Read South Giziga Sin Ji 10 Bible Online

Sin Ji 10 - South Giziga bible

Sin Ji 10

¹Buymisemuŋ a ga mbur mudumbuŋ, cine ngi duniya, kpesl pal naŋ, i sin mijileŋ majigina kuy kuy. A dirba naŋ migi mungra tahaŋ naŋ na, sin mijileŋ a tuɓaŋ hirnga amuŋ,

²dar a vulaŋ gidaŋ ngi wa gwatay gar.

³Amma mbur malambaˀ, misi moˀore, a mbiɗi duba avi sin mijileŋ ngi Buymisemuŋ, a ziza hirnga naŋ tahaŋ naŋ tehhe, a kiɗa sukum naŋ vagay.

⁴Mekepel misirta ruwuy ngbulum na, asi malambaˀ ngi mburu, na misa lahaŋ kwana, i sin mijileŋ vuna ma. A laha mbur mijeŋŋe ti palalam ngi yam miɗiya ti dum ngataraŋ.

⁵Yo sukwi ngi mizli mujumom ˀay ngi gi mungra, a zliɗa taŋ lesle, a cinam mi ngi mbur maɓi mata. Na, i sin mijileŋ misina mbur mijeŋŋe vuna, a wi di vu, ko gwat ngi mbiɗaŋ hirnga aseˀe, a mbuŋ Buymisemuŋ anta avaŋ ta, Buymisemuŋ a ga ɓa a lum gidaŋ didal hirnga ngi wuɗavu, naŋ mawuɗ di mangal naŋ na.

⁶Naŋ kanah ma, sin mijileŋ a laha mbur mijeŋŋe le tir vu mazlizlira walahayay zlum, joˀ mizirɗa mi ngi Buymisemuŋhoy a ngizlam kap.

⁷Gwat moˀore taŋ muluma taŋ di na, n’ada hã dana aruŋ: Hirwuy taŋ ndrehhe i moˀoloŋ, a ngis junju deŋ, widiseye a yam ɓula, amma anta naham ta, waɗ foto mindira ti mandaŋ, ngi wuluk keŋ ar ngwas misi hirnga gidaŋ.

⁸Mizli mikiraham kileŋ avi sin mijileŋ na, a sinaka gi mezle gu ta, i nah tew ta ma, a pulam gwat masa buga bi hirnga taŋ na da ziri taŋhay nga mbuŋ. Vurˀe, malambaˀ taŋ migaka na, anta sa puyukom di hirnga ta wãˀ.

⁹Amma sin mijileŋ a loho gawla naŋhaya le tir bonoyo.

¹⁰Mbur mijjeŋŋe makil, asi sukum naŋ i misi moˀore na, sin mijileŋ a ru di ng’ar jiviɗ mezleŋ, a bugaŋ zuma buy ngi Buymisemuŋ, yo a vulaŋ sina gwat mipalay. Sin mijileŋ a jinaŋ ar slra naŋ magiraŋ na, joˀ a sikaŋ gwat ngi migam naŋ ma.

¹¹A tuɓo di avi misi may zlilihey mawuɗam ɓa a zumakaŋ gwataya, joˀ a gaŋ zlili.

¹²A jiginaŋ avi mesene naŋhaya, yo mizli mangakaŋ diɓel na, a cik vu a hirnga naŋ. A jinaŋ le ar kiɗa vu mukuyta wãˀa, ɓa a sina, sipa jiviɗ ngi Buymisemuŋ naŋ ti gidaŋ fineˀ gwat gar.

¹³N’anta pula mbur mijeŋŋe mihiɗikaka le ng’ar beke ta ma, amma a tuɓo di avu mungra.

¹⁴A pam sar cuwa ng’ar vigiɗe, yo taŋ mikaka ng’ar dangay na kwana, a pulaŋ ta na si. Amma a vulaŋ gidaŋ ngi buy, yo mizli migakaŋ bonoy zleˀe na, a wa taŋ le. Akẽh na, a buga le, mizli mijakaŋ ɓi tuwa, i misi slirey, dar sin mijileŋ a vulaŋ dudok mapiɗ mi ta.

¹⁵Sukwi mipal , sukwi manja meslefe, sin mijileŋ a lahaŋ tisi haŋ ngi mizli maguzuvuraka taŋ.

¹⁶Sin mijileŋ a ci kulaˀ a mevel gawla ngi Bumbulvuŋ, a cici kaŋ kaŋ avi buy migi zluwun da mizli ti gi gwat migam daˀ tahay ati gwat mabigi gwat mekelemey.

¹⁷A wurka migir ngi mizli mipalaya , a bi ti taŋ tir jiviɗ ngi zuma hirnga, ti papasa, a ga taŋ nsusuɗuku, yo ti duvuɗo, a ciɗika taŋ ciɗak ciɗak ti wurzlaŋ.

¹⁸A tuwuɗ ti taŋ mizaw gaza, ti sar njiraŋ njiraŋ, a ngir ti taŋ ŋkaak tir yam mifin fin.

¹⁹Amma yam a nda mesene taŋhaya, a dirba nah, yam a vuruɗ fuyõh fuyõh, a vunoho taŋ tir mijileŋ ngi yama nga ˀay didiki.

²⁰Akẽh so na, mizli mijeŋŋehey a tuɓaka gwat ngi mizli mizirɗa mi ngi Buymisemuŋhoyo. A zlaka a zlam dimis ti zila slimiɗ mipal wãˀ, ngi ɗik Bumbulvuŋ, joˀ a gukuw sise vur ka micik vu ar taŋ ti gidaŋ ɗik na.

²¹Asi sin mijileŋ, a wuna mi ngi mbur maɓi gu ta le, yo a puska irne ngi ziri gazahaya le, ɓa a ɓam calalala.