Read South Giziga PRO 26 Bible Online

PRO 26 - South Giziga bible

PRO 26

¹Gi dudok a zlir avu mbur gilawa ta, kaɓa yam mapo buk buk mizlir ti hin pas ta malla vuŋ ti sifi ta na ya.

²Nisa vu migbiŋ ngatara kine na, anta ja mburo ta, kaɓa mecẽecet ati mezlezleŋ ngi pilis makam makapal na ya.

³Lejeŋ, a caka da pilisi, yo lawaya, a sliɗam di zungu, amma gandaya, a kiɗam di gilaway a duba.

⁴Ki mbiɗa mi da gilawa, ti mi ngi gilaw naŋ na ta, vur ka masa tiri gilaw ka naŋ vuna ya.

⁵Mbiɗa mi da gilawa weˀe avu gilaw naŋ vuna, vur naŋ masa pura vu naŋ kaɓa naŋ ti sinmijileŋ.

⁶Mbur maslin gilaw ti mingiɓi naŋ na, kite a sli di i zlambar naŋ tehhe, yo a si di i moˀore ng'avu vu naŋ.

⁷Mbur jegwere, sara galaɓ galaɓa, mikicuwulo, a balam gilawa kwana, naŋ kanah ya.

⁸Vula dudok da mbur gilawa, naŋ kaɓa hingaˀa ɗugur avu ŋvehŋvehlu.

⁹Ɓi ti mikicuwul a balam mbur gilawa, naŋ kaɓa mihaŋ ngi widis misi hadaw mbur miwi le maduduɓa.

¹⁰Mbur mavula slra ngi gi da mbur gilaw malla da mizli macohom ti cuh na, naŋ kaɓa buy maga waˀa da mizli gar.

¹¹Mbur gilawa, a mahiri ngi gilaw naŋ a muŋ, kaɓa kiri muvunuh le, masliɓa vunuh naŋ a muŋ na ya.

¹²Mbur mapura vu naŋ ka naŋ ti sinmijileŋ na, keɗ keɗ na, zuwen njaha hiri haɗa asi mbur gilawa, a funa le.

¹³Mbur masafaya a ɓi: «Gwat miji vu ada a jiviɗe, mobor ada a jiviɗ madiɗahaya!»

¹⁴Miviŋ a mbiɗi daˀ ar mizlir naŋ na, masafaya kwana, a mbiɗi daˀ ar li hin naŋ kanah ya.

¹⁵Masafaya a ca haŋ ng'ar sikiɗe ɓula, amma ci naŋ nga mi na, a giraŋ.

¹⁶Masafaya a pura vu naŋ, ka naŋ ti sinmijileŋ, fineˀ mizli tarnaˀ misina gwatay.

¹⁷Mbur macuh, maci ar tiri micaŋ ta na, naŋ kaɓa mbur mawuɗ ji kiri avu slimiɗe.

¹⁸Mbur gilaw maɗuv vu da gwatay, malih luvut, na zle magi gwat ngi kiɗa hirnga gar na,

¹⁹naŋ kaɓa mbur maga gilaw da cil naŋ, a dirba nah, a ɓaŋ: «I gi di i dungur!»

²⁰Da dum anta asi vu ta na, vu a mucu, yo da gila ɓi da mbur anta na, tiri a kiɗ mi.

²¹Ivire, a bul vu muhuɗiɗi, yo musluŋvu, a tiɓi vu giw giw, naŋ kanah ya, mbur mitiri na, a mbulo hiri ngi tiri.

²²Mi ngi mbur maji ɓi da mizli, naŋ kaɓa gwat ngi zum mezle, a ci sesẽŋ asi vu ngi mburo.

²³Ɓiri bara, manja bi ti zay naŋ avra mupuyaka le da hohoy na, a bam vu ati mi mihimaˀ waɗ mevel malambaˀa.

²⁴Mbur migi mesene, a ɗum ar mingiɓi naŋ, yo a hur mevele na, i ɓi ngi slir ceke.

²⁵Da ko ara ɓi ɓi mezle tekeɗe kwana, ki pulaŋ vu ta, asi a mbizi wuluk malambaˀhay le mbizeˀ mbizeˀ durmuku.

²⁶A ɗumo gi mesene naŋ na ɗum, moˀore naŋ na, a sa njik a mihiri mizli gar.

²⁷Mbur mali vigiɗ na, a sa diɗ ng'ara tehhe, mbur magidigil ɗugur na, ɗugur a sa njirslaŋ.

²⁸Irne magi slir na, a hirsa mizli, naŋ maguzuvura taŋ vuna, yo mi mideɗeke, a zizi vu.