Read South Giziga Sin Ji 14 Bible Online

Sin Ji 14 - South Giziga bible

Sin Ji 14

¹Mbur mekelem a juw vu ngi ci palalam, ngi zuɓa mulak ar mubuliy magi zluwun, joˀ a zil slimiɗ ngi dum muɓuroˀ ɓuroˀ lambaˀa, zuwen palalam majijiraŋ vuna, naŋ gidaŋ, a funa dum muɓuroˀɓuroˀ vuna le.

²Asi mbur miɗiya palalama, a ɗiya ngi luma gwata, yo a ɗiya kwana ti sin mijileŋ ngi miɗiya gwatay.

³Aw Baha ɗu, i gi mezle ɗik makukuro palalama: ki ɗiyaŋ jiviɗ le ar mubuliye, ki baˀaŋ li baˀ baˀ ar yam mijileŋ.

⁴Ar nah na, ki buga da mizli, ki laha mburo avi ko mendere wanaka gar, ko da mbur a sin gwat neˀ ta kwana, a zuɓ mulak ar mubuliye.

⁵Ki wuɗ ɓa gwat ɗikey ka miga taŋ ti sin ɗik mijileŋ na, a ndiram manja hilfa ta. Vurˀe, mizli a pulaka vu taŋ da dum ngata ra lambaˀ, gar ti nah kwana, a tuwuɗaka mubuliy mangi diɓele, jojoˀ ar palalam, ko gwat a ga taŋ petetesl ta.

⁶Naŋ kine, zle ar ɗuva virzi naŋ, mingizlaka mizli jejeke muhuhumo vuhoy na, mizli, mizli muroko hiri taˀ asi taŋ na, a laham ti palalam ngi yam, makukuro taŋ di i ka vuna, joˀ a ndiram ngi hilfa nga mbuŋ.

⁷Dum mitiri le i ngi gi gwat mijeŋŋe na, i dum muɗuwula mi le!

⁸Amma kuli dum miciɗa na, i minisa le jom ati buy naŋ, buy naŋ i minisa asi i naŋ miciɗa, yo dum vuna kwana, asi gwat maziˀĩ ma na, a cakaŋ slimiɗ ‹bumbulvuŋ› na,

⁹Buymisemuŋ a hirsa mbur mizirɗaŋ mi jom ti gwat ngi gi naŋ,

¹⁰yo a sa ga bonoy da gwat miciɗa waɗ mbur miciɗ naŋ.

¹¹Haˀaw, Buymisemuŋ a sa ga bonoy da gwat miciɗa ngi sukwi ngi mizli, asi a tiram le i gwat mukuy tahay wãˀ, awuzla gwat Buymisemuŋ miga taŋ, yo i gwat ngi bi sar da mizli, i kwar ngi ji gilaway.

¹²Ciɗa gwatay na, i gi teŋteŋ avi Buymisemuŋ ta, mubo ti wuluk naŋ i nah, taŋ muboko ti ɓi ngi ciɗa gwat put na, a hirya siifa ngi mizli le.

¹³Anta zle ar ɗuva virzi naŋ ta ngbaŋ, yo i gwat masa ndir ngi caˀ ta.

¹⁴Gwat miciɗahay a coko ar duniya, asi magaka kiita da mizli ti sefel na, yo i muzuwulahay le ɓa a kiɗam mi kutum.

¹⁵Mangal mumuc le ɓirgisl na, ɓi naŋ a gira cine haɗa, joˀ a ciɗ dum ceɗ ceɗ ar deɗe ngi mangal naŋ mumuc gurjik na. A zla ma na, a ɗuvaŋ hirnga kaɓa i bumbulvuŋ, anta pura kaɓa i vagay ngi mangal naŋ tuwa mata ma, dar a dubuna gwat masli wala ta ati mezegweley da mizli naŋhaya.

¹⁶Taŋ mizikam muduba na, sirik ngi mizirɗa mihay tuwa, mizli a jaka a hirngakaɓa ɓimujuwa.

¹⁷Keɗ keɗ na, mizli mikileŋhey a duvakaŋ hirnga a mi hiri naŋ gu ta, asi naŋ kileŋ avi taŋ, joˀ a ciɗam gwat mekelem mibi nah, a ciɗam foto ngi buy taŋ macinakaŋ mi. Vurˀe, ko da buyo n’anta kwana, a cicam zlak ngi hunum naŋ kaɓa n’ada si.

¹⁸Ko avi mizli misinakaŋ ta kwana, gi mezegwel a ra sik, mbele gidaŋ ngi mbur misina ɗiya gwat maga taŋ wirwir.

¹⁹Mbur miciɗa gwata, ko mbri, a wuɗ ɓa sey a cira hiri da biyo, a girdiˀ ti slra naŋ girdeˀ, ɓa a bo kuy haɗi fineˀ deŋ ngi buy vuna.

²⁰Akẽh na, gwat miciɗa kuy haɗi tuwa, a tikina mizli le, buy taŋ maɗuvakaŋ hirnga wureˀeni kaɓa mbur tuwa, a tiri le i gwat ngi dilik a mbuŋ naŋ.

²¹Naŋ kine, ti mizli mitiram beke ngi bonoy ati ngi wi mizli na, gwat hana, a tiri le avi taŋ i diɓel ngi kiɗ taŋ vagay vagay, asi ɗugur malla dum miciɗa lambaˀ ma na, a cakaŋ slimiɗ ngi Buymisemuŋ na.

²²Taŋ micinaka mi da Buymisemuŋ ta na kwana, muk ti taŋ ta ɓula si, lesl taŋ midigizla na, a ra zlira taŋ ngi kiɗa vu, joˀ a caka slimiɗ da gwat ngi gi taŋ nah: ‹zuy zuy› kini ma.

²³A gam mikuli ti ziri, a gam mezegwel miyaŋŋa, a gam muguzlum ngi gi lambaˀ lambaˀ, jom ti sirik taŋ malambaˀ na.

²⁴Anta kam slimiɗ ar siifa ngi mbur ta, a sinam ɗuvavu misi ti jiviɗ naŋ ta. mbur a vula cala ngi kiɗ vagay, malla a hin ti ngwas ngi cil naŋ waˀwaˀ ɓa a vulaŋ bonoy.

²⁵A jumoko gwataya le haɗi: pi pumbus, kiɗa hirnga, hul, gi gilaw da mbur, gi gwat sey gwat taˀ le, gi gwat mikasl ta, zlira vu, hudum ngi slir,

²⁶sipa mizli mijeŋŋehey nder nder, puyuko hirnga ti gwat mezle mbur maga taŋ di, a hiryaka vu taŋ, ziley a hinam ti cil taŋhay, ngwasay a hinam ti cil taŋhay, zuɓa vu misi ti jiviɗ naŋ ta, madama waɗ gi sulome.

²⁷Asi dilik a mbuŋ gwat miciɗa lambaˀ na, i zli virzi ngi gi malmbaˀ gar, mizli magam malambaˀ na aseˀe, yo malambaˀ kwana, a kiɗ mi avaŋ.

²⁸Mizli madilikam a mbuŋ gwataya, a pulaka vu mbak da mumul mufineˀ gidaŋ, a ɓam ɓi ngi gwat masa gi gisiŋ ta, kpak taŋ na, anta gam gwat mijeŋ ta, yo ɓi taŋ mujuwaka le na, a puskaka kutumo si.

²⁹Taŋ mupulaka mevel taŋ da gwat musokko lambaˀ na, taŋ a waka na, a dirba hudum taŋ ti slir na kwana, a hiryam ɓi neˀ ta.

³⁰Amma kuti ti bonoy a ra kutuko taŋ vur gwat cuw: a hirsaka Buymisemuŋ, a wuɗam kulihey, mucuw naŋ na, a hirsaka gwat mipala , joˀ a gam wer, a hudumom hudum ngi slir.

³¹Da ko a zluwunam ti gidaŋ ngi gwatay taŋ mahilaka taŋ ngi sedewo na ta tekeɗe kwana, na kuti ti bonoy miwam di vu da migi mungrahay na, a sa kiɗa mizli misi ka tayna.