Read South Giziga SNG 5 Bible Online

SNG 5 - South Giziga bible

SNG 5

¹Zil I co le ar jarne ɗu, sukum ɗu, haˀaw mangasl ɗu ngaya. I ra ga sifi ngi urdi mir ati urdi ɗu mihindirik hindirik. I ra zuma mamalama jom ti monjoftoloko. I ra sa mbaazla ati ɗuwa ɗu. Kum ngama ɗuwoy, zumam, kum mikiɗa may ɗuwoy, sam, wam ti mbaazla.

²I ra hinje zleˀe, amma i puɗuk le: i cine na, mikiɗa may ɗu ara kiɗo miviŋ. Wuniy miviŋ, sukum ɗu mongoso, yeme ɗu, ka goonok ɗu mifetek fetek. asi hirnga ɗu a ro ti wulngar, yo ti duvuɗo, ngwic hirnga ɗu yororo.

³«I cuko ɗeŋkece ɗu le zleˀe cok: na i sa ka mbri mbri a muŋ maka? I buna sar ɗu le zleˀe: na i sa jupa taŋ mbri mbri a muŋ maka?»

⁴Mikiɗa may ɗu a co haŋ tir li munjoŋ avu miviŋ, hã mevel ɗu a ɓuruk ngbir ngbir.

⁵Akẽh na, ya i slikiɗ pirtaˀ, i wuna miviŋ da mikiɗa may ɗu. Joˀ urdi mir a guco ti haŋ ɗu, yo urdi mir mikiler a ɓulo lelele ti vu muzuŋ haŋ ɗuwoyo ng'avi li ji haŋ ngi li zlira miviŋ.

⁶Joˀ ya i wuna miviŋ da mikiɗa may ɗu! Amma mikiɗa may ɗu tuwa, a mi, a cuh le. Ya i bi, i sipaŋ. I sipaŋ i sipaŋ, amma i ji di hirnga ta. I zilaŋ i zilaŋ, amma ko a ziliy mi ta.

⁷Mijigina lihey mabulaka walahaya, a jam ti ya hirnga, a kiɗikiy, hã a gikiy waˀa, mijigina lihey vuna, a tiɓaka godo ɗu misirit avu vu.

⁸Kum diili Zeruzalemey, ambuh ambuh kum: da ki jam hirnga le ti mikiɗa may ɗu na, kisa ɓakaŋ mbrike? Ɓakaŋ na, wuɗ a kiy jiji le ɓaˀ a ruwuy!

⁹Mbur mikiɗa may ɗik na, a funa mbur mekeleme ti mike? Kayya, ka kirɓaɓi ngi ngwasay gar! Mbur mikiɗa may ɗike, a funa mbur mekeleme ti mi, ɓa hã ki cufuɗa ndrakanah ka?

¹⁰Mikiɗa may ɗu, naŋ gagaza, yo naŋ ngilew ngilew, a sin a wuzla mizli durmuk kuruˀo.

¹¹Hirnga naŋ kaɓa ɓiri tapasl tapasl mileɗeɗe. Ngwic hirnga naŋ ndococco kaɓa mufuyuk ngi dibinoji, titira kaɓa magagak.

¹²Hiri naŋ sleɗeɗe ka gonok a mi yam, ara bun ar ɗuwa, a cifi le ar miviɗiviɗi ngi yam.

¹³Kwala naŋ kuy kaɓa li miɗiya ar jarne misi ti mufuyukoy ara mazãˀãm ndummo. Mi naŋ kaɓa matay mezle mafuyuk, urdi mir mikiler, a gico ti vaˀaŋ.

¹⁴Haŋ naŋhaya ka ɓalaŋ ngi ɓiri tapasl tapasl, miga ti ɗugur mu puɗaw tapasl tapasl. Kwacay naŋ i palalam ngi sliŋ ngi begene, misirta le ti ɗugur mupuɗaw ngil ngil.

¹⁵Sar naŋhaya, ka ɓamtal ngi ɗugur ɗoro, taˀ taˀ ar sar miɗiya ti ɓiri tapasl tapasl pal naŋ. Mihiri naŋ kaɓa muwã Libaŋ, naŋ wal kaɓa widis ngi miter.

¹⁶Mi ngi balam naŋ i mi ngi zuy, yo deŋ ngi vu naŋ vuna si na, ki hĩyã si. Kum diili Zeruzlemey, mikiɗa may ɗu, yeme ɗu na, naŋ kahana.