Read South Giziga Sin Ji 11 Bible Online

Sin Ji 11 - South Giziga bible

Sin Ji 11

¹Sin mijileŋ, a ga ɓa gwat Israyeley magaka gar na, a gi kasl kasl, mbele mijiviɗ mipal ngi Buymisemuŋ

²A ngiraka wuzla ɓuh mikirɗak kirɗak manja haya ŋkaak, joˀ a ɗiyaka guɗuk taŋhay ar li misi mbur a ɗuv sar daˀ adiga ta.

³A mburom mbor avi mesene taŋhaya, a ɓulaka mizli mazliram ti taŋ tahaya.

⁴Madalyam a ga bonoy da Israyeleye, joˀ a zuluku ka Buymisemuŋ, dar muwã mesengel a vula taŋ yama, mandazlay muwã a kiɗa taŋ madalyama.

⁵Naŋ kine, gwatay migaka bonoy da mesene taŋhay tuwa, a tiri avi taŋ, i gi mezle ar bonoy taŋ.

⁶Mizli mupulaka jiviɗ ngi kiɗa ziri gazahay vagay vagay na, yam maɓul vilvil a mizawa, ki lahaɗa taŋ di ti pumbus mizaˀã waɗ ndileɓe. Israyeley a ɓam daˀ a sa lumam yam na, a ɓam ta, amma ki vula taŋ yam mifinfin.

⁸Akẽh, madalyam mawuɗ a kiɗa taŋ muduba na, ki buga taŋ, ka miga bonoy da mizli mazliram ti taŋ tahaya.

⁹Naŋ kine, bonoy nah na, ko da ki kuta taŋ jom ti pura ircece tekeɗe kwana, a sinaka le muduba, da ki ji mevel le ngi kuta mizirɗa miheye na, kay, i bonoy mukuyta wãˀ.

¹⁰Mizli ɗikeye, ki ci a kwacay taŋ, kaɓa cine maɓa ziri naŋhay daˀ daˀ le, amma mizli mekelemeye, ki cufuɗa taŋ ɓa a slufukuw ɓi taŋ, kaɓa buy mihimaˀ, manja ircece, maji mbur ti kiita.

¹¹Mesene taŋhaya, ko da taŋ gweˀ malla taŋ kileŋ kwana, a sam bonoy misi purla.

¹²A gam bonoy le makaw cuw, ti taŋ maniˀicam ar li wuluka gwat mucohomoy na.

¹³Mesene taŋhay a puraka na, bonoy migam avi taŋ tuwa, a tiram gi mezle le avi Israyeleye na, a sinaka le Bumbulvuŋ n’ada ati taŋ muduba.

¹⁴Mbur taŋ mihizigaka avra ti zlezle, yo a singiram a ra tuwa na, ar kiɗami naŋ, a zuma taŋ hirnga teˀe, asi bonoy taŋ misaka ti madalyam na, i misi purla ati ngi mizli mijeŋŋeheye ta.

¹⁵Mizli mijeŋ ta tayna, a boko ti wuluk ngi gilaway tir mevel taŋ mijeŋ ta tuwa, hã a hizigiɗa taŋ nga dilik a mbuŋ gwat manja lesl, muru ti kwacayay ati gwat misãmi lambaˀhay, ɓa ngi kuti taŋ na, ki slino taŋ gwat misãmi manja lesleywenewene.

¹⁶Ki ga kanah, ɓa a sinaka, da ki gi di gwat malambaˀ wanaka gar na, a kutukuw ti nah tehhe muŋ ya.

¹⁷Haŋ ɗik misi gidaŋ haɗi na, a gi ngaˀa daˀ ta, ki ga duniya le ti nah, ti gwat paɗ lambaˀ, da ki wuɗ le zleˀe na, anja ani ki slino taŋ ti luˀufoy malla mabor miji vuhoy le kwesle kwesle,

¹⁸malla gwat misãmi manja sinay ka maga taŋ hĩˀĩ, misi mevel fõh fõh, mavunohoko vu ti kwacaya, malla magoko cunju misi muwuŋ tirslik, malla ta ma na, wucuɗ ngi vuŋ magi zluwun, mabo ti ngi hiri taŋhaya.

¹⁹Gwat misãmi tayna, anja zle a ngizlaka taŋ kraw ar li purla gu ngbaŋ, amma cum a kiɗaka taŋ ti kiɗ ta, deŋ taŋ vuna si na, zluwun naŋ a kiɗa mizli sunok sunoko si.

²⁰Na zle, ko da ki go malyam taynna vuna ta kwana, ki ˀufo taŋ musuwun ngi balam ɗike le ˀuf purla si na, ki zlumbura taŋ sunook, ki slino ti gi jeŋŋe ɗiki, joˀ ki fuca taŋ feec ti musuwun migidaŋ ngi balam ɗik na. Amma ki ɗiya gwataya gar ti sila sila: taˀ taŋ waɗ dudok taŋ.

²¹Gidaŋ ɗik mihaɗa na, n’ada avi ka ndrehhe, ka gidaŋ haɗi, mbur macici a mbuŋ ɗike gu ada kwa?

²²Haˀaw, duniya naŋ a mbuŋ ɗike, naŋ kaɓa gwat meciɗek miɓaˀ ar kilo, maga kilo jangaw, mallakaɓa wulngar misi ti miprik, magic tes nga ruwuy.

²³Amma ka maga gwat gar gu tuwa na, ki pur ircece da mbur gar, ki tiɗa hiri, ɓa ki pura mungra ngi mizli ta, ɓa mizli a zilam marava.

²⁴Ki wuɗ gwat misi titiriheye ceke, yo gwat ka miga taŋ na, ko k’anta hiris lon le asi taŋ ta. Da k’ada ki hiris gwat zleˀe na, anja ani ki ga gwat nah zleˀe ta.

²⁵Da ki wuɗ ɓa gwata n’ada ta na, a ndir n’ada mbri mbrike? Da ki wi di vu zleˀe ta si na, n’ada mbri mbrike?

²⁶Buy mawuɗ siifa, ki ra wi vu ti gwatay gar, asi gwat gar i ngi ɗiki.