Read South Giziga ECC 12 Bible Online

ECC 12 - South Giziga bible

ECC 12

¹Wulka mbur muguw na keŋ ti ka muzuŋ zuŋ aruŋ, dumbuŋ ar hin malambaˀ masa ndilawa, yo dumbuŋ ar vi, ka masa ɓi tapasa: «Kay, bonoy titiri, wuya ar vigiɗi.»

²Yo wulkaŋ keŋ dumbuŋ ar pas ati li minjahha, kiya waɗ wurzlaŋhay masa cam ar luvuŋ, yo dumbuŋ ar gazlavay masa mawa a muŋ, a dirba vuŋ migi le.

³Tapasa, mijigina hayay masa jijikam, mizli gambarahay masa hurukom gurjoŋ gurjoŋ, yo miyiˀi daway masa yuyuˀom, a ndiram haɗa mata, yo mupuroy tir li munjoŋŋo masa hulufom, a puram gu mata na,

⁴tapasa, palalam mucuw ngi miviŋhey a sa gicam ar jiviɗ madiɗahaya, mbak hurum ngi yiˀi ar ngurvuŋ anta sa cin mata, hin misi ko tuwuy ngi ɗiyuw kwana a puɗukuw gu, yo mizli dimisey masa hĩhĩyam na.

⁵Ti di nah na, zluwun a guw ti li ngi jiɗ ti jiɗe, yo zluwun a guw ti ru a jiviɗe, dar hol a bo a hirnga tullo ka widis mafuyuku, dumvu a gi dudok dudok ka jaray misi tesl mi cifi le a ruwuy, hin a kiɗ mi kahana, kaɓa yi ngi widis madiɗ a ruwuy, asi mburo, a sa ru ng'ar hay naŋ ngi cifi wãˀ ngi sete muduba, joˀ ngwas mutuwuyoy a gunom a jiviɗ madiɗahaya.

⁶Yo wulka mbur migi ɗike keŋ dumbuŋ ar gugumay misira ngi ɓiri bara masa pusuk a muŋ na, dumbuŋ ar sikiɗ ngi ɓiri tapasl tapasl masa nguruf, yo kukulum masa wuh a mi vigiɗ ngi yam, waɗ girgak masa wuh a mi futuŋ na.

⁷Dumbuŋ ar murɓuk masa mi nga ruwuy, ka naŋ misi zleˀe a muŋ, joˀ musuwun a mi ng'avu Buymisemuŋ migi naŋ.

⁸Mbur misi sinmijileŋ a ɓi na, i ngatara lambaˀ, gwat gar i ngatara lambaˀ.

⁹Gwat ngi buc nga mi sinmijileŋ ngi mbur misi sinmijileŋ, n'ani: a dubuna sin ngi gi gwata le da mizli ma, a wunjul mi kicuwuloy le haɗa, a ɗumburo ɓi taŋ le, yo a cinjaha taŋ le, vur cala vur cala.

¹⁰Mbur misi sinmijileŋ a vula vu naŋ le taˀ ngi luuma mi mezlehey, a toho taŋ le kasl kasl, i ɓi migisiŋ gisiŋhey.

¹¹Mingiɓi ngi mizli misi sinmijileŋheye, taŋ kaɓa ganday misi ɓiri yoŋ [2] avu mi naŋ, mizli mutoho ɗerewoloyo taŋ kaɓa dum ngi zlavaɗ mingahay le gidaŋ gidaŋ, hana i gwat ngi vul ngi mijigin mipal kine.

¹²Mangal ɗu, ji lesle, anja ki buco mi mekelemey ng'ameˀe ta: ki tuh ɗerewol mekelemey mbeˀmbeˀ ta, maakway naŋ anta, vula vu haɗa da dubun mijileŋ kwana, a tiki gidaŋ.

¹³Mingiɓi gar na, a kiɗ mi le, n'ani: Zluwun ti Buymisemuŋ, ɓimuɗuva naŋhaya, ja taŋ a hirnga, asi gwat mizlir ngi gi ngi mbur gar na, i nah.

¹⁴Slra gar na, Buymisemuŋ a sa sla kiita nah, ɓi ngi gwat muɗum gar, mezle ati malambaˀa.