Read South Giziga PRO 20 Bible Online

PRO 20 - South Giziga bible

PRO 20

¹Mbaazla a ga mburo, a singir ar mizli, yo barasa kwana, a ga mburo, a duf mi, mbur mawi ti mbaazla na, naŋ anta luuma sinmijileŋ ta.

²Tuwuy ngi mobor a gi zluwun, zluwun ti buyo kanah ya. mbur maja mevel da buy na, a ca siifa naŋ le ar mendere.

³Mbur mawuɗ tiri ta na, i ɓi ngi cika hirnga ava, amma gilaway gar na, a wuɗam tiri haɗa.

⁴Da viya migi le na, masafaya anta ngum huvo ta, amma ti sifi so na, aru ti sipi gwat, na a lum ta ya kini.

⁵Wuluk misi a mevel mburo, i yam mijileŋ, mbur masla wala ngi ɓi na, a nuw ara gu.

⁶Mizli ada haɗi mapuraka gwat ngi gi taŋ, i mezle, amma mbur maluma mezle migisiŋ gisiŋ naŋ i waka?

⁷Mbur mijeŋŋe a zuɓ jiviɗ micirre, ziri naŋhay a sa ndiram ti mumul a dirba naŋ.

⁸Da buy micifi le joˀ ngi gi kiita, a sliɗa hiri le sliɗ na, naɓa a sla wala ngi ɓi malambaˀa le.

⁹Maɓi: «I buna mevel ɗu le, ko mungra neˀ anta avu ya ta» na, i waka?

¹⁰Gwatay cuw ngi wi dudok ngi gwatay ati agwadahay cuw na, a gaka Bumbulvuŋ kuy ta wãˀ cuw taŋ.

¹¹Mangal gawla, da gwat ngi gi naŋ, naŋ kaslsla malla naŋ jeŋŋe gar na, a sinaka avu slra naŋ.

¹²Slimiɗ ngi cin ati hiri ngi pur na, cuw taŋ i Bumbulvuŋ miga taŋ.

¹³Da ki wuɗ le ɓa murga a lumuw ta na, anja ki hinje ta, da ki wuɗ le ɓa ki zum ɗaf ndus na, wuna hiri.

¹⁴Mbur mahiɗik gwata, a ɓi: «Kay, naŋ kuy ta, naŋ kuy ta!» amma da naŋ mira cuh le na, a ɓi yawwa.

¹⁵Ɓiri hirnga ati virzle hiri paatu ada haɗa teˀe, amma mingiɓi misi ti sin haɗa na, kay, i gwat malum tuwaˀa.

¹⁶Da mbur a gi sedewo le ar duvus ngi mbur mulak na, tiɓa godo naŋ, sey a jik gwat, asi a gi sedewo ngi mbur manja sin le.

¹⁷Gwat ngi zum muluma ti jiviɗ malambaˀa, ndum ɓula, amma nga mbuŋ na, a sa tiri a balama ka ɗugur memeɗe.

¹⁸Gwat ka mawuɗ ngi gi gar na, wulka kuy kuy a mevel ɗike, naɓa a sa gi, da ki wuɗ le ɓa ki gi vurum na, slufa gwataya kuy kuy kwaɗay.

¹⁹Mbur manjika ɓi miyaŋŋa na, a vul di i mbur ngi ji, mbur magi mi haɗa na, ki jumom cuwa ta.

²⁰Mbur maza cine ati mumuŋ na, siifa naŋ a sa muc kaɓa lampe angi luvuŋ.

²¹Zlili micikila kutum angi zli virzi naŋ na, ar kiɗa mi naŋ, anta sik ta.

²²A gukuw malambaˀ le na, ki ɓi: «I pula cuwal nah» na, anja ki ɓi ta! Ka njih hiri njah asi Bumbulvuŋ si na, a sa lihuw si.

²³Gwat cuw ngi wi dudok ngi gwatay na, a ga Bumbulvuŋ kuy ta, kilo mijeŋ ta na, i gwat mezle ta.

²⁴Mbur maru ti gi manja zluwun na, mbele Bumbulvuŋ, na so na, mbur a sla wala ngi jiviɗ naŋ mazuɓa gu kwa?

²⁵Mbur maɓi ɗaˀ manja wuluk: «Hana i gwat mipal » na, a ci le ar kwar, kaɓa mbur masa wuluk a dirba jimi [4].

²⁶Buy misi sinmijileŋ na, a zliɗa hirnga ngi misi moˀoreheye, a musukuɗo taŋ tur asi sar.

²⁷Musuwun ngi mburo i lampe ngi Bumbulvuŋ, a ɗumburo ɓi misi a hur mburo bileŋ bileŋ.

²⁸Gi mezle ati gi gwat mikaslsla na, a sa jiginaka buyo, maga ɓa zuma buyo, naŋ gidaŋ gidaŋ na, i teŋteŋ naŋ.

²⁹Gidaŋ i gwat ngi wuya ngi mizli ziri ziri aruŋ, maɗuva hirnga da midigilahay kwana, i hol.

³⁰Gi waˀa da mburo, i slalak ngi tika moˀore, naŋ kine, kiɗ kwana, i slalak vur jileŋ ngi mevel ngi mburu.