Read South Giziga Sin Ji 1 Bible Online

Sin Ji 1 - South Giziga bible

Sin Ji 1

¹Kum mizli miwi ruwuyoy, wuɗam gi gwat mijeŋŋe, wulukam wuluk misi ti jiviɗ naŋ ɗalla vur Bumbulvuŋ, sipaka Buymisemuŋ ti mevel purla.

²Asi mike na, Buymisemuŋ a pula vu naŋ da mizli macam a kwacay naŋ ta, a lumakaŋ, mbur matuɓaŋ manja sli hima na, a bugaŋ vu.

³Wuluk mikasl ta na, a guhu gwah avi Buymisemuŋ avra, yo mbur gilaw maci a kwacay naŋ na, gidaŋ naŋ a taˀaŋ mi lek.

⁴Sin mijileŋ anta ci ar mevel ngi mbur misi wuluk malambaˀa ta, mbur misi mungra a funaŋ gidaŋ le na, n’anta ndir ar naŋ ta.

⁵Asi ˀUf ngi Buymisemuŋ madubuna gwat da mizli na, a kil kileŋ avi tikina vu, a kirih avi mizli misi wuluk ngi gilawaya, a hirsa mbur magi gwat mijeŋ ta.

⁶Sin mijileŋ, naŋ ti wuluk mezleŋ vur mizli, yo mbur magi mbaɗa ar Buymisemuŋ na, anta pula mbak kine, manja a kutaŋ ti bonoyo ta, asi Buymisemuŋ a ga sedewo ngi gwat ngir mevel naŋ gu, a sina ɓi mikaslsla ngir mevel naŋ le, yo a ra cina ɓi naŋ maɓa gar.

⁷Haˀaw, ˀUf ngi Bumbulvuŋ a naha ruwuyo le, si gazlavay kurzluˀ gar misi asi haŋ naŋ tuwa na, mbur muwuna mi le gar na, a sina le.

⁸Mbur maɓi mi ngi sliŋ gar na, anta cuh manja a sina ta, yo n’anta sa ngir avi kiita ngi kuti ti bonoyo ta.

⁹Buymisemuŋ a saka virzi ngi wuluk ngi mizli mizirɗa miheye, mingiɓi taŋ maɓaka na, a sa ndil seŋseŋ avi Bumbulvuŋ, masa buga malambaˀ taŋ, i nah.

¹⁰Buymisemuŋ a ro slimiɗ jakka, a ra cina ɓiheye gar, ko maɓaka yaŋŋa nga slimiɗ mbur kwana, a sina le.

¹¹Jam lesl avi mingiɓi misi ti ruwuy ti ruwuy, mapul gir da mbur ta na, da ki wuɗam cikislaɓi ta na, gicaka me kap, asi ɓi miɓa yaŋ yaŋ na, anta ndir teˀ manja gwat naŋ a gi ta, yo mbur maji ɓi da mizli na, a kiɗa mbur nah vuna vagay.

¹²Ki gam lambaˀ lambaˀ ngi luma muc ta, ki gam gwat ngi ziza hutuŋ kum ti haŋ kumo ta.

¹³Anja ki sinaka sin le, miga muco i Buymisemuŋ ta, da mizli titirahay a ra mucam na, anta ciraŋ hiri ta.

¹⁴Asi a ga gwatay gar ɓa a ndiram ti siifa. Gwat naŋ miga ar duniya gar na, i ngi laha siifa, muwuŋ ngi kiɗa mbur vagay anta anga ta, yo muco, gidaŋ nga naŋ, naŋ a ruwuy ta.

¹⁵Asi gi jeŋŋe i gwat mamuc ta.

¹⁶Amma mizirɗa mihey a zilaka muco, a vurkakaŋ ti vuruk waɗ a zilakaŋ zile ma. A purakakaɓa ngama taŋ, a wuɗam haɗa wãˀ, joˀ a jumomˀay ati naŋ. Na a ndilaka le ɓa a ndiram da naŋ gisiŋ.