Read South Giziga Sin Ji 15 Bible Online

Sin Ji 15 - South Giziga bible

Sin Ji 15

¹Naka, Buymisemuŋ ndra, ka mezle, yo ka teŋteŋ, ki ndi ɓi teˀe, yo ki jigina mizli gar ti pura ircece.

²Ko da i gam mungra le tekeɗe kwana, ndr’i ngi ɗikey, asi i sinukuw le, ka madiɗaŋ. Amma ka mapura ndraka ngi ɗikey tuwa na, ndr’anta sa gam mungra mata.

³Naŋ kine, mbur misinuw le na, i jiviɗ ngi gi jeŋŋe miwãˀ naŋ, yo sina madiɗa ɗik na, i jiviɗ ngi luma siifa ngi sete.

⁴Gwat ngi dilik avi taŋ, mizli misina ɗiya gwatay muboko di na, i pulakaŋ vu ndra mbak ɓa a ziza ndra ta, yo ko da slra mapul gir ta ngi miɗiya foto ngi tikina vuhoy, maɗiyam gwatay nohoɗ nohoɗ, ti yam naŋhay wal wal na, ko i pulakaŋ vu ta.

⁵Pur gwat misi kahana na, a ɗiɗa mizli gilawaya, a ga taŋ zer zer, joˀ foto mutoho mingbimmme, ati gwat miciɗa mawus ta tuwa, may naŋ a ja taŋ.

⁶Mizli miɗiya gwat tayna, mizli maŋhiyaka taŋ ati madilikam a mbuŋ taŋ gar na, i muwuɗa gi malambahay, a ndilaka le ɓa a lumaka gwat taŋ makutukomo.

⁷Kaɓaˀni, mbur mindira gwata, a fukuɗa hohoy motokozo, a ndir di gwat ngi gi slrahay wal wal a hay. Ti hohoy misi purla, a ndir di gwat ngi gi slra mihĩˀĩ ati gwat ngi gi slra muho gar, ndir naŋ i misi purla ngbaŋ. Amma gwat hana, i ngi gi slra hana na, i mindira gwatay majuwa ɓi nah.

⁸A dirba nah, a zuɓ slra ngi moˀore, ti hohoy misi purla, a ndir di kuli mingbimme lambaˀ. Na naŋ vuna, a ndiraka wureˀ ani ti ruwuy, tapas masa cufuɗakaŋ musuɗuk naŋ mididiɗa tuwa na, a sa mi wureˀ ani nga ruwuy naŋ mubo ti ra vuna.

⁹Anja zleˀe a wuppluk ar siifa naŋ midegweleˀ mamuc kutum na ma na, a wimi asi miɗiyaɓiri hirngaati ɓiri barahay, a sulum mi ngi mipi ɓiri gazahay, a wa vu naŋ kaɓa mbur muɗongor ti gi gwat mijeŋ ta nah vuna.

¹⁰Mevel naŋ i fucu ngatara lambaˀ, ɗuva wuluk naŋ mitaˀ na, ko a ndila murɓuko ti puɗawa ta, yo siifa naŋ, naŋ hiris le fineˀ hohoyo.

¹¹Asi mbur migi naŋ vuna, mbur muˀufoŋ musuwun fir, joˀ a vulaŋ musuɗuk misi titiri, membezleŋ misi ti siifa na, naŋ vuna a sinaŋ ta.

¹²Naŋ a wa weˀ na, siifa ndr’i ɓi ngi sefel, dum vu ndra, naŋ kaɓa cikili ngi gwat ar li ngi luma. A ɓi ti kwacay nah: ko ti jiviɗ wanaka gar, ko ti gi mungra kwana, sey a lum gwata.

¹³Mbur nah a sina le fineˀ mizli gar, a ra gi mungra ti ndira gwat ngi hohoyoy mawuh kutum ati gwat ngi dilik a mbuŋ taŋ na.

¹⁴Amma mesene ngi mizli ɗikey ati muguzuvur taŋhaya, a bugaka vu taŋ kaɓa i gilaw miwãˀ naŋ, lesl taŋ zuwen ngi ziri memeɗehey.

¹⁵Kuli ngi sukwi ngi mizli gar na, a puraka taŋ kaɓa i gwat ngi dilik a mbuŋ naŋhay, i kuli misi hirihey ngbaŋ, amma anta puram ta, vigiɗ ngi hutuŋ ada ngbaŋ, amma t’anta musuwunam ta, slimiɗ ada avi taŋ ngbaŋ, amma t’anta cinam ta, muzuŋ haŋhay ada avi taŋ ngbaŋ, amma t’anta tutumam gwat ta, sar ada avi taŋ ngbaŋ, amma t’anta ramdigi ta.

¹⁶Asi miga taŋ i mburu, mbur muvulakaŋ musuwun ti vul miga taŋ. Na dambalaka mbur titira mandir kuli mabi naŋ na anta.

¹⁷Naŋ misi ti dum vu mamuc na, a gi gwat ti haŋ misi dili gu na, sey gwat mumuca, naŋ vuna, naŋ dum hirnga ngi gwat naŋ madilik a mbuŋ taŋ vuna ma, naŋ a lum siifa le, amma gwat naŋ miga taŋ na, anta sa lumam ta ndidaˀ.

¹⁸Yo a dilikam a mbuŋ gwat miŋsami mukuy ta miwãˀhay, gwat manja lesl mifineˀ mekelelemey gar.

¹⁹Deŋ taŋ na, ko kuy neˀ avi taŋ, ɓa a tikinuw mi kaɓa ngi gwat miŋsami mekelemey na, anta wãˀ. A ngizlam le avi gwat Buymisemuŋ maŋhiya ati ɗuwula mi naŋ.