Read South Giziga Sin Ji 2 Bible Online

Sin Ji 2 - South Giziga bible

Sin Ji 2

¹A gam lambaˀa si, a ɓam ar wala taŋ: «Siifa ndra na, naŋ subur ta, yo ndra ar li ndurɓo hiri ma kini. Da siifa ngi mbur a kiɗ mi le na, slalak naŋ anta, yo mbur a mo le ti wuzla mumucahay kwana, i cinam daˀ ta.

²A yam ndra ti gurjik, yo a dirba ndra mumucam le na, i ndiram suytum, kaɓa a yam ndra zleˀe daˀ ta. Musuwun mabo ti hutuŋ ndra na, i cunju turliŋ ngataraŋ, wuluko kwana, i wucuɗ miwiliɗ mabo tivi duduwa makiɗ na.

³Da wuluk miwiliɗ nah, a muc le na, dum vu a tiri fucu, joˀ musuɗuk a sumuɗ kaɓa himiɗ, hiri a pura ta.

⁴A zik le nga mbuŋ na, a sa puyukom hirnga ti slimiɗ ndra, ko mbur masa wuluk keŋ ar slra ndra migaka anta. Siifa ndra a cuh le kaɓa gazlavay, ko li naŋ tekeɗe anta, a sa susuyum kaɓa mulbuɗ vu ngi pas mawuyahaŋ.

⁵Siifa ndra naŋ kaɓa susuɗuk macuh, hin mislam ndra di na, anta kirih ta wãˀ, asi i muslurɓa ngbulum, yo ko mbur mamo di nga dirba gu anta mata.

⁶«Da kine na, akum! Mumulukum ti gwat mezlehey misi wurenna! Curukum asi gwat ngi duniya hana, kaɓa ti ndra misi ti ziri, gboŋ gboŋ na.

⁷Sukum mbaazla mundumoy, gukum urdi mupuɗaw, mazĩˀĩ ndum haɗi avu vu, mufuyuk mudumbuŋ ngi mohor na, anja a ndir ta, i ngilakaŋ.

⁸Tuwuɗukum hirnga ti mufuyuko daf vur naŋ masa guvuˀu.

⁹Anja mizli gar a soko ng’ar muguzlum ndra ngi jigina mi na, anja ba raf ngi muguzlum ndra na, a ndir bimme. Asi mi ngi ndra, gwat ngi ndr’i nah.

¹⁰Guzuvurukum misi murga magi gwat mijeŋŋe, ko i puraka ircece da ngwas widiga ta, yo ko i cinaka mi da midigila misi hol tullo ta.

¹¹Avi ndra na, mawuɗuka wala i gidaŋ si, asi ŋhihiy anta pul gir da mbur ta.

¹²Ngukum diɓel da mbur magi gwat mijeŋŋe: asi a ra ga ndra ngaˀa, a tika ndra ngi gi gwat ndra mawuɗama, a ra mbiɗa ndra hirnga asi ndra mangilaka ɓimujuwa, yo a ɓi ndra teŋteŋ avi dubun ndra ta kini.

¹³A ɓi a sin ɓi ngi Buymisemuŋ le, yo a zilaka mangal ngi Bumbulvuŋ kin’eyna!

¹⁴A tiri le i mbur mideŋ ti deŋ ngi mbiɗa ndra hirnga asi wuluk ndra, hiri taˀ a ra na, a ga ndra kuyta wãˀ.

¹⁵Asi joˀ nga naŋ, naŋ ka mizli mekelemey ta, yo gi gwat nga naŋ, naŋ wal avi ngi mizli.

¹⁶Avi naŋ na, ndra kaɓa dala misi zlezle magi slra mata, a ti teˀe avi ndra kaɓa matam avi kitikil. A ɓa njah njah: ‹kiɗa mi ngi mbur mijeŋŋe, i mumul,› yo a jijih deŋ, a ɓi: ‹Cine naŋ i Buymisemuŋ kini.›

¹⁷Amma purukum di kwaɗay, mingiɓi naŋ maɓa na, i gisiŋ kwa? Yo i sa puraka, da naŋ vuna a sa kiɗ mi mbrike na.

¹⁸Da mbur mijeŋŋe i mangal ngi Buymisemuŋ na, naɓa Buymisemuŋ a sa kulo widi nah, joˀ a tuɓaŋ tisi haŋ ngi mizli mazliram ti naŋ tahaya.

¹⁹Cukum a kwacay naŋ, zukum di gbaˀ avi tesle, guzuvurukumk di. I sa puraka, da a sa ɓusa, n’ada teˀ teˀ, hã tuvunaka na.

²⁰Anja i gakaŋ kiita ngi muc ti mesem, vur naŋ miɓi: ‹Buymisemuŋ a sa kulo widi ɗu na!›»

²¹Wuluk taŋ naŋ kahana so, amma a zluɓam le, wuluk taŋ mucuw cuw na, a hulufo taŋ le.

²²A sinaka ɓi Buymisemuŋ mutoho yaŋŋa a mevel naŋ na ta, migir Buymisemuŋ masa vula da mizli magam gwat ngisi mevel naŋhay na, a ɗuvaka wuluk taŋ a ra ta, a ŋhiyaka naŋ masa ɗuva hirnga da mizli misi mevel mezlehey na ta.

²³Na dambalaka, Buymisemuŋ miga mbur na, i ngi muc zleˀe ta, yo a ga ma na, a bam vu ati vu nga naŋ.

²⁴Amma muso ti muc ar duniya na, i suloŋ ngi Satan, yo mizli nga naŋhay a ra mucam.