Read South Giziga SNG 8 Bible Online

SNG 8 - South Giziga bible

SNG 8

¹Ayyah! da ki sukum ɗu mizile zleˀe, yo da i maha muguluw ti ɗuwa ngi didak naŋ zleˀe gisiŋ na kuy! Da ya misa ji hirnga le ti ka avra na, i sa juw kuɓuy: amma ko mizli anta sa hirsikiy ta.

²I sa ru ti ka, i ci ti ka sesẽŋ a hay maha. Ki sa dubuniy gwata, i sa vuluw mbaazla mazĩˀĩ ndum, mbaazla ngi yi ngi hunduruk ɗu.

³Haŋ ɗik vay gula kulaˀ asi hirnga ɗu, yo haŋ vay hazumo kilaw ar ya.

⁴Kum diili Zeruzalemey, ambuh ambuh kum, wuɗa vu ɗu na, da naŋ miwa nga naŋ t'aruŋ na, ki slikiɗikiy di ta, ki puɗukikiy di ta.

⁵Ngwas maso ani a diga tir li papala, ginasl ti mikiɗa may naŋ na, i waka? I puɗuko ka asi widis mezle ngi zum ar li munuk miga hur ɗik ara, ar li munuk miyuw anga

⁶Ɗuviy taˀ a mevel ɗik, kaɓa gwat ngi ɗuvam haŋ ar gwata. ɗuviy taˀ ar hirbazla ɗike, kaɓa gwat ngi ɗuva haŋ ar gwat. Asi mike na, wuɗa vu, naŋ gidaŋ haɗa kaɓa mucu, yo suloŋ, naŋ kutuɗak kaɓa li cifi ngi mizli mumucahay, a wur vu kaɓa irne vu mihilɓiɓ, kaɓa vuŋ mapi sar.

⁷Yam ngir mubuliye gar, a muca wuɗa vu gu ta, yo mizaw madiɗahay a ndakaŋ gu ta. Mburo, lum ngi hay naŋ gar, da ko a vula le ar deɗe ngi wuɗa vu tekeɗe kwana, mizli a sa purakaŋ hiris le na si.

⁸Ndrˀada ti sukum ndra mongoso, i meciɗeke, a bo ti ɗuwa t'aruŋ. Tapas da ara ɓaka ɓi ngi vul naŋ da zile na, i sa gaka sukum ndra mongoso nah mbrike?

⁹Da naŋ solok ka mohol zleˀe na, i sa ndiram hay ngi ɓiri bara a hirnga naŋ. Da naŋ kaɓa mizlingre zleˀe na, i sa gicakaŋ kiɗasl ti palalam ngi dum ngi miter.

¹⁰Ya solok ka mohol, yo ɗuwa ɗu naŋ kaɓa hay musuburoy gisiŋ. Dar yi ndir a mihiri mangasl ɗu, kaɓa ngwas maso ti zuy.

¹¹Salomoŋ naŋ da ti guva ngi gudubun a Baˀal-Hamoŋ. A vula guva tuwa da mizli ɓa a jiginakaŋ. Mbur gar na, sey a lumo suloy gabal purla ti yi ngi gudubun tuwa.

¹²Guva ngi gudubun inga ya ɗu. Ka Salomoŋ, suloy gabal purla na, da ka, amma suloy skat cuwo ani, da mijigina guvahay.

¹³Yeme ɗu, ka mua wuzla jarne na, ngama ɗuwoy ara wuɗam cine ˀay ɗike, ɓi ti ˀay paɗ a muŋ ɓa i cina.

¹⁴Mikiɗa may ɗu, kil le, kil kutum kaɓa mangazaw malla zinga ngi muuni, a muwã misi kalafay mazĩˀam dummo.