Read South Giziga SNG 3 Bible Online

SNG 3 - South Giziga bible

SNG 3

¹Kap ngi duvuɗ ar li hin ɗu na, i ru ti sipa mbur ngisi mevel ɗo, i sipa i sipa, amma ko i ji di hirnga ta.

²Wurenna, sey i slikiɗi, ɓa i bula walahaya bal bal gun, ar jiviɗ madiɗahay, ar li ngi lumahay, ɓa i sipa mbur ngisi mevel ɗo. I sipa i sipa, amma ko i ji di hirnga ta.

³Mizli mijigina lihey, mabulam ar walahaya, a jam ti ya hirnga, Jo i cufuɗa taŋ: «Mbur ngisi mevel ɗu na, ki jam di hirnga le kwa?»

⁴Ya mupula taŋ mbakka neˀ si na, i ji hirnga ti mbur ya mawuɗ tuwa. Ya mija ndap avu haŋ na, ko yi pulaŋ ta, hã i ci di ngi hay maha, nga viŋ mahayaw ɗu miyiy.

⁵«Kum diili Zeruzalemey, hadam ti slimiɗ ngi mangazaw malla muuni: wuɗa vu na, da naŋ miwa nga naŋ t'aruŋ na, ki slikiɗikiy di ta, ki puɗkikiy di ta.»

⁶Maso ti wuzlaɓuh mikirɗak kirɗak na i waka? Maso kaɓa musuure ngi cunju, a go urdi mir ati mukuturɓuy ngi zlum ti zlum, bik bik kaɓa urdi musoko di ti so ti ruwuy mulak na i waka?

⁷Puraka ɗi, arngawo naŋ kaɓa ngi Salomoŋ, mizli gambarahay kukur merkeɗ gun hirnga naŋ, i mizli gambara ngi wuzla Israyeley.

⁸Taŋ gar taŋ, maslalam kaw kaw, kaˀ kaˀ vu ngi gi vurum, mbur gar na, maslalam a ciki a ciki, ngi jigina vu taŋ avu mendere ngi duvuɗu.

⁹Buy Salomoŋ a ɓa mizli, a ɗiyakaŋ karawal ngi zuɓa buy: a ɗiyakaŋ di ti dum ngi ruwuy Libaŋ,

¹⁰A ɗiyakaŋ sar naŋhaya ti ɓiri bara, li nginisl naŋ ti ɓiri tapasl tapasl, li cifi naŋ ti gabaga gagaza ndezze, hur naŋ i diili Zeruzalemey miɗiyaka ti wuɗ ngir mevel taŋ wãˀ.

¹¹Kayya, kum diili ngir walahay hirnga, soko, singilaka buy Salomoŋ, muro hirnga tuwaɗ tuwaɗ ti loppol, mumuŋ mutuwuɗaŋ di, tapas naŋ mazuɓ ngwasa, tapas naŋ mumumul na.