɓi.

³Mburo, gilaw naŋ a hiryaŋ gwat ngi gi naŋ, a ji mevel ar Bumbulvuŋ.

⁴Zlili a so ti ji ngama haɗa teˀe, amma murga a wuɗukuw ati ngama ɗik mikpesl purla vuna.

⁵Migi sedewo ti slire, a pulakaŋ manja kuti ti bonoyo ta, yo mbur magi slir yoɓ yoɓ na, a lih ta.

⁶Mizli haɗa a ɓaka mi deɗek a mbuŋ mbur madiɗa, mbur mavul gwat ngatara na, mizli gar i ngama naŋhay.

⁷Mbur misi viya na, sukum naŋhay gar a hirsakaŋ, sokkota ngama naŋhay, a pulakaŋ ɗoɗok jak! A ra kiɗ slir aruŋ si na, a cohom le kwatak.

⁸Mbur maga kiita da hirnga naŋ na, a wuɗ di i vu naŋ, mbur masla wala ngi ɓi na, a sa ndir ar wuya.

⁹Migi sedewo ti slir na, a ndir manja a kutakaŋ ti bonoyo ta, yo mbur magi slir yoɓ yoɓ na, a lih ta.

¹⁰A tiɓaŋ ɓa mbur gilawa, a ndir ar wuya ta, mbur beke, ɓa a wa yarmahay na, gaˀ gaˀ le.

¹¹Mbur misi wuluk mezle, anta ji mevel kutum ta, yo dudok nga naŋ, i puyko hirnga ti malambaˀ migakaŋ di.

¹²Himaˀ ngi buyo, naŋ kaɓa tuwuy ngi mobor, amma gi mezle naŋ, naŋ kaɓa wulngar avu giziŋ.

¹³Mangal manja lesle, i mendere muluma cine, amma ngwas matiri haɗa na, naŋ kaɓa yam magic teˀ le ta.

¹⁴Hay ati zlili na, i zlili cine mupula da ziri, amma ngwas giɗaɗo, mavula i Bumbulvuŋ.

¹⁵Masafaya a ca mburo ar hinje, yo kwacay ngi mbur masafaya naŋ njoŋ kine.

¹⁶Ɓi miɓa le ɗaˀ le, mbur maja a hirnga na, a jigin di i siifa naŋ, mbur magi ti siifa naŋ ka sefel na, a sa mucu.

¹⁷Mbur mapura ircece da mbur muvuso na, a vul di i duvus da Bumbulvuŋ masa wurkaŋ di.

¹⁸Kuta mangal ɗike, asi njaha hiri ada, amma anja ki ji mevel hã ki kiɗa vagay ta ɓula.

¹⁹Mbur maji mevel haɗa na, a wuruk pokolo [3], asi da ki pula le teˀ na, ki hilaŋ di i muyuŋ ɓa a ga ti vendeke.

²⁰Tuɓa kuti, cine ngilawuyo, ɓa ar kiɗa mi naŋ na, ki tiri misi sinmijileŋ.

²¹Wuluk ngi gi gwataya, naŋ haɗa a mevel mburo, amma ɓa a gi na, sey da Bumbulvuŋ mujuwa le.

²²Gwat mawuɗam avu mburo, i ji ngama ti teŋteŋ, yo ma na, zuwen misi murga a funa misi slire le.

²³Zluwun ti Bumbulvuŋ, aru ti mburo ng'ar siifa, yo mbur a mbi, a gi hin mbeˀmbeˀ, ko hiryi anta.

²⁴Masafaya a ca haŋ ng'ar skiɗe, amma naŋ anta mo di nga balama ta.

²⁵Mbur masingir ar mbur na, kiɗaŋ, ɓa mbur gilaw a so ti lesl a hirnga, mbiɗa hirnga da mbur misi lesle, ɓa a sa sla wala ngi sine.

²⁶Mbur maga moˀore da cine, yo a ɓul mumuŋ na, i mangal mavul futuru, magi gwat ngi pi mesem.

²⁷Mangal ɗu, da ki sli himaˀ le ngi cine ngilawuyo na, naɓa i ngi bi paɗ avra avu ɓi ngi sine.

²⁸Mbur kesef mizilaka le nga gi sedewo na, a singir ar ɓi mikaslsla, mi ngi moˀore, a zuma ɓi mijeŋ ta hã a mbi di.

²⁹A gaka dangaya vur misingirey ar mizli, yo gandaya kwana, ngi kiɗa gilaway a duba.