Read South Giziga ECC 8 Bible Online

ECC 8 - South Giziga bible

ECC 8

¹Misi sinmijileŋ, yo masina pulaˀvra ngi mingiɓi ani na, i waka? «Mburo, sin naŋ mijileŋ na, a wunaŋ hiri, yo mihiri naŋ mabiga naŋ i mbur mukuwa na, a mbiɗi le.»

²Ya i ɓuw: Buy miɓa ɓi le ɗaˀ na, ja a hirngaŋ, asi i hudumom le a mbuŋ Buymisemuŋ.

³Ki wus vu ngi kirih kileŋ avu buyo ta, ki cici siɓaŋ siɓaŋ ar ɓi malambaˀa ta, asi gwat naŋ hĩhĩy le gar na, a ga gu.

⁴Asi mingiɓi ngi buyo naŋ ti dudoko. Maɓaŋ: «Ki gi mike» na, i waka?

⁵Mbur maja ɓimuɗuva a hirnga na, naŋ anta sa ci ar ɓi malambaˀa ta. Gwat gar na, naŋ ti pas naŋ, yo hin ngi kiita ada na, mbur misi sinmijileŋ a si na taŋ le a mevele.

⁶Naŋ kanah, gwat gar na, pas naŋ da, yo hin ngi kiita ada, amma hiryi madiɗa ada vur mburo.

⁷Gwat masa ndilo ava na, a si na ta, a sa ndilo tapas hana na, masa bigaŋ di i waka?

⁸Musuwun mavula siifa da mburo, mbur misi ti gidaŋ ngi kirih naŋ nga mbuŋ anta, hin ngi muco kwana, mbur anta ti gidaŋ anga ta ma, da vurum a zli le na, wer ngi lih ti raˀa anta, yo mbur misi moˀore na, moˀore naŋ anta lahaŋ gu ta.

⁹Nah gar na, yi wuluk le ara kuy kuy, ti ya mira pura slra mira cuh ar duniya misenna, mbur a cifi ti gidaŋ a hirnga mburo, hã a saŋ bonoy.

¹⁰Naŋ kine, madikam mizli misi moˀoreheye, yi pur le, mizli ara ram zle tir walahay mipala nga dik taŋ, yo a ram, a moko, amma gwat mizli vuna migaka zleˀe ar walahay nah na, mizli a puyukoko hirnga nah le puyuku. Nah kwana, yi pura na i ngatara lambaˀ.

¹¹Asi anta gaka kiita vur slra malambaˀa kutum ta tuwa na, mevel ngi mizli titiraˀahaya, i minaha le ti gi gwat malambaˀa da mizli.

¹²Mbur migi mungra, anja a ga mungra naŋ na makaw skata, yo ara kiraha hin ngi siifa naŋ nga mbuŋ gu, amma yi si na le, masa mumulomo, «i mizli mazluwunam ti Buymisemuŋ, vur t'ada ti zluwun a mihiri naŋ.

¹³Amma mumul anta sa gi vur mbur migi moˀore ta, yo hin ngi siifa naŋ anta sa muruɗ nga mbuŋ ta, a sa susuyum kaɓa susuɗuku, asi naŋ anta zluwun neˀ le a mihiri ngi Buymisemuŋ ta.»

¹⁴Gwat ada gi asi ruwuyo, i ngataraŋ: mizli mijeŋŋeheye, gwat ada ndilo avu taŋ, kaɓa mandilo avu mizli misi moˀorehey na ya, yo mizli misi moˀoreheye, gwat ada a ndilo avu taŋ, kaɓa mandilo avu mizli mijeŋŋehey na ya. Na zle yi ɓa le si, nah gar na i ngatara lambaˀ.

¹⁵Ya na, i ra duduɓa ɓi ngi mumulo, vur mike na, ar duniya misenna, gwat mezle vur mbur anta, sey zum ati si tewle, waɗ mumul. Asi ar hin ngi siifa naŋ, Buymisemuŋ muvulaŋ di ngi zik ar duniya misenna gar na, makisaŋ ar slra naŋ gar i nah.

¹⁶Ti ya muɗuva mevel ɗu taˀ ngi ndir ti sinmijileŋ, yo ngi pura gi welele haɗa, mbur magi di a ruwuyo na, ko da mbur anta lum hinje ta, duvuɗ ati papas vurˀe tekeɗe kwana,

¹⁷yi pura slra ngi Buymisemuŋ le gar. Slra magi ar duniya misenna gar na, mbur a si na gu ta, ko da mbur ara sipa gi naŋ hirdam hirdam kwana, a si na ta, yo da ko mbur misi sinmijileŋ ara ɓi a si na le tekeɗe na, naŋ anta si na gu ta.