Read South Giziga ECC 7 Bible Online

ECC 7 - South Giziga bible

ECC 7

¹Slimiɗ mazil ti mezle na, a funa urdi mazĩˀĩ ndum haɗa le, hin ngi muco, a funa hin taŋ muyukuw na le.

²Ru ng'ar hay ngi vagaya, a funa ru ng'ar hay ngi muguzlumo le. Asi hay ngi vagaya, i kiɗa mi ngi mbur gar, anja mizli misi ti siifahay gar na, a sinaka kuy kuy a mevel taŋ.

³Ndurɓo hiri na, zuwen ar singire, asi ko da hiri i mundurɓo le tekeɗe kwana, mumul ada a mevele.

⁴Mevel ngi mizli misi sinmijileŋ jileŋheye, a ro taˀ ar hay vagay, amma mevel ngi gilawaya, a ro taˀ ar hay ngi muguzlum.

⁵Mbur misi sinmijileŋ mambuɗuw hirnga na, zuwen cinaŋ di, a funa vula vu ngi cine dimis ngi gilawaya le.

⁶Hadaw mandisl ar vu asi misirgaɗ na, singir ngi mbur gilawa, naŋ kanah ya. Amma nah gar na, i ngatara na si.

⁷Gidaŋ ngi guzuvura vu na, a tiri gilaw ti mbur misi sinmijileŋ, yo gwat ngi vul ngatara, a hiryaŋ ɓi mijeŋ misi a mevele.

⁸Kiɗa mi ngi gwat gar na, a funa ɗuva virzi ngi gwata le, yo ɓusa ɓi, a funa huhumo vu le.

⁹Anja ki wus vu ar wuluk ɗike ngi ji mevele ta, asi ji mevele, naŋ a mevel gilaway.

¹⁰Hin misi zleˀe, a funa hin misi dana le, a gi mbri mbrike na, ki cufuɗ kanah ta. Maguw ɓa ki cufuɗ kanah na, i sinmijileŋ ta.

¹¹Sinmijileŋ, i gwat mezle kaɓa zuma hay, mizli misi ti siifahay a ciram tisi sinmijileŋ.

¹²Asi mbur misi ti sinmijileŋ na, kite naŋ a susuɗuk, kaɓa mbur misi ti zlili, sinmijileŋ ara vula siifa da mizli misi ti naŋ na, vurˀe, naŋ kuy ngi si na gi gwata.

¹³Purukum slra ngi Buymisemuŋ: gwat Buymisemuŋ muguɓo le na, masa slikiɗa deŋ gu i waka?

¹⁴Ka mumul ti hin ngi cine ndumo, yo ti hin ngi bonoyo, wuluku: Mbur gar na, Buymisemuŋ a gaŋ ka naŋ miga mbur mekelem na ya, mburo, gwat masa gi ava tumbuŋ na, naŋ anta si na neˀ le ta.

¹⁵Ti hin ngi zik ɗu, misi i gwat mupuɗaw ta na, i pura gwataya le gar, mbur mijeŋŋe, i jeŋŋe naŋ vuna mazizaŋ, yo mbur misi moˀore, a ndir ti siifa tisi moˀore naŋ na.

¹⁶Anja ki ga jeŋŋe ɗike, hã fineˀ gidaŋ le ta, yo ki gi ka mbur misi sinmijileŋ fineˀ gidaŋ le ta. Ki ziza vu ɗike vur mike?

¹⁷Ki gi moˀore fineˀ gidaŋ ta, yo ki tiri gilaw ta. Ki muc daf le ar hin ngi muc ɗike vur mike?

¹⁸Mi ngi kuti mudumbuŋ ati mucuw naŋ na, naŋ kuy ɓa ki tiɓa taŋ cuw taŋ, ki pul purla le asi taŋ ta. Asi mbur mazluwun ti Buymisemuŋ na, a tiɓa taŋ cuw taŋ.

¹⁹Sinmijileŋ a tiri ti mbur misi sinmijileŋ gidaŋ haɗa, fineˀ buy miwi lihey kuruˀ misi angi walahay purla.

²⁰Vur a ruwuy aka na, mbur mindila le, naŋ jeŋŋe, a gi mezle, manja a gi mungra na, anta ko loŋ ta.

²¹Na zle, mingiɓi maɓaka gar na, ki jik slimiɗ aseˀe ta, kanah na, naɓa k'anta sa cine gawla ɗik mazuw na ta.

²²Asi ki si na le a mevel ɗike, ka vuna kwana, ki zi mizli mekelemey le is mbeˀ mbeˀ zleˀe ya.

²³Yi titila gi gwat tayna le gar ti sinmijileŋ, yi ɓi zleˀe: i sa tiri misi sinmijileŋ. Amma sinmijileŋ, naŋ kileŋ avu ya.

²⁴Gwat migi ar duniya gar na, a funa wuluk mburo le, yo ɓi nah jileŋ, hã jileŋ teˀe! Masla wala nah gu i waka?

²⁵Ya na, i vula mevel ɗu le taˀ wãˀ, ngi dubun jileŋ ati sli wala ngi gwat, ngi ɗumburo ɓi nah waɗ ngi sipa hirdam hirdam, yo ɓa ngi sina, gi moˀore i gi gilaw, gilaw muwãˀ naŋ.

²⁶Ngwas maji vu kaɓa ngamngam, mevele i mazaɓ, yo haŋ naŋ i zeweɗ ngi juwa mbur na, yi ra pura ɓi nah ndrehhe, naŋ ɗalak fineˀ muco, mbur macira hiri da Buymisemuŋ na, a lih avu ngwas nah gu, amma mbur migi mungra a pulaŋ vu mbak a jaŋ.

²⁷Ya mbur misi sinmijileŋ i ɓi ani, i pura gwataya le keɗ keɗ, vur mijingaˀ vur mijingaˀ, ɓa ngi sla wala taŋ.

²⁸Gwat misi membezleŋ ngi vu masipa hirdam hirdam, ɓa yi lum ta na, ani ma: a wuzla ziley durmuko, mbur mizile purla mindila le na, i lum le ɓula, amma a wuzla ngwasay durmuko, ngwas purla mindila le na, ko i lum ta.

²⁹Gwat ya mulum na, sey ani ɓula: Buymisemuŋ a ga mizli le, taŋ kaslsla, amma migaka ɓa gwat gar a gi tuwaˀ na, i mizli vuna.