Read South Giziga Sin Ji 17 Bible Online

Sin Ji 17 - South Giziga bible

Sin Ji 17

¹Buymisemuŋ, kiita ɗike, i kiita madiɗaŋ, yo a sli wala tuwaˀa. Vurˀe, mizli manja lesley a zizam le.

²Mizirɗa mi ɗikeye, a wuɗam zleˀe, ɓa a gam gawla ti mizli mipalaya , dar a tiram beke ngi luvuŋ, a juwaka taŋ le ti celelu angi duvuɗ mazik haɗi, giceˀ a viŋ, a lumaka wuɗa vu ɗik ngi set na gu ta.

³Naŋ kine, taŋ a waka zleˀe na, mungra taŋhay miyaŋŋa na, a ndiram di ɗum asi zana mikitikpis, ngi puyuko hirnga naŋ. Na a zliɗaka taŋ hirnga mber mber, ɓa zluwun mukuyta wãˀ a ga taŋ, joˀ a puram gwat mazliɗa taŋ lesley.

⁴Li mukulkuc kulkuc taŋ maɗumom a ra na kwana, ko anta tika taŋ zluwuno ta, hurum ngi gwatay magam zluwuno, a ra cinam a ciki taŋ, a puram musuɗuk ngi mizli mumucahay, muroko ar li ndurɓo hiri.

⁵I duvuɗ mitimbiɗim haɗi, vu minjaslasl kwana, anta ciɗika li gu ta, yo wurzlaŋhay mawucuɗam pilngiɗ pilngiɗ na kwana, anta ciɗikaka duvuɗ mukuy ta nah gu ta na si.

⁶A puram sey vu minjilim njilim matiɓi pal naŋ, yo a ra ga taŋ zluwun haɗi. Da gwat taŋ mupuraka nah a susuyum le a mi hiri taŋ ma na, a roko ti zluwun na si, gwat taŋ mapuraka gar na, a ga taŋ zluwun fineˀ mudumbuŋ ma.

⁷Sin ngi misi cucukoyo, n’anta ti gidaŋ ta, yo taŋ mawaka vu taŋ kaɓa misina gwatay tuwa na, a ra pam mesem.

⁸Taŋ mawaka kaɓa gidaŋ taŋ a ɓula musuɗuk ngi zluwun ati ngi lik misi ar misi jijiheye gu na, taŋ vuna a roko ti jiji ngi zluwun magi singir.

⁹Ko da gwat ngi ga taŋ zluwun vuna anta kwana, gwat miŋsaamihay macohom ati curuɓ ngi kawaya, a ga taŋ zluwun muk si.

¹⁰Zluwun a ra kiɗa taŋ ɓaˀɓaˀ, yo ar luvuŋ nah, misi ko wer ngi lih tira anta na, anta zlam ɓi ngi wuna hiri wun le ta wãˀ.

¹¹Moˀore taŋ na, a bigi mihĩyaŋ taŋ, joˀ a gi sedewo ngi ja taŋ tehhe muŋ, wuluk magira taŋ tuwa na, a ra so taŋ ti ɓi mutuwaˀa ti vendeke ndrehhe.

¹²Asi zluwun na, anta i gwat mekelem ta, i pula wuluk mikaslsla majinuw na.

¹³Da k’anta njih hiri asi jini ngi wuluk mikaslsla nah haɗa ta na, k’anta ki sina gwat mayuw zluwun vuna ta, joˀ zluwun a guw ti gidaŋ.

¹⁴Amma taŋ, angi duvuɗ maɓus ta hana, mubo tir mijileŋ ngi mizli mumucahay na, mizli tayna, a ra hinjam hinje misi purla.

¹⁵Taŋ na, musuɗuk ngi mizli mumucahay a ra ɓulaka taŋ ma, yo a roko kilbaɗay kilbaɗay manja gidaŋ, asi zluwun mugurjik, taŋ muwulkaka zle ta, a diɗ vu le kpis ar taŋ.

¹⁶Naŋ kine ma, ko wa gar misi adiga na, a diɗi, a ndir giceˀ ar hay dangay manja li a pur fiŋ.

¹⁷Ko da i mbur muhuv, i mijigin, ko migi slra mutuwaˀ ngi ɓuh kwana, bonoy a ja taŋ gurjik, ko a gam gwat neˀ ngi laha hirnga taŋ gu ta.

¹⁸Asi taŋ gar na, i celelu ngir luvuŋ misi purla mujuwa taŋ. Hurum ngi himiɗi, ɗiyuwoy mizliraka tuwuy le ar kalaf mutukufoy, hurum ngi yam maɓul ti gidaŋ,

¹⁹ngi ɗuguroy magidigilam, ngi gwat miŋsaamihey makumulu, ngi gwat ɓuh misi moˀorehey muwãˀ, malla muwã mazil mi asi hurum ngi gwat gar na, a huluɓa taŋ hilaɓ hilaɓ ti zluwuno.

²⁰Asi ar duniya gar na, li aro ciɗak ciɗak ti li minjahha, yo mbur gar a ra ru ti slra naŋ ti zuy zuy.

²¹Duvuɗ miji kpingbilim na, ar taŋ tewle, i foto ngi luvuŋ ngi muc mihĩˀĩ vur taŋ. Amma lik taŋ, naŋ dudok avi taŋ fineˀ luvuŋ vuna ma.