Read South Giziga PRO 2 Bible Online

PRO 2 - South Giziga bible

PRO 2

¹Mangal ɗu, da ki ra tiɓa mingiɓi ɗu, ɓi ya muɓuw di le ɗaˀ na, i zlili avu ka,

²da ki ra jika slimiɗ asi sinmijileŋ, ki ra ka mevel ɗik asi ɓi ngi lesle,

³haˀaw, da ki ra cufuɗ jini avu ɓi ngi lesl, ki ra cufuɗ sli wala ngi ɓi,

⁴da ki ra sipa hirdam hirdam kaɓa dala, ki ra gudoho di kaɓa zlili a ruwuy na,

⁵naɓa kisa sla wala ngi zluwun ti Bumbulvuŋ, kisa lum sin ngi Buymisemuŋ.

⁶Asi mavula sinmijileŋ i Bumbulvuŋ, yo sin ati sli wala ngi ɓi, a boko ti balam naŋ.

⁷Mizli mikaslslahaya, Buymisemuŋ a ga ɓa gwat taŋ a gi kasl kasla, naŋ kaɓa mbaray avu mbur miteŋteŋ ar gwat ngi gi naŋ.

⁸Buymisemuŋ a wi vu ti mbur masipa jiviɗ mikaslsla, a jigina mizli miteŋteŋ naŋhay ar gwat ngi gi taŋ.

⁹Akẽh so na, kisa sla wala ngi ɓi mijeŋŋe, ɓi mizlir le ati ɓi mikaslsla: i jiviɗ maru ti mbur ng'ar wuya.

¹⁰Kanah na, sinmijileŋ a sa ci a mevel ɗike so, joˀ sine, a sa vuluw mumul.

¹¹Wuluk mukuy kuy wãˀa, a sa jiginuw, sli wala ngi ɓi a sa lihuw,

¹²a purtuw avu gi gwat malambaˀa, avu mizli maɓam ɓi ngi slir lambaˀhaya,

¹³avu mizli mapulaka sipi jiviɗ mikaslsla, ɓa a sipam jiviɗ misi ar luvuŋ,

¹⁴macira taŋ hiri i gi malambaˀa, mazluzluɓam ti gi moˀore taŋ mukuy ta wãˀ na,

¹⁵taŋ a mbiɗaka gwat ngi gi taŋ le malambaˀ, jiviɗ taŋ masipaka, naŋ slurkoɗo.

¹⁶Kanah na, kisa muɗa vu ɗike gu tivi ngwas misi may zil, avu ngwas burvula misi mi naŋ i ngi tikina vu,

¹⁷mupula zil naŋ muzuɓaŋ paɗ ti diili, yo a puyuko hirnga ngi jumoˀay ngi Buymisemuŋ naŋ le.

¹⁸Haˀaw, hay naŋ ara ru di ng'ar mucu, jiviɗ naŋ ara ru di ng'avi mizli ngi ruwuyoy.

¹⁹Ko wa gar muru le ngi hay naŋ na, naŋ anta mo mata, yo naŋ anta luuma jiviɗ ng'ar siifa mata.

²⁰Naŋ kine, gi gwat ɗike, a sa gi i gwat ngi gi ngi mizli gambarahay, kisa sipi di i jiviɗ ngi mizli mijeŋŋehey.

²¹Masa cifam asi ruwuy hana i mizli mikaslslahay, mizli miteŋteŋhey masa ndiram anga.

²²Amma a sa gwahaka misi moˀorehey asi ruwuyo, a sa ɓulaka mizli malambaˀahaya ti raˀa avra.