Read South Giziga Sin Ji 12 Bible Online

Sin Ji 12 - South Giziga bible

Sin Ji 12

¹Naŋ kine, musuwun ɗik mamuc pam le ta na, n’ada a hur mizli gar. s Buymisemuŋ a ga bonoy da Kanaˀanhaya sekke vu

²Mizli migam gwat le na, ki ga taŋ bonoy neˀneˀe, ki ɓa taŋ daˀ daˀ le, ki mataŋ hiri ngi mungra taŋ migaka, ɓa a pulaka mungra, ɓa a tuɓukuw ka Bumbulvuŋ.

³Ki gakahana da mizli micawwahay misi asi ruwuy mipala.

⁴Ki hirsa taŋ le, asi gi gwat taŋ malambaˀ na: a gam cucuk ati mezegwel ngi zirɗa mi ngi Buymisemuŋ.

⁵A guzuvuraka ziri, joˀ a kiɗaka taŋ vagay vagay, a dam ɗaf ngi muguzlum ti useˀ ngi mizli, ti pumbuso waɗ hur kwacaya gar. Mizli tayna, a lumaka taŋ le kasl ar li gi gwat ngi sirik taŋ, taŋ muroko ti may ngi gi naŋ haɗa haɗa na.

⁶Miyihey makiɗaka ziri taŋ manja gidaŋhay na, ki wuɗ le ɓa ki ngizla taŋ kap tisi haŋ ngi dideˀ ndra haya,

⁷ɓa a ruwuy ka mihĩya haɗi fineˀ haɗi mekelemmey gar na, a cifi ziri ngi ɗik ka Buymisemuŋ, ziri mindilaka le ngi cifi ara.

⁸Na dambalaka ko taŋ vuna kwana, ki wi taŋ vu le, asi taŋ i mizli vuna ya. Ki slin ti mengeveley a mbuŋ soje ɗikeye, ɓa a ngizlaka taŋ sey sek vu sek vu.

⁹Da ki wuɗ le na, ki vula mizirɗa mihey asi haŋ ngi mizli jeŋŋeheye gu gisiŋ, malla ta, ki ngizla taŋ ti gwat misãmi miji vuhoy, malla ki ɓi daˀ manja ircece tewle.

¹⁰Amma ka maga kiita ɗike sek vu sek vu na, ki pul di jiviɗ da mizli ngi zila ma ravaŋ. Na kpak taŋ i malambaˀhay, cak taŋ i misi moˀorehey, ko t’anta sa mbiɗaka mevele ta na, ki sina vuna le ngbaŋ.

¹¹Asi diga ar ɗuva virzi naŋ vuna si na, taŋ i minisahay. Ka miga taŋ bonoy asi mungra taŋhay ta na, anta asi ki ra zluwun ti mbur ta.

¹²Mbur masa zli ɓi ngi ɓuw: Ki gi hana i gwat mike na, ada kwa? Mbur masa tukuw ngi gi kiita, ada kwa? Mizli titirahay ka miga taŋ tahaŋ ɗik ma na, da ki ngizla taŋ le na, mbur masa widi ti ka i wa maka? Mbur migi malambaˀ le ma na, masa zli ɓi ngi ra jina is aseˀe ar kiita i waka?

¹³Buymisemuŋ maki slimiɗ ar gwat gar, mabuga da mizli, kiita ɗike i kiita mijeŋŋe, mbak ka le na, mekelem anta.

¹⁴Ko buy, ko buy madiɗa macici zlak gu avi ka, ngi cika vu a hirnga mizli ka maga taŋ bonoy na, anta.

¹⁵Bumbulvuŋ, ka jeŋŋe, ka majigina ruwuyo jeŋ jeŋ na aseˀe. Mbur migi gwat ta, ji naŋ ti kiita na, ki pura a jam haŋ ati gidaŋ ɗike ta.

¹⁶Asi gi kiita ɗike, a bo tivi gidaŋ ɗiki, ka buy ngi gwatay gar tuwa na, maga ɓa ki ga mezle da gwatay gar na i nah.

¹⁷Da mbur a ro ti wuluk cuw cuw vur gidaŋ ɗik mihaɗa wãˀ na, ki bugaŋ di. Mbur misina gidaŋ ɗik le, amma a ra huhumo vu naŋ na, ki taˀaŋ mi lek.

¹⁸Amma ka, ki wa gidaŋ ɗike le, ki ga ndra kiita weˀe, ki wa ndra ti mi teˀ teˀe. Da ki wuɗ gi gwata le na, ki gaŋ, asi gidaŋ naŋ naŋ avi ka.

¹⁹Ka magakanah na, ki ra dubuna da mizli ɗikeye: mbur mijeŋŋe sey a cifi ngama ngi mizli titirahay. Ki ra naha mizli ɗikey ti sina ɓi, asi ka mapula jiviɗ da mizli ngi zila ma ravaŋ vur mungra taŋhay na.

²⁰Mesene ngi ziri ɗikeye, a ndilaka le ngi kiɗ vagay vagaya, na ki kuta taŋ jom ɓus, ki pula taŋ hã a zikam, ki jina taŋ ɓa a pulaka gi malambaˀa.

²¹Amma ziri ɗikey vuna na, ki ga taŋ kiita ti ji lesl kuy kiuy wãˀ ma. Ki jumˀay le ati dideˀ taŋhaya, ki ɓa taŋ daˀ daˀ le, ki sa ga taŋ mezle haɗi.

²²Naŋ kine, ɓa ki dubuna ndra gwat na, ki sliɗa mesene ndrahaya weˀe, ɓa da i ra gam kiita na, i wulukam keŋ ar gi mezle ɗiki, yo da ki ra ga ndra kiita na, i njaham hiri asi ircece ɗiki.

²³Mizli mibi hirngahay magam gwat mijeŋ ar siifa taŋ ta na, ki ga taŋ bonoy ti gwat mukuyta wãˀ taŋ madilkam a mbuŋ naŋ vuna tehhe.

²⁴Naŋ kine, a zizam le zleˀe kiŋkiŋ lambaˀ, gwat miŋsaami ngata ra lambaˀ, mihiris le miwãˀ naŋ na, a puraka taŋ kaɓa i gwat ngi dilik a mbuŋ naŋhay, a pulaka vu taŋ mbak a tikinaka taŋ kaɓa ziri memeɗe manja lesley.

²⁵Dar ki slino taŋ ti bonoy kaɓa da ziri memeɗe manja lesley, joˀ ki singir ar taŋ.

²⁶Amma mizli mislaka wala ngi kuti miweˀe hana ta na, a sa lumam kiita mindila le ngi Buymisemuŋ.

²⁷Gwat miŋsaamihey magaka taŋ bonoy na, a ra zizaka taŋ ti vendeke, mekelemey taŋ mapuraka taŋ kaɓa gwat ngi dilik a mbuŋ naŋhay tuwa, a puraka na, a ra kutaka taŋ ti bonoy, akẽh na,a sinaka muduba so, Buymisemuŋ taŋ mungumam sin naŋ zleˀe ta tuwa, Buymisemuŋ migisiŋ gisiŋ i naŋ so. Vurˀe bonoy mukuy ta wãˀ a pi sar ar taŋ.