Read South Giziga ECC 11 Bible Online

ECC 11 - South Giziga bible

ECC 11

¹Slin ti gwat ngi si haŋ ɗike, nga hirnga yam, [1]. asi neˀ nga mbuŋ na, kisa luuma a muŋ.

²Vul zlili ɗike cah da mizli tarnaˀ malla dangafaɗa, asi mike na, masa lumuw a ruwuy aka i mendere wanaka na, ki si na ta.

³Da gazlavay a mbi yam le na, a go vuŋ nga ruwuyo, widise, anja a mbizli hirnga jik ng'ar vay ruwuy malla ng'ar vay muŋ gar na, a ndir ar li naŋ midiɗ vuna si.

⁴Mbur majiɗa li ti jiɗ ngi zligi gwat na, a zligi ta, yo mbur mazluwun ti gazlavay kwana, a gi sifi ngi gwata ta.

⁵Siifa na, ki si na jiviɗ nah ta, kaɓa ka misina jiviɗ ngi zuŋ makicuw a kwacay ngwas ta na ya. Naŋ kine, slra ngi Buymisemuŋ, gwatay gar, naŋ maga taŋ na, ki si na jiviɗ nah ta.

⁶Li muwun le na, zliga gwat ɗike, yo ti pastaˀa, ki cifi joˀ manja gi gwata ta, asi mike, slra mizlir ngi gi i hana kwa malla ngi diga kwana, ki si na ta, malla taŋ cuw taŋ i slra mezlehey kwa mbrike na, ki si na ta.

⁷Li minjahha, naŋ kuy ngi puro, yo pura pasa kwana, i gwat mizlir le avu hiri.

⁸Da mbur a zik le vi mbeˀ mbeˀ na, anja a mumul ar vi tayna gar, amma anja a wulka keŋ, vi ngi luvuŋ, naŋ haɗa ɓula, yo gwat mandilo gar na, i ngatara lambaˀ.

⁹Ka gawla, mumul angi gi gawla ɗike, anja mevel ɗik a mumul angi gi zuŋ ɗike, ga gwat mevel ɗik mawuɗo, yo misi hiri ɗik mapura gara. Amma so na, si na sin le, Buymisemuŋ a sa ziluw ar kiita vur gwat tayna gar ɓula.

¹⁰Lik na, kiraha ɓi nah avra tir mevel ɗike, gwat majuw vu gar na, kiraha kileŋ avu ka, asi gi gawla ati ndir zuŋ zuŋ na, i ngatara lambaˀ.