Read South Giziga PRO 24 Bible Online

PRO 24 - South Giziga bible

PRO 24

¹Ki gi suloŋ ti mizli misi moˀoreheye ta, ki hĩyã jum ati taŋ ta.

²Asi wuluk nga taŋ i ngi ngizla gwatay tewle, yo irne taŋ, a ɓi di i ɓi ngi malambaˀ taŋ masa gaka na tewle.

³Mbur a ndira haya ti sinmijileŋ gu, mbur masla wala ngi ɓi, a ndira haya gidaŋ gidaŋ,

⁴ɓa viŋhey a naham mbaf mbaf, ti gwat mupuɗaw puɗaway, yo mezlehey na, sey ti si na gwat.

⁵Mbur misi kpak naŋ, naŋ ti sinmijileŋ, naŋ gidaŋ haɗa, yo mbur misla wala ngi ɓi le na, a ska gidaŋ naŋ makaw cuw.

⁶Yo ma na, da ki wuluk le kuy kuy na, ki ga vurumo gu: luuma bugawla, a gi asi mingila wuyoy mihaɗa.

⁷Sinmijileŋ, naŋ kaɓa muwã musubur, gilaw a luuma gu ta, ar li ngila wuy ngi mizli gara, naŋ anta wuna mi gu ta.

⁸Mbur mawuluk wuluk ngi gi malambaˀ na, a sa zilaka mbur migi gidiɓi.

⁹Wuluk ngi mbur gilawa, i gi mungra tewle, yo wuluk ngi hirsa vu, i gwat mukuyta wãˀ avu mizli.

¹⁰Da ka mihĩhĩy le angi hin ngi bonoy na, naɓa gidaŋ ɗike, naŋ geˀ preˀe.

¹¹Mizli migaka taŋ kiita ngi muc le na, laha taŋ, yo mizli maram zuway zuway nga muc na, laha taŋ.

¹²Ko mbri na, kisa ɓi: «Ani i sinaka zleˀe ta!» Mbur maɗumburo ɓi ngir mevele, a si na takwa? Naŋ, a sla wala nah le. Mbur masingiluw na, naŋ a si na le, yo a sa wurka mburo gar na, weˀe avu gwat ngi gi naŋ.

¹³Mangal ɗu, zum mama, asi naŋ ndum, mama, naŋ deɗek a balam ɗike.

¹⁴Sina sin le, sinmijileŋ kwana, a sa gi avu ka kanah ya. Da ki lum sinmijileŋ le na, hin ɗik ada nga mbuŋ, yo njaha hiri ɗike, anta sa zizi ta.

¹⁵Ka mbur misi moˀore, ki ga malambaˀ da hay ngi mbur mijeŋŋe ta, ki hiryaŋ musuko vu naŋ ta.

¹⁶Asi mbur mijeŋŋe, da ko a diɗ le hã is tarnaˀ kwana, a sa slikiɗ a muŋ na si, amma misi moˀoreheye, a sa ndilam ng'ar bonoy.

¹⁷Da mesene ɗik midiɗ le na, ki mumul ta, da sar mibaŋ le na, ki zluzluɓ vurˀe ta,

¹⁸vur Bumbulvuŋ masa pura ɓi nah kuy avu hiri naŋ ta, ɓa a sa gaŋ himaˀ mata.

¹⁹Ki ji mevel ar migi gwat malambaˀhaya ta, ki gi suloŋ ti misi moˀoreheye ta.

²⁰Asi hin ngi mbuŋ anta avu migi gwat malambaˀhaya ta, yo siifa taŋ a sa muc kaɓa lampe.

²¹Mangal ɗu, zluwun ti Bumbulvuŋ waɗ ti buyo. mizli mawuɗam mbiɗa gwat gar na, ki jumom bummoˀ ta.

²²Asi hiryi a luuma taŋ gurjike gu. Yo Bumbulvuŋ malla buy masa so taŋ ti hiryi na, misina i waka?

²³Ɓi misi ani na, a so ti vu mbur misi sinmijileŋ vuna ma. Kiita a jini muy ta.

²⁴Mbur migi gwat malambaˀle na, ko wa gar miɓaŋ le: «Ka njiraŋ» na, anja zigiduw a nisaŋ, yo sukwi gar a hirsaŋ.

²⁵Mizli mambiɗaka hirnga da mbur migi malambaˀ na, a sa cinam ndum, ɗuwula mi ati gi mezle a sa ndir ar taŋ.

²⁶Mbur mambiɗa ɓi njah na, i mbur mawuɗ ji ngama.

²⁷Ɗiya ɓi ngi slra ɗik ngi vra, yo wa mi ngi slra ngi guva ɗike gar, a dirba nah na, kisa ndira hay ɗike so.

²⁸Da mbur a gi gwat ta na, ki gi sedewo vurˀe ta. Ki wuɗ ki gi slir ar mingiɓi ɗike kwa?

²⁹Ki ɓi: «Naŋ migiy gwat na, i sa gaŋ di ya, yo i sa wurka mburo gar weˀe avu slra naŋ» na, anja ki ɓi kahana ta.

³⁰Ngi pas numuŋ ada na, i ra cuh gweˀ avu guva ngi masafaya, gweˀ avu guva ngi gudubun ngi mbur hĩhĩyaŋ.

³¹Keɗ na, guva gar i titif, guva kip i hadaw, yo mohol naŋ ngi ɗuguro, a mbizli le.

³²Yi pur hiri, i singila i singila. Ya mupura na, gwat muvuliy dubun ani:

³³Hinje neˀe, hinje dungus dungus, murɗo duba neˀe, haŋ gijaw na,

³⁴naɓa murga a so lumuw piryah kaɓa mbur miliˀi, yo viya a so lumuw dugunus kaɓa mbur mivi vu.