Read South Giziga Sin Ji 18 Bible Online

Sin Ji 18 - South Giziga bible

Sin Ji 18

¹Ti di nah na, li a gi ciɗak ciɗak avi mizli mipal ɗikeye, mesene taŋhay a cinam ˀay taŋ ɓula, amma anta puraka taŋ ta. Joˀ a ɓaka taŋ: «Kum ar mumul, asi kum anta sam bonoy ka ndra na ta.»

²A gaka sise da mizli miteŋteŋheye, asi bonoy taŋ misaka na, a mupulaka cuwal naŋ ta, joˀ a gaka wereke da mizli ɗikeye, vur taŋ migam taŋ mesene na.

³Ar deɗe ngi luvuŋ na, ki vula li minjahha da mizli ɗikeye jaka, ɓa a ki sa taŋ ar jiviɗ ngi ru ng’ar li manja sin. Li minjahha nah, naŋ kaɓa pas mundum ndum, mezle ngi zuɓa mulak misi ti dudoko.

⁴Na mizli mekelemeye, a ndilaka le ɓa a lumam li minjahha ta, ɓa a ndiram i beke ngi luvuŋhoy, asi taŋ vuna kwana, a jaka ziri ɗikeye le zleˀe ng’ar beke ya, anja zle mavulaka li minjahha makiɗ mi ta ngi ɓi mijuwa da duniya na, i ziri ɗikey vuna.

⁵Mesene ngi mizli ɗikeye, a juwaka le zleˀe a mevel taŋ, ɓa a ngizlaka ziri gaza ngi mizli mipalaya , sey mangal purla tewle milih breˀ breˀ avu muco. Ɓa ngi kuta taŋ ti bonoy na, ki ngizla taŋ zire sunok sunok, waɗ taŋ vuna, ki ngizla taŋ jom arleˀe ar yam mawus ti gidaŋ.

⁶Gwat mucuh ngi duvuɗ nah na, ki ɓa ɓi nah le daf dumbuŋ da dideˀ ndrahaya, ɓa a mumulom hirnga kaˀ amuŋ, asi a sinaka hudum taŋ misi ti mevel taˀ wãˀ na le.

⁷Duvuɗ nah, i divuɗ ngi laha mizli mijeŋŋehey, yo i ngi ngizla mesene taŋhay na, mizli ɗikey a sinaka le.

⁸Naŋ kine, gwat ka migi di bonoy da mizli mazliram ti ndra ta na, a tiri avi ndra, i ngi ga dudok da slimiɗ ndra, asi ki zila ndra ti zil ng’avi ka.

⁹Mizli musipa jiviɗ ngi Buymisemuŋhoy, dideˀ ngi mizli mijeŋŋeheye, a ra gam mikuli ti mi yaŋ yaŋ. A jumom ˀay le gar taŋ, ɓa a sipaka ɓimujuwa miɓi: ‹Anja mizli mipalaya , a wunkaka li lum taŋ ati bonoy taŋ arleˀe, dimis ngi hunuma vu misi zlezle ngi dideˀ taŋhaya, a ra zlaka si.

¹⁰A ra cinam widi mituɓaŋ ta ngi mesene taŋhay, yo ˀay ngi mizli matuwaka ziri taŋhay kaɗam kaɗama, a ra cin kileŋ.

¹¹Mbur beke ati buy ɓi, a sam bonoy misi purla, mizli mizliwey a sam bonoy misi purla ati buy madiɗa.

¹²Taŋ gar arleˀe, a mucam muc misi purla, ko vagay ngi mizli a sluf ta, yo mizli mindiram ti siifa, ko a ndilaka ngi dik taŋ gu ta, asi tizer taŋ mupuɗaw wãˀa, a ngisl kap ar li purla si.

¹³Taŋ i misi hirnga gidaŋ wãˀhay, wuluk taŋ naŋ taˀ asi migi cucukoy, amma a dirba ziri modogom taŋhay mingizlama, mizli tayna i ziri ngi Buymisemuŋhoy zleˀe na, a sinaka muduba so.

¹⁴Wuzla duvuɗ migi na, li a gi siriw, leleŋ leleŋ ɓaˀ li.

¹⁵Gurjik si na, Mingiɓi misi gidaŋ haɗi, a slikiɗo baɗ a muŋ, baɗ ar li cifi ngi buyo, kaɓa mbur migi vurum manja ircece, a diɗ vu kpis avu ruwuy minisa le tuwa,

¹⁶ɓimicica ɗik ngi wãˀ, kaw a haŋ ar deɗe ngi maslalam mazum haɗi. A wusa muŋ vrek vrek ti hirnga, dambalaka sa raya taˀ taˀ a ruwuy ngbaŋ, naŋ micici le deŋ na, vagaya suɓulak.

¹⁷Gurjik si na, mizli a puram gwat ti kleŋ ar musuwun mukuy ta, magi zluwun, ɓa zliɗa taŋ lesle le wãˀ, yo zluwun mugurjik a ga taŋ.

¹⁸Mizli gar a diɗam ɓaˀ ɓaˀ, sumtraˀ sumtraˀ kaɓa mumucahay, mbur gar a ɓa ɓi ngi muc naŋ.

¹⁹Asi musuwun taŋ miba taŋ hirnga tuwa, a ɓa taŋ di daˀ daˀ le, taŋ masaka bonoyo vur mike na, ɓa a mucam manja sin naŋ ta.

²⁰Mizli mijeŋŋeheye, bonoy ngi muc vuna a luma taŋ le ya, joˀ mizli a ngizlam sunok sunok awuzla ɓuh mikirɗak kirɗaka, amma Bumbulvuŋ a zik ti mevele haɗa ta.

²¹Naŋ kine, mbur manja meslef ada, a wus vu ngi cika vu a hirnga taŋ, naŋ ti gwat ngi kiɗa vu mihĩˀĩ ngi masay: i dirdibiɗ ati mukuturɓuy ngi zlum ti zlum matisl mevel.

²²A pa hirnga le da ji mevele, anta ti gidaŋ ngi vu ta, ti gwat ngi kiɗa vu mihimaˀhay ta, amma a pa hirnga da mbur maguw bonoyo ti mingiɓi, a muw hiri ngi hudum ɗik ati jumoˀay ngi dideˀ ɗikey ati naŋ.

²³Akẽh na, vagay ngi mizli a cikil le ɗingilngiŋ si, dar mbur manja meslef tuwa, a cici deŋ ar wala ngi muc ati mizli, a wuɗuka taŋ, a tika muco ɓa a ru ng’ar li ngi mizli misi ti siifahaya ta.

²⁴Duniya kurzluˀo, n’ada avi jampa naŋ misilmire, slimiɗ misi ti dudok ngi dideˀ ngi Israyeleye, n’ada toh toh avi ɗuguroy micinja cinja mufaɗ na, yo gwat mabigi ka buy madiɗa, n’ada kap avi loppol naŋ ngi hirnga.

²⁵Mingizla vu mupura keɗ keɗ na, a mi murdirba, yo zluwun a gaŋ le ma. Naŋ kine, ki wuɗ zle ɓa ki buga ji mevel ɗik da mizli ɗikeye ɓa a sinaka naŋ muk ti taŋ si