Read South Giziga PRO 28 Bible Online

PRO 28 - South Giziga bible

PRO 28

¹Mbur misi moˀore, ko da anta gidiɗakaŋ ta tekeɗe kwana, a kil si, amma mbur mijeŋŋe, anta zluwun ta, kaɓa zinga ngi mobor.

²Da hirwuy ara slikiɗ ɓi na, naɓa muwuɗa buyoyo taŋ haɗa, amma da mbur misi lesl, yo misina ɓi ada na, naɓa hirwuy a gi biyãˀ biyãˀ lambaˀ ta.

³Buy misi murga, mazuma mizli mizlewey na, naŋ kaɓa vuŋ mihirya gwat, maso ti may.

⁴Mizli mupulaka ɓimujuwa le na, a ngilam wuy ti mbur misi moˀore, amma mizli majaka ɓimujuwa a hirnga na, a tikaka moˀore naŋ na.

⁵Gwat mizlir le na, mizli malambaˀ hay anta slaka wala nah neˀ ta, amma mizli masipaka Bumbulvuŋ na, a slaka wala ngi gwat gar.

⁶Zuwen mbur misi murga ti jiviɗ naŋ ɗalla, a funa mbur misi zlili musloh sloh na le.

⁷Mbur maja ɓimujuwa a hirnga na, i mangal misi lesl, amma mbur mandir ɓaˀ a hay ngwas sulomehey na, a pa mesem da cine.

⁸Mbur mavul hataka [5], ɓa zlili naŋ a sik na, a cikil di i zlili da mbur mapur ircece da hĩhĩyahay.

⁹Mbur madisla slimiɗe, ɓa a cine ɓimujuwa ta na, ko diradibiɗ naŋ kwana, naŋ kuy avu Buymisemuŋ ta wãˀ.

¹⁰Mbur maziza mizli mikaslslahay ng'ar jiviɗ malambaˀ na, a sa diɗ ng'ar vigiɗ nga naŋ tehhe a muŋ, amma mizli mikaslslahaya, a sa lumam wuya nga mbuŋ.

¹¹Mbur misi zlili na, a pura vu naŋ ka mbur misi sinmijileŋ, amma mbur misi murga misi lesl na, a ci a kwacay naŋ gu.

¹²Da mizli mijeŋŋehey a lumam bugawla le na, i mumul madiɗa, amma da misi moˀorehey a cicam le kaŋ kaŋ na, mbur gar a pur li ngi ɗum.

¹³Mbur maɗumo malambaˀ naŋ na, naŋ anta bi ti jeŋ ta, mbur manjika malambaˀ naŋ, yo maga mata na, a sa pulakaŋ malambaˀ naŋ vuna avra.

¹⁴Mbur maji lesl ar gwat ngi gi naŋ ndrehhe na, a mumul, amma mbur macici kaŋ kaŋ na, a sa lum hiryi.

¹⁵Mobor matuwuy, yo luˀuf [6] mamul kwiɗ na, mbur misi moˀore mawa mizli migeˀ ircecehey na, naŋ kanah ya.

¹⁶Buy manja lesl na, a ska hul naŋ na nga mbuŋ. amma mbur mawuɗ ɓi ngi hulo ta na, hutuŋ naŋ subur.

¹⁷Mbur muro ti gir asi naŋ mikiɗ hirnga na, a kil sesẽŋ nga mucu: ji naŋ vuna ngi mi aruŋ maka!

¹⁸Mbur magi gwat ti jiviɗ naŋ cirre na, a sa lih, amma mbur magi gwat ti kwacay cuw na, a sa diɗ ar purla mekeleme, a zizi.

¹⁹Mbur mahuva guva naŋ na, a sa zum hã mbi, amma mbur magi welele ti gwat lambaˀhay na, a sa ndir ar murga.

²⁰Mbur mikaslsla na, a sa ɗuwulakaŋ mi, amma mbur mawuɗ gi zlili kutum si na, naŋ anta sa ndir manja kuti ti bonoyo ta.

²¹Pura mbur ti pur na, naŋ kuy ta, amma mbur mupuɗaw ngbaŋ ni, ngi luuma ɗaf balam pala, ko a bi ngi gi mungra kwana, a gaŋ.

²²Mbur maru ti kil ngiŋ ngiŋ ngi sipi zlili na, i mbur mapur vu kuy avu hiri ta, viya a sa lumaŋ na, a si na ta.

²³Mbur mambiɗa hirnga da mbur na, a hĩyãkaŋ, fineˀ mbur misi irne ngi gi gilaw da mbur na.

²⁴Mbur mahulo gwat ngi cine ati ngi mumuŋ, a ɓi: «Hana i mungra ta» na, i ngama ngi mufuyo vu.

²⁵Mbur misi may a jaŋ haɗa na, a slikiɗ tiri, amma mbur mapula vu naŋ mbak da Bumbulvuŋ na, a sa mbi haɗa.

²⁶Mbur mapula vu naŋ mbak da mevele tehhe na, i gilaw, amma mbur maga gwat ti sinmijileŋ na, ko gwat masa gaŋ anta.

²⁷Mbur mavula gwat da mbur misi murga na, ko gwat masa kicaŋ anta, amma mbur mangum ɗuva hiri ara ta na, nis a sa jaŋ.

²⁸Da misi moˀorehey a cicam le kaŋ kaŋ na, mbur gar a ɗum, yo da ara zizam na, mizli mijeŋŋehey a jam haɗa.