Read South Giziga Sin Ji 19 Bible Online

Sin Ji 19 - South Giziga bible

Sin Ji 19

¹Na jak na, ki zuɓ himaˀ manja pura ircece ng’ar mizirɗa mi ɗikeye, hã tay mi naŋ. Asi gwat ka masa ga na, naɓa Buymisemuŋ a sina le daf dumbuŋ si:

²taŋ muvulaka musuka vu da mizli ɗikey, a ɓulaka taŋ kutum na, a dirba nah, mesene taŋhay a mbiɗaka wuluko, joˀ a sipaka taŋ amuŋ.

³Na ɓa, a roko ar li vagay aruŋ ngbaŋ, a ra tuwam kaɗam kaɗam a mi zivi ruŋ ngbaŋ, joˀ a wulukam wuluk mekelem, wuluk ngi gilaway: mizli taŋ mutumbuloko taŋ ti tumbul ɓa a cohom ma na, dar a sipaka taŋ kaɓa a kilam ti kil ma.

⁴I muzuwulahay, zuwul taŋ, a ru ti taŋ hã ar kiɗa mi naŋ, yo a ga ɓa a puyukoko hirnga ngi gwat misi zleˀe, ɓa a kiɗaka mi ngi bonoy taŋ mindir ngi guzuvur taŋ na wãˀ.

⁵Mizli ɗikey a ra titilam zuɓa mulak misi ɓi naŋ a ɓi ta, amma mesene taŋhay, a sa mucam muc mupuram daˀ ta wãˀ.

⁶Asi gwat ngir duniya gar, macinukuw mi ar ɓi miɓa le na, ki ma hiri ngi gi taŋ ti sukwi wal wal amuŋ, ɓa ziri ɗikey a ndiram cimak avi gi gwat malambaˀa.

⁷Mizli a puraka gazlavay misirta walahaya le, yo ruwuy mingbalaŋ ngbalaŋ a bo ar li ngi yama, mubuliy gaza, a tiri jiviɗ miɗalla manja gwat ngi bi sar, diɓel ngi yam makil ti gidaŋ, ki tiri di li micay misi giziŋ mutukuzo.

⁸Sukwi mgi mizli taˀ, a tuwuɗam ti ra. Ki jigina taŋ tahaŋ ɗiki, yo a gam sedewo ngi gwat ngi zuma hirngahay ngipur hiri ngal ngal.

⁹A njikam njak njak kaɓa pilisey ar li zum, a zluzluɓom kaɓa ziri tumuŋhoy, a ra gukuw muguzlum daka Bumbulvuŋ malaha taŋ.

¹⁰Asi gwatay migam, ti taŋ misi zleˀe a ruwuy mulak aruŋ na, a so keŋ a hirnga taŋ. Ar deɗe ngi gwat miŋsaamiheye, hirwuy a ji cunjuhoy, ɓa yam a ji kilifey ma na, a ji gecey kwesle kwesle.

¹¹A zikam neˀ ma na, a puram sukwi ngi ɗiyuw nawayahay, asi may mija taŋ na, a cufuɗam gwat ngi zum mundum,

¹²yo ɓa ngi kiɗa taŋ maya, tuɓurlayay a slikiɗoko tir mubuliy.

¹³Dar bonoy a diɗ vu kuvbum avi migi mungrahaya, a buga taŋ di bigeˀ bigeˀ le ti ndisl ngi vuŋ. A gaka taŋ bonoyo kasla, asi moˀore taŋ na. Naŋ kine, a gam mesene mukuy ta wãˀ naŋ le ti mbur mulaka.

¹⁴Ti zle na, mizli Sodomoy a ngumam tuɓa mulakay masoko ti sawa ta. Amma taŋ, mitiɓi mulakay magaka taŋ mezle na, a tiram taŋ bekehey.

¹⁵I nah tew ta ma: kuti ti bonoy a ra kutuko mizli tayna, asi taŋ mutuɓaka mulakay ti moˀore na.

¹⁶Amma a dirba taŋ migam muguzlumo ti mumul, asi mizli munduloko wureˀ, yo taŋ mupulaka taŋ jiviɗ ɓa a gam purla ati taŋ na, akẽh, a giraka taŋ ti slra mutuwaˀhay.

¹⁷Vurˀe a tiram dangaray, rak rak ati mizli midedeŋ a mizlingre ngi mbur mijeŋŋe. Taŋ misi ar luvuŋ mitimbiɗim tuwa na, mbur gar a tutuma li kpaˀ kpaˀ ngi luma miviŋ ngi hay naŋ.

¹⁸Kaɓa ani, gujuvuro, ˀay ngi zeweɗeye taŋ pal pal, a mbiɗi dimis mekelem mekelem, amma ˀay ngi zeweɗe anta mbiɗi ta. Ti di nah na, gwat ngir duniyahay a nguɓomˀay ar wala taŋ. Da ki pura gwat migi na le keɗ keɗ na, a bigi le njah si.

¹⁹Naŋ kine, gwat ngiavrahay ma na, a tiram ngisi yamay, yo miki yamay ma na, a rutigam a ruwuy.

²⁰Vu bul a hirnga yama, a tiɓi ti gidaŋ, yo yam a puyuko hirnga ngi muca vu le.

²¹Na, ginewey misi ti vu taŋ ndeŋ ndeŋ, macam a boko tir yam vuna, irne vu anta zluma useˀ taŋ ta, yo ma na, gwat ngi zum ngi Buymisemuŋ mibam vu ati slaslalay maluwusl kutum na, vu anta luwusla ta.

²²Bumbulvuŋ ɗu, ki ga le ɓa mizli ɗikey a tiram ɗongor, a lumam dudok ar gwat gar. Ar pas gar, yo ko amaka gar na, ki pula mizli ɗikeye fuk daˀ ta, ki ro deŋ a ciki taŋ.