Read South Giziga ECC 5 Bible Online

ECC 5 - South Giziga bible

ECC 5

¹A mbuŋ Buymisemuŋ, anja irne ngi balam ɗik a bo ti ɓi kutum ta, yo anja mevel ɗik a wus vu kutum ngi bo ti mingiɓi ta. Asi Buymisemuŋ naŋ a muŋ, ka, ka a ruwuy. Anja ki ɓi ɓi koloŋ koloŋ haɗa ta

²Asi da mbur a gi welele le haɗa na, musuwun a gaŋ ti duvuɗo, yo da mingiɓi a gi le koloŋ koloŋ haɗa kwana, mi ngi gilaway a bo araŋ.

³Da ki ɓi le ngi ga gwat da Buymisemuŋ na, ki zum vu ngi jami nah mata. Asi anta gaka mezle da gilawaya ta. Gwat ka miɓa ɗaˀ le ngi gi na, ja mi nah.

⁴Gwat ngi gi ka maɓa ɗaˀ le, da ki ja mi nah ta na, zuwen ka miɓa ɗaˀ le ta.

⁵Ki pula mi ngi balam ɗik a hiryuw dumvu ɗike ta, yo ki ru ng'avi mislin ngi Buymisemuŋ, ki ɓaŋ: «Hana i hiris» na, ki ɓaŋ kanah ta. Ki wuɗ ɓa Buymisemuŋ a ji mevel ar mingiɓi ɗike, yo ɓa a hirya slra ngisi haŋ ɗike, vur mike?

⁶Da mbur a musuwun le ti duvuɗo haɗa, yo da mingiɓi a gi le koloŋ koloŋ haɗa na, i ngatara lambaˀ, zuwen ka, zluwun ti Buymisemuŋ.

⁷A si hirwuy ɗike, da ki pura le, ara guzuvuraka mbur misi murga, yo ara ngilaka ɓi mikaslsla ati ɓi mijeŋŋe na, anja a zumuw hirnga ta. Asi mike, mbur madiɗa gar na, mbur mekelem mudum hirnga naŋ ada ya, yo a hirnga taŋ madiɗahay vuna ma na, mizli madiɗa mekelemey mudum ar taŋ vuna ada ma.

⁸Naŋ kine, hirwuyo i mizli gar maciram ti seˀe, yo buyo kwana, a ngir tisi gwat ngi migam aya.

⁹Mbur mawuɗ dala na, naŋ anta mbi ti dala ta, yo mbur mawuɗ gwat ngi wuya kwana, naŋ anta mbi ti gwat ngi lumo ta. Nah gar kwana i ngatara lambaˀ.

¹⁰Da zlili a gi le haɗa na, naɓa muzum naŋhay kwana haɗa ya, migir ngi buy naŋ vuna ada kwa? Sey naŋ mapura zlili naŋ keɗ keɗ ti hiri na tewle takwa?

¹¹Da mbur migi slra, a zum gwata neˀ malla haɗa tekeɗe na, a hinje ti setete gwaɗ naŋ, amma mbur mimbi le ti zlili na, naŋ anta lum hinje ta.

¹²I pur gwat ngi ndurɓo hiri le ar duniya misenna: i zlili, buy naŋ mawi di vu ngi saŋ ti hiryi.

¹³Zlili nah na, a hiryi ar gwat malambaˀhay, da a yi mangal mizile le na, mangal anta lum gwat neˀ le mata.

¹⁴Mbur a sa mi, vu ɓaˀ ti mi, a pula hirwuy misenna, kaɓa naŋ mubo ti kwacay mumuŋ zleˀe: slra naŋ maga gar na, gwat naŋ mazuɓ loŋ ara, ɓa aru di a haŋ na anta.

¹⁵Yo ma na, gwat ngi ndurɓo hiri ani: mbur a sa mi kine, kaɓa naŋ muso zleˀe, naŋ migi slra, a cuh ka himiɗ na, a pulaŋ gir mi ska?

¹⁶Yo ma na, ara zlizlira hin ngi siifa naŋ gar ar luvuŋ, ara lik haɗa haɗa, ara si bonoy, waɗ ara ji mevel.

¹⁷Ya na, gwat ya misina i mezle vur mbur na, n'ani: a zlir le ɓa a zum, a si, yo a titila ndum ngi slra naŋ, naŋ maga ar duniya misenna gar, ti hin ngi siifa naŋ, Buymisemuŋ muvulaŋ di na, asi mi nga naŋ i nah.

¹⁸Yo ma na, mbur gar, Buymisemuŋ mavulaŋ zlili ati gwat ngi lumoy, yo mavulaŋ gidaŋ ngi zum naŋ, ɓa a zuɓa mi nga naŋ, waɗ ɓa a mumul ti slra naŋ nah na, nah i gwat ngi vul ngi Buymisemuŋ.

¹⁹Asi mike na, naŋ anta sa wulka hin ngi siifa nah ta, asi Buymisemuŋ a vulaŋ gwat ngi si mevele le.