Read South Giziga ECC 3 Bible Online

ECC 3 - South Giziga bible

ECC 3

¹Gwat magi ar duniya misenna gar na, a gi ti hin naŋ, ti pas naŋ:

²Pas ngi yi mbur ada, pas ngi muc ada, pas ngi hirvi gwat, pas ngi muɗa gwat avra,

³pas ngi kiɗa gwat vagay, pas ngi mbul, pas ngi waha gwat, pas ngi ndira gwat,

⁴pas ngi tuwuy, pas ngi singir, pas ngi niˀic, pas ngi ɓuruku,

⁵pas ngi zliɗa ɗugur, pas ngi kuso ɗugur arleˀe, pas ngi ji vu kuɓuy, pas ngi tika ji vu kuɓuy,

⁶pas ngi sipi gwat, pas ngi ziza gwat, pas ngi wi vu ti gwat, pas ngi hiziga gwat avra,

⁷pas ngi ngira gwat, pas ngi tufa gwat, pas ngi cifi teˀ teˀ, pas ngi ɓi ɓi,

⁸pas ngi wuɗa vu, pas ngi hirsa vu, pas ngi vurum, pas ngi cifi zuy zuy.

⁹Mburo, a lum migir mi angi slra naŋ maga gǝr gǝr naka?

¹⁰Gi welele, Buymisemuŋ muvula, ɓa mizli titirahay a gaka na, yi pura le.

¹¹Gwat Buymisemuŋ maga na, a ga angi hin naŋ kaslsla, yo a mevel mizli, a vula taŋ wuluk ngi zik taŋ ar duniya le, manja mbur a sina slra ngi Buymisemuŋ maga diga zli virzi naŋ, hã ar kiɗa mi naŋ vuna.

¹²I si na le, mburo, gwat mezle vurˀe anta, sey mumul ati gi gwat mezle ar hin ngi siifa naŋ tewle.

¹³Yo ma na, gwat gar mbur mazuma, masaŋ, waɗ lum ngi slra naŋ gar na, nah vuna, i gwat Buymisemuŋ muvula ma.

¹⁴I si na le, gwat Buymisemuŋ maga gar na, a zik ko ti vunaka gar, ko gwat mekelem ngi buco ng'ameˀe malla ngi zuɓ ava ng'avra anta. yo Buymisemuŋ ara ga ɓa mizli a ndiram ti zluwun a mbuŋ naŋ.

¹⁵Gwat misi ada na, naŋ da zleˀe si, yo gwat masa gi tumbuŋ na, naɓa a gi le zleˀe vuna si, gwat mususuyum le na, joˀ Buymisemuŋ a sa mo di a muŋ.

¹⁶Yo ma na, yi pura keɗ keɗ ar duniya misenna, sey moˀore tewle. Ar li magam kiita, yo ar li magam gwat jeŋŋe na, sey moˀore tewle.

¹⁷Joˀ yi ɓi a kwacay ɗu ani: Mbur mijeŋŋe ati mbur misi moˀore na, Buymisemuŋ a sa ga taŋ kiita cuw taŋ, asi gwat gar, yo slra gar na, pas naŋ da.

¹⁸Yi ɓi a kwacay ɗu vur mizli titiraˀahaya na, Buymisemuŋ a wuɗ a ci a kwacay taŋ, asi taŋ vuna, keɗ keɗ vu taŋ na, taŋ i gwat misãmihey.

¹⁹Asi gwat magi avu mizli titirahay na, i gwat magi avu gwat misãmihey vuna ya, i gwat mupurla magi ani: muc ngi mizli titirahay ati muc ngi gwat misãmiheye i mupurla. Taŋ gar taŋ ti musuwun mupurla: fini vu ngi mbur mufuna gwat misãmi na, i ngataraŋ, asi gwat gar na, i ngatara lambaˀ.

²⁰Gwat gar a kus hirnga ng'ar li mupurla, gwat gar a bo ti vu murɓuku, yo gwat gar kwana, a mi ng'ar murɓuk a muŋ.

²¹Misina musuɗuk ngi mizli titirahay i waka? Musuɗuk nga taŋ a jiɗ nga muŋ, amma musuɗuk ngi gwat misãmiheye, a pi sar ti pi, sesẽŋ nga ruwuy, maɓa gu i waka?

²²Yi pura keɗ keɗ na, mbur titira, gwat muzuwen vurˀe, mufuna mumul ti slra naŋ na anta, asi mi nga naŋ i nah. Asi mike na, masa mo di ɓa a sa pura gwat masa gi a dirba naŋ na, i waka?