Read South Giziga Sin Ji 13 Bible Online

Sin Ji 13 - South Giziga bible

Sin Ji 13

¹Dilik a mbuŋ gwat ngir duniya Mizli tayna gar masinaka Buymisemuŋ ta na, i manja lesley muwãˀ naŋ. A ra puraka gwat mezlehey vuna ti hiri taŋ ngbaŋ, ko a ndilaka ngi sina mbur ‹misi ada› na ta, a ra puraka slra naŋhaya ngbaŋ, ko a sinaka mbur miɗiyi taŋ vuna ta.

²Amma ar deɗe ngi Bumbulvuŋ taŋ ma na, a dilikam nga taŋ a mbuŋ vu, burkataŋ, himiɗi, wurzlaŋhay, yam maɓul ar gidaŋ, pas waɗ kiya jak ma.

³Kuy ngi gwat tayna, a tikina taŋ le, taŋ mapuraka taŋ kaɓa gwat ngi dilik a mbuŋ naŋhay na aseˀe. Anja a sinaka sin le, Buy migi gwat tayna vuna, a funa taŋ le haɗi. Asi mbur migi taŋ vuna, gwat mukuy gar a bo tivaŋ

⁴Gidaŋ ngi gwat tayna, ati gwat taŋ magaka, da a zuma taŋ hirnga le na, anja a sinaka avaŋ so, mbur migi taŋ a funa taŋ le haɗi ti gidaŋ.

⁵Asi gwat madiɗahay, yo mukuyoy, Buymisemuŋ a miga taŋ, da i ra puraka taŋ na, i wulukakaŋ avaŋ, joˀ i singilakaŋ ngirimme.

⁶Na so na, mizli tayna, a wuɗam guco mi neˀe: a sin ta, taŋ mazizam na, ar jiviɗ ngi sipa Buymisemuŋ, a wuɗam sey ɓa a lumaka kwani.

⁷Taŋ na guzluv awuzla gwat Buymisemuŋ miga taŋ vuna, yo gwat taŋ mapuraka taŋ ar duniya na, taŋ kuy haɗi, matikinaka taŋ na, i taŋ!

⁸Na zle gar ti nah kwana, i mizli ngi pul taŋ mbak kine wãˀ ta

⁹Da a tiram le misina gwatay haɗi, ɓa hã a dubunaka gwat miyaŋ ngir duniya na, na a sa gi mbri mbri, ɓa a sinaka buy migi taŋ zleˀe taka?

¹⁰Mizli maɗuvaka wuluk taŋ taˀ ar gwat manja siifahay na, taŋ ar bonoy. Gwat mizli miɗiyaka taŋ ma na, a zilaka taŋ gwat ngi dilik a mbuŋ naŋhay: gwat miɗiya kuy kuy ti ɓiri hirnga, ti ɓiri bara, gwat miŋsaami ɗiyeˀ ɗiyeˀ deŋ, malla ɗugur miɓaˀ lambaˀ mbur mihirka diga zlezle.

¹¹Malla ta ma na, mbur munguma dum, a ngum dum le ngi jijir tuwaˀ ta, a pusluɗa dubaˀ naŋ njazl ti jiviɗ naŋ, a gi di ka naŋ mawuɗu, joˀ a ɗiyi di sikiɗ magam di slra vur hin gar.

¹²Is ngi dum mandire, a ɗiyi di vu ngi di ɗafa, joˀ a zum hã a mbi ndeŋ ndeŋ.

¹³Amma asi is ngi dumoy tuwa, mekelemey ngi pula gir tahay ada, asi taŋ guduɗoŋ, hiri avi taŋ haɗi, a hila tayna, a ciɗa ngi gi dungur, a ciɗa kuy kuy ar li musuka vu naŋ, a ciɗa deŋ ka mburu,

¹⁴malla a ciɗ di gwat misãmi muho lambaˀ, a kuroŋ ɓerem, a tiri gagaza surum wãˀ, jom ti li mizlip zlipeye.

¹⁵A dirba nah, a ɗiyaŋ li mijam haŋ le, joˀ a luwa avi dalam kap ti ponti.

¹⁶A dira gidaŋ gidaŋ vur naŋ madiɗi, asi a sina le, naŋ tahaŋ naŋ na, n’anta sa cici gu ta, asi i foto ngi gwat, sey gwat ngi jih n’ada.

¹⁷Amma dda naŋ mira dir dibiɗ ɓa a lum zlili, a zuɓ ngwasa, a lum ziri na, mesem anta gaŋ ngi ɓa ɓi da gwat mingbimme, manja siifa hana vu na ta si. A cufuɗ jam ngi vu avi gwat manja gidaŋ.

¹⁸Siifa ma na, a cufuɗa avi gwat mumuca le. Ɓa ngi cik vu a hirnga naŋ na, a tumbul gwat majini vu ko neˀ gu ta. Ɓa ngi zuɓa mulaka, a njih hiri asi gwat mazuɓa sar ko taˀ purla gu ta.

¹⁹Yo ɓa ngi ngir ar siifa naŋ, ngi gi gwat naŋhay waɗ ɓa slra naŋ a gi kuy kuy na, a cufuɗ gidaŋ avi gwat manja gidaŋ.