Read South Giziga ECC 6 Bible Online

ECC 6 - South Giziga bible

ECC 6

¹I pur gwat malambaˀ le ar duniya misenna ma, gwat malambaˀ mukuyta wãˀ vur mburo.

²I mbur, Buymisemuŋ muvulaŋ zlili le, gwat ngi lumoy ati dudoko, mbur misi gwat naŋ muwuɗ le gar na, anta kicaŋ ta, amma Buymisemuŋ a vulaŋ gidaŋ ngi zum naŋ ta, asi masa zuma i mbur mulak. Nah gar kwana, i ngatara lambaˀ, yo i gwat malambaˀ ngi ndurɓo hiri.

³Malla ta, i mbur miyi ziri mizilehey le skata, yo mizik le vi haɗa, amma ko tivi ngi siifa naŋ mihaɗa na gar kwana, a cifi ti cine ndumo ɗaˀ ta, yo zivi naŋ anta ma kini. I ɓi so na, ko zuŋ mipa ti pi kwana, a funa mbur nah le.

⁴Asi zuŋ mipa ti pi nah na, so naŋ ar duniya i ngataraŋ, ara ru ng'ar luvuŋ, waɗ ma na, luvuŋ a ro sirit ar slimiɗ naŋ vuna ma.

⁵A pura pasa keɗ le ta, yo a si na sin le ta ma, naŋ ara musuk vu, fineˀ mbur mekelem tuwa.

⁶Mbur numuŋ na, ko da a zik le zleˀe vi durmuk cuw tekeɗe kwana, a titila ndumo ɗaˀ ta. Na gwat gar na, aru ng'ar li mupurla takwa?

⁷Slra ngi mbur mira ga gar na, inga mi, ti nah gar na, a kiɗaŋ may ɗaˀ ta na si.

⁸Na zle, mbur misi sinmijileŋ a funa mbur gilawa ti mike? Yo mbur misi murga, magi gwat mezle a mihiri ngi mizli misi ti siifahaya, migir naŋ i mike?

⁹Zuwen gwat misi hiri mapura, a funa may gwata le, nah gar kwana, i ngatara lambaˀ, yo naŋ ka sipi himiɗ ngataraŋ.

¹⁰Gwat misi ada zleˀe si na, a cakaŋ slimiɗ le, mburo, i misina le, amma naŋ anta ngilam mi hiipassa ati migidaŋ fineˀ naŋ na ta.

¹¹Da mingiɓi a gi le koloŋ koloŋ haɗa na, a yo ɓi ka cunju ngatraŋ. Mburo, a lum migir mi ara ka?

¹²Mburo, angi naŋ misi ar siifa aruŋ, angi vi ngi zik naŋ mihaɗa ngatara lambaˀ, macuh ka himiɗ na, misina gwat muzuwen ava i waka? Mburo, gwat masa gi a dirba naŋ ar duniya misenna na, masa bigaŋ di i waka?