Read South Giziga Sin Ji 3 Bible Online

Sin Ji 3 - South Giziga bible

Sin Ji 3

¹Na musuɗuk ngi mizli mijeŋŋeheye, taŋ asi haŋ ngi Buymisemuŋ, ko bonoy masa duko taŋ anta.

²Manja lesley a puraka na, kaɓa a mucam na ngi wãˀa, yo taŋ mupulaka duniya hana na, kaɓa i bonoy avi taŋ,

³cuh taŋ mikileŋ avi ndra na, a puraka kaɓa i bonoy. Dambalaka a roko roko zuy zuy.

⁴Ko da mizli a puraka kaɓa a ra sam bonoy tekeɗe kwana, ɗuva wuluk nga taŋ mitaˀ zleˀe na, t’anta mucam ta.

⁵A dirba taŋ mulumam kuti neˀ ti bonoy na, a sa lumam gi mezle mihaɗi Buymisemuŋ a ci a kwacay taŋ ti ci, a pura na, a ndilaka le ngi cifi ati naŋ.

⁶A bi ti malambaˀ taŋ le avra, kaɓa mabam ti malambaˀ ngi ɓiri hirnga ar kukutu, a tuɓa taŋ, kaɓa naŋ matuɓa mikuli mizlam zlam wãˀa.

⁷Ar hin ngi kiita Buymisemuŋ misla na, mizli tayna, a sa wucuɗam, a sa kilam kutum kaɓa vu mazuma li.

⁸Mizli jeŋŋe tayna, a sa gaka kiita da sukwi ngi mizli, a sa waka mizli, yo Bumbulvuŋ a sa cifi buy taŋ ngi sete.

⁹Mzli mupulaka mevel taŋ le da Buymisemuŋ na, a sa slaka wala ngi ɓi mikaslsla, mizli masa cicam zlak ngi wuɗa vu gar na, a sa ndiram a ciki naŋ. Asi mizli naŋ muwuna taŋ na, a sa vula taŋ leleŋ naŋ waɗ a sa pura taŋ ircece.

¹⁰Mizli mizirɗa mi ngi Buymisemuŋhoyo, taŋ, a sa sam bonoy, asi a hirsaka mbur mijeŋŋe le, yo a pulaka Buymisemuŋ le fuku, wuluk taŋ a ndila le ɓa a saka bonoyo.

¹¹Asi mizli mahirsaka sin mijileŋ ati dubun naŋ na, i mizli migeˀ ircecehey: ɗuva wuluk taˀ anta avi taŋ ta, a tumom vu gar ngataraŋ, slra taŋ magaka na, ko anta pul gir da mbur ta.

¹²Lesl anta avi ngwas taŋhaya ta, ziri taŋhay, i misi moˀorehey, dideˀ taŋhay i minisahay le.

¹³Ngwas dirlay mici daˀ ar dili ta, mizliram daˀ ati zil mekelem ta na, mamumul i naŋ, a sa luma wuruk nga naŋ tapas gi kiita da musuɗukoy.

¹⁴Mbur munguɗo, mica haŋ daˀ ar malambaˀ ta, yo wuluk malambaˀ angi Buymisemuŋ anta avaŋ ta na, a mumulo ma: a sa lum wuruk mikaˀ a ruwuy asi gi teŋteŋ naŋ na, yo ar Hay ngi Bumbulvuŋ, a sa lum li cifi ngi mbuŋ.

¹⁵Asi mbur matum vu ngi gi mezle na, a lum wuruk misi ti dudok haɗi, mbur misi ada ti sin mijileŋ na, naŋ kaɓa widis misi dimbasl naŋhay mamucam pam le ta.

¹⁶Amma ziri ngi migi madamahaya, anta sa puskam vu ta, yo dideˀ ngi mizli miyaka taŋ ti madamahaya, a sa susuyumom.

¹⁷Ko da a zikam a ruwuyo haɗa tekeɗe kwana, i ngataraŋ, ko ti midigila taŋ kwana, a sa hirsaka taŋ hã pam.

¹⁸Da ko a mucam daf ti zuŋ kwana, ɗuva wuluk taˀ anta avi taŋ ta, tapas gi kiita na, mbur masa ŋsoho taŋ tuwuy anta.

¹⁹Gwat masa gi avi mizli mijeŋ tahay na, a gi zluwun da mbur.