Read South Giziga PRO 27 Bible Online

PRO 27 - South Giziga bible

PRO 27

¹Ki ɓi yawwa vur hin misi tiprike ta, asi gwat masa gi dana na, ki si na ta.

²Anja mahunumuw i mbur mekelem, i ka tehhe a muŋ ta, anja i mbur mulak, i irne ngi balam ɗik tehhe a muŋ ta.

³Ɗuguro naŋ dudoko, yo muyuŋ kwana, i jijir madiɗa, amma ji mevel ngi mbur gilawa, naŋ dudok a funa le.

⁴Himaˀ a gi bonoy da mbur, ji mevel i mizaw mazuɓ mekepel, amma suloŋ na, maɓusa ɓi nah gu i waka?

⁵Zuwen mbur mambuɗuw hirnga bidas, a funa ngama manja si na kwacay naŋ na le.

⁶Ngama ɗik mambuɗuw hirnga na, i ɓi minjah wãˀ, amma mesene ɗik majuw kuɓuy na, i ngi guw gilaw.

⁷Mbur mimbi le na, a pura mam mumuɗa wureˀ aruŋ hiris le, amma mbur may majaŋ na, gwat miɗalaka, a pura deɗek.

⁸Mbur maru ti liˀi kiŋkiŋ kileŋ avu hirwuy naŋ na, naŋ kaɓa mecẽecet maliˀi kileŋ avu hay naŋ.

⁹Mal ngi puy ati urdi a vul mumul a mevele, yo ngama miteˀteˀe, a funa kuta hirnga ɗik tehhe a muŋ na le.

¹⁰Ngama ɗik malla ngama ngi bunuko, ki pulaŋ saf ta, ɓi mutuwaˀ a lumuw le na, ki ru ngi hay sukum ɗike ta, zuwen midigwi ɗik migweˀe, angi sukum ɗik mikileŋ.

¹¹Mangal ɗu, ndir ti sinmijileŋ, naɓa mevel ɗu a sa mumul, naɓa mbur mapuriy hiris le gar na, i sa mbiɗaŋ di gu.

¹²Mbur misi lesle, naŋ mupura le, mendere ara ndilawa na, a ɗum, amma gilawaya, a cohom a cikeˀe, a humbuɗam haŋ.

¹³Da mbur a gi sedewo le ar duvus ngi mbur mulak na, tiɓa godo naŋ, cufuɗaŋ ɓa a jik gwat, asi a gi sedewo ngi mbur mulak le.

¹⁴Da mbur muso le prik prik nga ja haŋ da cil naŋ ti ˀay paɗ a muŋ na, a sa puraka ɗuwula mi naŋ nah kaɓa i nis.

¹⁵Gwat majuwaka ngi tika yam ngi viŋ magice, da vuŋ a gi le, ara gic tes tes mbak le ta na, i misi purla ati ngwas mawuɗ tiri haɗa.

¹⁶Mbur matika ngwas nah, ɓa a tiri ta na, naŋ kaɓa mbur matik himiɗi, malla mawuɗ ɓa a ja mal mikilere ti haŋ.

¹⁷Ɓiri a mbus ɓiri cil naŋ, yo mburo kwana, i jum ati cil naŋ maɗiyaŋ.

¹⁸Mbur makilaha uruf naŋ na, a sa zum yi naŋ, yo mbur maki slimiɗ ar buy naŋ na, a sa ɗuvakaŋ hirnga.

¹⁹Yam i dorogal ngi pura hiri ngi mbur, mevel ngi mburo kwana, i ngi pura hur ngi mbur aya.

²⁰Li cifi ngi mizli mumucahay ati li mijileŋ ngi ruwuyo, t'anta mbam ta wãˀ, hiri ngi mburo kwana, anta mbi ti pura gwataya ta ya.

²¹Ɓiri bara ati ɓiri tapasl tapasl, a paka taŋ ti pi ar kukutu, amma mburo, masla wala naŋ i slimiɗ naŋ mazil na.

²²Mbur gilawa, da ko ki ɗugo ar jijiŋ jom ati mengeleleŋ ngi gwata tekeɗe kwana, gilaw naŋ na, anta kurut avra ta na si.

²³Ginew ɗikeye, taŋ kuy kuy kwa mbrike na, anja ki si na taŋ, yo ki slimiɗ ar gezleŋ ngi ginew ɗikey mitaˀ taˀ na.

²⁴Asi zlili, naŋ anta ndir ngi set ta, ko loppol ngi hirnga kwana, anta ndir vur dideˀ vur dideˀ ta.

²⁵Giziŋ misla le na, giziŋ mekelem a ɗiɗawa, yo da murbuc misi a muwã i mihila le na,

²⁶ki ziri tumuŋhoy, ɓa ki ki zana avu vu, yo ki bazuwayay, ɓa ki hiɗik taŋ guva,

²⁷yo ki mul ɗuwa jõh jõh avu ˀawaya ɓa ki si, ɓa mizli ngi hay ɗikey a sam, yo ɓa ngwas migi slra ngi hay ɗikey a sam.