Read South Giziga ECC 9 Bible Online

ECC 9 - South Giziga bible

ECC 9

¹Haˀaw, gwat ya mupura gar na, i wuluk le ara kuy kuy a mevel ɗu, amma yi luuma na: mizli mijeŋŋehey, mizli misi sinmijileŋ jileŋhey ati slra taŋhay magaka taŋ gar na, taŋ asi haŋ ngi Buymisemuŋ. Mizli a sa wuɗam vu malla a sa gam mesene gar na, a si na ka ta Nah gar i gwat masa gi tumbuŋ.

²Gwat masa gi avu mizli gar na, i gwat misi purla, masa gi avu mbur mijeŋŋe waɗ avu mbur misi moˀore, i gwat mupurla avu mbur mezle, avu mbur misi mevel mubuna le, avu mbur misi ti dili a mevele, avu mbur magi mikuli waɗ avu mbur magi mikuli ta, avu mbur mezle waɗ avu mbur migi mungra, avu mbur mahudum waɗ avu mbur mazluwun ngi hudumo gar na, i gwat mupurla.

³Gwat magi ar duniya misenna gar na, malambaˀ misi ara, i gwat mupurla magi avu mizli gar na. Yo ma na, mevel ngi mizli titirahay gar i minaha le ti gi malambaˀa, ti taŋ misi angi siifa na, mevel taŋ mbaf mbaf ti gi gwat ngi gilaway, a dirba nah na, sey ru ng'avu mumucahay a ruwuy.

⁴Asi mike na, mbur gar misi ti siifa na, zliv a njih hiri gu, ko kiri misi ti titiri kwana, naŋ puɗaw, a funa mobor mumuca le.

⁵Asi misi ti siifahay a sinaka le, a sa micam, amma mumucahay a sinam gwat neˀ ta, nga taŋ, kutuko migir taŋ anta mata, asi i mupuyuko hirnga taŋ le.

⁶Wuɗa vu taŋ, gi mesene taŋ ati gi suloŋ taŋ gar na, a zãˀãm le gar, gwat magi ar duniya misenna gar na, t'anta sa lumam mi nga taŋ anga neˀ le ta ndiɗaˀ wãˀ.

⁷Ka na, zum ɗaf ɗik ti mumul, si mbaazla ɗik ti mevel zuyyo asi Buymisemuŋ a pura slra ɗike le kuy si.

⁸Anja zana ɗikey a ndiram hetette ndrehhe, anja hirnga ɗik a ndir manja puya mal ta.

⁹Angi hin ngi siifa ɗik misi i gwat mupuɗaw ta na, anja hiri a cǝruw ti ngwas ɗik, ka mawuɗo, vur hin Buymisemuŋ muvuluw di ar duniya misenna, i hin mupuɗaw ta asi angi siifa ɗik, yo ar slra ka maga ar duniya misenna, mi ngi ɗik i nah.

¹⁰Gwat gar misi zliv haŋ ɗike wirwir ngi gi naŋ na, ga ti haŋ vu ɗike, asi slra ati slufa ɓi ngi slra ka miga, si na gi gwat malla sinmijileŋ gar na, anta ar li ngi mumucahay, ka masa ru ng'ara na ta.

¹¹Ar duniya misenna, gwat ya mapura ani ma, mafunam vu ti pi mi, i mizli miwirwirey haɗa cummo ta, malumam bugawla ar vurumo, i misi gidaŋhay cummo ta, malumam ɗaf ngi ngir ti naŋ na, i misi sinmijileŋ jileŋhey haɗa cummo ta, magam zlili i mizli misi lesley haɗa cummo ta, anta gaka mezle da misina gwatay haɗa cummo ta, asi pas mezle ati pas malambaˀa, a ndilo avu ko wa gar.

¹²Asi mike na, mbur a si na pas ngi mendere masa lumaŋ na ta, kaɓa kilif malla ɗiyuw majaka gurjik ti zuva. Yo mendere madungufa mizli titiraˀahaya, a so luuma taŋ gurjik kanah ya.

¹³Ar ɓi ngi sinmijileŋ ar duniya misenna, yi pura le ma, i gwat mupuɗaw a mihiri ɗu.

¹⁴Walahay meciɗek ada, mizli anta nga haɗa ta. Buy madiɗa ara luuma walahay nah tuwa, ndah hirnga naŋ gun, waɗ leˀ leˀ vigiɗ madiɗahay gun ɓa ngi wi vu ar taŋ.

¹⁵Dambalaka mbur ada ar walahay nah vuna, i mbur misi viya, yo i misi sinmijileŋ, a laha walahay nah ti sin naŋ mijileŋ tuwa, amma ko mbur muwuluk keŋ ar mbur misi viya nah anta.

¹⁶Dar yi ɓi a kwacay ɗu: sinmijileŋ i gwat mupuɗaw, fineˀ gidaŋ, amma a puraka sinmijileŋ ngi mbur misi viya hiris le ɓula, yo mbur macina mingiɓi naŋ anta.

¹⁷Mingiɓi ngi mbur misi sinmijileŋ maɓa ti sekke vu na, cin naŋ a funa buc ngi mbur miwi gilawaya le.

¹⁸Sinmijileŋ i gwat mupuɗaw fineˀ mota ngi vurumoyo, amma mi parawaya, a hiryi gwat mezle haɗa.