Read South Giziga ECC 4 Bible Online

ECC 4 - South Giziga bible

ECC 4

¹Yo ma na, maguzuvuraka mizli ar duniya misenna, yi ra pura. Mizli muguzuvurahay mawudam na, cinaka widi taŋ ayɗi: mbur ngi tikin taŋ, ɓa a taˀaka tuwuy anta. Muguzuvur taŋhay a funaka taŋ le ti gidaŋ: mbur ngi tikin taŋ, ɓa a taˀaka tuwuy anta.

²Na ya, yi pura na, bonoy tiriri, wuya ar vigiɗi.

³Yo mamumul fineˀ taŋ cuw taŋ ma na, i mbur misi naŋ anta zleˀe ta, asi a pura slra malambaˀ magi ar duniya misenna ta.

⁴Yi pura na, slra gar ati bi ti jeŋ ar slra gar na, i suloŋ mizli magaka ar wala taŋ. Nah kwana, i ngatara lambaˀ, yo naŋ ka himiɗ ngataraŋ.

⁵Mbur gilawa, naŋ haŋ gijaw, joˀ may a kiɗaŋ.

⁶Zuwen hur haŋ purla mbaf ti musuka vu, a funa hur haŋhay cuw taŋ mbaf mbaf ti slra ngi sipi ka himiɗ na le.

⁷I pur gwat ngatara lambaˀ le ar duniya misenna vuna ma.

⁸I mbur ani pal naŋ, cil naŋ anta, ko mangal malla sukum naŋ mizile anta. Slra nga naŋ gar na, maakway naŋ anta, yo hiyĩ zlili a mbaŋ ɗaˀ ta. Na, ara ɓi ti kwacay naŋ ngbaŋ: «ya magi slra, yo ya mawuɗ mumul ta na, vur waka?» Nah kwana, i ngatara lambaˀ, yo i gi welele malambaˀa.

⁹Mizli cuw arleˀe na zuwen, fineˀ mbur purla, asi a lumam migir ngi slra taŋ haɗa.

¹⁰Asi mike, da a ndilam le na, mbur mekelem a slikiɗa cala. Amma mbur mipal naŋ na, i bonoy ava! Da naŋ midiɗ le na, mbur mucuw naŋ, ɓa a slikiɗaŋ anta.

¹¹Yo ma na, da taŋ mihinam le tutup cuw taŋ na, vu culok avu taŋ, amma mbur mutup pal naŋ na, vu a sa gi culok ava mbri mbrike?

¹²Yo da kaɓa mbur a so le, ɓa a kiɗam vu ati mbur mipal naŋ na, mizli cuw a slam himaˀ ava gu. Zeweɗ mijirɗa le hiri makir na, a mburuc kutum ta.

¹³Buy midigila, gilaw, yo naŋ anta ngum, ɓa a ngilakaŋ wuy ta na, mangal gawla misi murga, misi lesle, a funaŋ le.

¹⁴Ko da mangal nah vuna a bo tir dangay, ɓa ngi sa zuma buyo malla i musuko gwat, diga yi naŋ cak, ɓa naŋ masa zum buyo tekeɗe kwana, a funaŋ le.

¹⁵Yi pura na, mizli misi ti siifahay maram ar duniya misenna gar na, taŋ tisi mangal masa zuɓa li ngi buy mekelem mudumbuŋ na.

¹⁶A sa zum buy a hirnga mizli tayna gar, ar mizli naŋ miɓaˀ a mbuŋ taŋ na. Na ko mbri na, tizer masa ya ka tumbuŋ na, naŋ anta sa cin ndum ti zumabuy ngi mangal nah ta ɓula. Nah gar na, i ngatara lambaˀ, yo naŋ ka sipi himiɗ ngataraŋ.

¹⁷Da ki ra ru ng'ar hay ngi Buymisemuŋ na, ji lesle. Aru nga cine ɓi, mbak nga gi mikuli ngi gilaway na le, asi gilawaya, taŋ magam na i malambaˀ na, a si na ka ta