Read South Giziga PRO 9 Bible Online

PRO 9 - South Giziga bible

PRO 9

¹Sinmijileŋ a ciɗ ɓamtalay tarnaˀa, a ndira hay naŋ le,

²a kiɗ ginewey, a di mbaazla, yo a ɗiya li zumo le ɗiyeˀɗiyeˀ.

³A slina ngwas migi slra naŋhaya, nga zila mizli, ˀay ngar ngar, ar li miɗingir ngir walahaya,

⁴a ɓi: «Mbur kesef ada kwa? Anja a so kini ti ka!» A ɓa mbur manja lesle:

⁵«Soko ɓa ki zumam ɗaf ɗu, ɓa kisam mbaazla ya milihiɗa na.

⁶Pulaka gi gilawa, ɓa ki lumam siifa, sipam jiviɗ ngi lesle.»

⁷Mbur mabuca mbur mingila mi na, a lum di i hiris tewle, mbur mabuca mbur misi moˀore na, a lum di i zi tewle.

⁸Ki buca mbur mingila mi ta, naɓa a sa hirsuw, amma da ki ra buca mbur misi sinmijileŋ na, a sa wuɗuw.

⁹Ɓa ɓi da mbur misi sinmijileŋ, naɓa a sa giɗa sin naŋ mijileŋ na ava, dubuna gwat da mbur mijeŋŋe, naɓa a sa ska sin naŋ na ava.

¹⁰Zluwun ti Bumbulvuŋ na, i zli virzi ngi sinmijileŋ, misi lesle, i mbur masina mbur mipal.

¹¹Haˀaw, hin ngi siifa ɗik mihaɗa na, mbele ya, yo siifa ɗik a sa sik haɗa.

¹²Da ki mbur misi sinmijileŋ na, ka ti sinmijileŋ vur hirnga ɗiki, yo da ki mbur mingila mi kwana, zayɓi nah, naŋ a hirnga ɗik pal ɗiki.

¹³Ngwas gilawa, a duf mi haɗa, i mijijigwiɗ, yo naŋ anta cin neˀ ta.

¹⁴A cifi a mizlingre naŋ, ar janga, ar li miɗingir ngir walahaya,

¹⁵ɓa ngi tila mi da mizli macohom, mazuɓaka jiviɗ taŋ cirre na,

¹⁶a ɓa taŋ: «Mbur kesef ada kwa? Anja a so kini ti ka» A ɓa mbur manja lesle:

¹⁷«Yam muhulo ti hulo, naŋ deɗeke, yo ɗaf miyaŋŋa, naŋ ndum haɗa!»

¹⁸Dambalaka mizli tayna, taŋ ati mizli mumucahay na, a sinaka ta, mizli ngwas mazila taŋ na, taŋ a wuzla li ngi mizli mumucahay!