Read South Giziga ECC 10 Bible Online

ECC 10 - South Giziga bible

ECC 10

¹Mal ngi mbur midi mala, jijiwiɗey mumicam le ara na, a zãˀãkaŋ di, yo a hiryakaŋ di. Gi gilaw neˀkini na, naŋ zimbih fineˀ sinmijileŋ, yo fineˀ gi dudoko.

²Mbur misi sinmijileŋ a wuluk wuluk mezle, amma mbur gilawa, a wuluk cirre ta.

³Mbur gilawa, da ko naŋ mira ru a jiviɗ kwana, wuluk a kicaŋ na si, a biga da mizli gar, naŋ i gilaw.

⁴Da buy a wuɗ le ɓa a gi ɓi ati ka na, ki pula li ɗike ta, asi cifi teˀ teˀ na, a tika ɓi madiɗa malambaˀhaya.

⁵Yi pur ɓi malambaˀ le ar duniya misenna ma, naŋ kaɓa mbur madiɗa mazluɓ ɓi:

⁶i mavulaka slra mimadiɗahay da mbur gilaw, amma misi zliliheye, a ndiram ti slra mupuɗaw puɗaway ta jaka.

⁷Yi pura bekeheye, gilaˀ gilaˀ ar pilis, amma yarmahaya na, a ram ti sar kaɓa bekehey jaka.

⁸Mbur mali vigiɗ na, a diɗ ng'araŋ, mbur mapul mifiliw avu dalama na, kaw a humbuɗaŋ.

⁹Mbur mabusl ɗugur na, ɗugur a pultoŋ, mbur mapuɗuk dumo, naŋ a mi mendere.

¹⁰Da zlimbe a kiɗ mi le, a mbusaka angi mbise ta na, sey mbar vu le makaw cuw, ɓa ngi nguma gwata far, amma da sinmijileŋ ada na, gwat gar a gi.

¹¹Kaw a humbuɗ vu asi matay ngi kaw anta dumvu ta na, naɓa slra ngi mbur misi matay ngi kaw vuna, i wala wanaka?

¹²Mi mabo ti balam mbur misi sinmijileŋ na, i mi mezle, amma mi ngi irne mbur gilawa, a zizaŋ.

¹³Zli virzi ngi ɓi ɓi ngi mbur gilawa, i mi ngi gilaway, yo kiɗa mi ngi mingiɓi naŋ kwana, i mi gilaw malambaˀ muwãˀ naŋ.

¹⁴Mbur gilawa, a sika mingiɓi naŋ koloŋ koloŋ haɗa, mburo, gwat masa ndilo ava na, a si na ta. Gwat masa ndilo ava a dirba naŋ na, masa ɓaŋ di i waka?

¹⁵Mbur gilawa, slra naŋ a tikaŋ gidaŋ ngi vu, ko a si na jiviɗ ngi ru ng'ar walahay madiɗa ta.

¹⁶Hirwuy misi buy ngi raˀa i zuŋ aruŋ, yo yarma ngi raˀahaya, li muwun le wun si na, hiipas ar li gi muguzlum na, kay, hirwuy nah, naŋ ar bonoy.

¹⁷Hirwuy misi buy ngi raˀa i tizer ngi buyoy, yo yarma ngi raˀahaya, a gam muguzlumo ar pas naŋ mindila le, ɓa ngi luuma gidaŋ, anta ngi wi ta na, yawwa, hirwuy nah, naŋ ar mumul.

¹⁸Marja ngi viŋ a mbizli a hirnga mbur masafaya maɗiya gu ta na, yo yam a po yototo nga viŋ mbur misi vagasa.

¹⁹Ɗaf mundumo, a vul mumul, mbaazla a puska vu da mbur ar joˀ naŋ, yo dala a gi gwat gar.

²⁰Ki za buyo ta, ko angi wuluk ngi hur mevel ɗike, ko a hur viŋ ngi hin ɗik kwana, ki za mbur misi zlili ta ma, asi ɗiyuw maslikiɗ a muŋ, aru ti ɓi nah, yo ko misi zlara kwana, a sa ɓa ɓi ka miɓa na.