Read South Giziga Sin Ji 16 Bible Online

Sin Ji 16 - South Giziga bible

Sin Ji 16

¹Vurˀe, mizli madilkam a mbuŋ gwat miŋsaamihey na,a ndilaka le ɓa gwat miŋsaami mekelemey a kutaka taŋ ti bonoyo, gecey leɓ leɓ, a gaka taŋ bonoy.

²Anja zle ki ga bonoy da mizli ɗikeye ma na, ki ga taŋ mezle, may maja taŋ na, ki vula taŋ gwat ngi zum mundum, ki wa taŋ vu ti peɗurekey.

³Naŋ kine, mesene ɗikey may maja taŋ na, gecey ka mislino taŋ di tuwa, a ga taŋ kuy ta, ko may ngi zuma gwat anta avi taŋ ta. Na mizli ɗikeye, a zikam neˀ manja gwat ngi zumo si na, ki wunuka taŋ gwat mundum.

⁴Anja sey mizli maguzuvuraka taŋ na, may ngi zlamba a diɗ vu kuvbum ar taŋ. Mizli ɗikeye, sey a puraka mesene taŋhay, may muguzuvura taŋ na ti pur tewle.

⁵Yo mizli ɗikeye, ti gwat misãmihey midiɗam vu kuvbum ar taŋ, hã mizli a mucam haɗa ti kaw mitirmisl tirmisley mihumbiɗaka taŋ, amma ko ki ji mevel hã tay mi taŋ ta.

⁶Ki buga taŋ di bigeˀe, a ga taŋ zluwun a zik ta, ki ra wuɗ mbiɗa hirnga taŋ cici, ɓa a wulukaka gwat ɓimujuwa ɗik mawuɗ na keŋ.

⁷Naŋ kine, da mbur mimbiɗi hiri le ng’avi gwat mabigi gwat mekelem na, a lih le, anta i gwat aŋ mapura na milahaŋ ta, amma milahaŋ, i ka milaha mizli gar.

⁸Yo ka migakahana na, ɓa ngi buga da mesene ɗikeye, malaha mizli avi malambaˀ gar i ka.

⁹Taŋ a mucam ti yukoy ati jijiwiɗey mumulaka taŋ, ko a lumam slalak naŋ ɓa a ndiram ti siifa ta, asi a ndilaka le ɓa gwat tayna a guzuvuraka taŋ.

¹⁰Na ziri ɗikeye, sliŋ ngi kaw misi muwuŋhoy na, a ngizla taŋ wãˀ ta, asi ircece ɗike n’ada vur taŋ, joˀ a mbulom.

¹¹Gwatay mamulaka taŋ na, ɓa a wulukaka mingiɓi ɗike keŋ, amma ki laha taŋ kutumo si, vur taŋ mapuyukom hirnga ti ka wãˀ, a lumam gi mezle ɗike mata.

¹²Ko hirnga ngi dumoy, ko mal ngi puw kwana, anta mbulo taŋ ta, amma i Mingiɓi ɗike Bumbulvuŋ, mambulo gwat gar.

¹³Ki wa siifa ati muco le, ki pi sar ti mburo ng’ar li ngi mizli mumucahay, yo ki mo di ti siifa amuŋ gu ma.

¹⁴Mburo a kiɗ vagay ti moˀore naŋ na gu, amma anta maŋ ti musuwun naŋ mibi na gu mata, joˀ musuɗuk naŋ mindir ar li ngi mizli mumucahay na, a tuɓo di gu ta.

¹⁵Ko mbur a lih tisi haŋ ɗike gu ta wãˀ.

¹⁶Mizirɗa mi ɗikey mangumam a sinukuw ta na, ki kiɗa taŋ le ti haŋ ɗik migidaŋ: vuŋ magi ti gidaŋ, slaslalay migi daˀ ta, vuŋ mujom ti burkataŋ, a gam le ar taŋ, yo vu a zuma taŋ kap.

¹⁷Pura gwat ngi zuma hirnga ani: yama, i gwat mamuca vu ko wanaka gar, na ma na, vu a ra tiɓi a ra na si, asi duniya a racik vu asi mizli mijeŋŋehey.

¹⁸Ar li mekeleme, vu a muc hiri, ɓa a zlizlira gwat mislina ng’ar mizirɗa mihey na ta, amma ɓa a sinaka avi gwat tayna, kiita ngi Buymisemuŋ a ra sipa taŋ.

¹⁹Ar li mekeleme, wuzla yam kwana, a ra tiɓi vu fineˀ gidaŋ, ɓa ngi zlizlira gwat ngi sifi ngi ruwuy minisa nah.

²⁰Na so na, da mizli ɗikeye, ki wunuka taŋ gwat ngi zum ngi modro ɗikey. Ɗaf ka miwa taŋ di vu, ki vulo taŋ di ti muŋ manja a giram vu, i ɗaf mundum, naŋ ndum avi mi ngi mbur gar.

²¹Ɗaf ka mavula taŋ di, a ra buga da ziri, ki mbur miteˀteˀe. Mbur mazuma gar na, a kiɗaŋ may le, yo naŋ ndum avi mi ngi mbur gar.

²²A bam vu ati slaslalay misi ka gugumay ati slalslalay muho gar ngbaŋ, a ɓusa vu, yo anta luwusl ta. Ɓa mizli ɗikeye, a sinaka gwat ngi sifi ngi mesene taŋhay mihiryam ar vu matiɓi a hirnga slaslalay, a hiziga wucuɗ awuzla vuŋ na.

²³Na ma na, vu nah vuna, a tisla himaˀ naŋ, ɓa ngi vula gwat ngi zum da mizli mijeŋŋehey.

²⁴Gwat ka miga taŋ na, a juwam vu le, ɓa a gam gawla ngi ɗik, ka Migi taŋ vuna. A gam zluwun da mbur, ɓa ngi ga bonoy da mizli mijeŋ tahaya, amma taŋ teˀ teˀ ngi ga mezle da mizli mupulukuw mevel taŋ le.

²⁵Vurˀe, gwat ka miga taŋ na, a juwam vu le ngi gi gwat mimbiɗi le gar, a gam gawla ngi gwat ka muvula taŋ di ngataraŋ, a tiri gwat ngi zum ngisi mevel ngi mizli macufuɗam.

²⁶Bumbulvuŋ, ziri ɗikey ka mawuɗ taŋ haɗi na, anja a dubunaka, i yi ngi widis majaha ɗangal da mburo ta, amma mavula siifa da mburo, i mingiɓi ɗik gisiŋ.

²⁷Gwat ngi zum misi vu a zluma gu ta na, pas mundum ndum a luwusla gu.

²⁸Ki gakanah, ɓa i sinaka, anja i slikiɗam ngi guw sise manja pas a bawa, yo ɓa i zliram ati ka ar li mira wun.

²⁹Amma ɗuva wuluk mitaˀ ngi mbur misina gi sise ta na, a sa luwusl kaɓa slaslalay mapo ar kiya himiɗ, joˀ a ɓul lambaˀ ka yam ngi pula gir ta.