Read South Giziga ECC 1 Bible Online

ECC 1 - South Giziga bible

ECC 1

¹Misi ani na, i mingiɓi ngi mbur misi sinmijileŋ, mangal ngi Davit, yo i buy Zeruzalem.

²Mbur misi sinmijileŋ a ɓi na, i ngatara lambaˀ, gwat gar i ngatara lambaˀ.

³Mbur maga slra gǝr gǝr ar duniya misenna, a pulaŋ gir mi da naŋ vunaka?

⁴Vi a cuh, mekelem a ndilawa, amma hirwuyo naŋ da nga naŋ nga naŋ na si.

⁵Pas a bawa, a diɗi, a wus vu ngi mi ng'ar li naŋ mabo tiraˀa na a muŋ.

⁶Himiɗ aru nga ruwuy, yo aru ng'aseˀeŋ, himiɗ a gi, a gi, a cuh, a zlo virzi hirik a muŋ ma.

⁷Mizaway gar na, a ram ng'ar mubuliy, amma ko mubuliy anta nih ta, li mizaway maɓulom ng'ara na, mizaway ara ɓulom ng'ara ava na si.

⁸A ɓaka ɓi le gar, a ɓi ɗaˀ ɗaˀa mata, hiri anta mbi ti pura gwata ta, yo slimiɗ anta mbi ti cine ɓi ta.

⁹Gwat misi ada zleˀe na, masa gi ada na i nah vuna, gwat migaka zleˀe na, a sa gam i nah vuna si, ko gwat nawaya loŋ magi ar duniya misenna anta.

¹⁰Da ko gwat ada zliv i ɓam vurˀe: «Puraka, hana i gwat nawaya» tekeɗe kwana, naɓa gwat nah, naŋ da zle misi ngadana ta ar vihey mucohom dumbuŋ ar ndra.

¹¹Ɓi ngi hin magala mucuh zleˀe na, wuluk nah anta so keŋ a hirnga mata, yo gwat masa gi tumbuŋ na, ɓi nah anta sa so keŋ a hirnga mizli masa ya ka taŋ tumbuŋ na mata ya.

¹²Ya mbur misi ti sinmijileŋ, i cifi le, yi buy ar Israyeley, a Zeruzaleme.

¹³Gwat mira gi ar duniya misenna gar na, yi hurdum di le a mevele, ɓa i si na ti sinmijileŋ. Nah gar na, i gwat ngi gi welele ngi so ti hiryi, Buymisemuŋ muvula da mizli titirahay ɓa a gaka taŋ.

¹⁴Slrahay magam ar duniya misenna gar na, yi pura taŋ le, amma na, i ngatara lambaˀ, naŋ ka sipi himiɗ ngarataŋ.

¹⁵Gwat muguɓo le gurjoŋ na, a slikiɗaka deŋ gu mata, yo gwat mizizi le kwana, a slufaka gu mata.

¹⁶Joˀ yi ɓi a kwacay ɗu na: «Ani yi dubun le, yo yi lum sinmijileŋ le ati sin ngi gi gwata haɗa, fineˀ buy wanaka gar muzum buy dumbuŋ ar ya a Zeruzaleme.»

¹⁷Yi hurdum le a mevel ɗu ngi si na sinmijileŋ, yo ngi sla wala ngi mibirnga ati gilawa, nah gar na, i si na le, naŋ ka sipi himiɗ ngataraŋ.

¹⁸Asi da mburo naŋ da ti sinmijileŋ haɗa na, naɓa lik kwana ada haɗa ya, yo mbur maska sin naŋ nga mbuŋ na, a sik di i bonoy.