Read South Giziga Sin Ji 4 Bible Online

Sin Ji 4 - South Giziga bible

Sin Ji 4

¹Zuwen ka miyi ta, dar ki gi mezle a funuw di, mbur magi mezle na, a pul gwat mamuc ta wãˀ a dirba naŋ, asi gi mezle na, Buymisemuŋ ati mizli a wuɗam di nah.

²Ka misi ti siifa na, mizli a suluɓoko mi ngi mezle ɗike, da k’anta mata na, mizli a lukukuw. Angi duniya matiki ta, a sa tuwuɗukuw hirngaŋ, ki sa lum wuruk ngi gambarahay, asi ki lum bugawla le ar kiɗa vu mici ti ka ar dili neˀ le ta.

³Amma mbur mizirɗa mi ngi Buymisemuŋ, ziri naŋhay mikwesle kwesle na, i ngataraŋ, taŋakaɓa kalaf malambaˀ maɗiɗi, anta dira dimbasla jileŋ ta, yo sivirzi naŋ, naŋ gidaŋ gidaŋ ta.

⁴Ko da a ki haŋ le ngi hin neˀ tekeɗe kwana, n’anta gidasŋ gidaŋ ta, himiɗ a sa wusa heɓel heɓel, musure a sa muɗa nduroɓ ti dimbasla.

⁵A sa ngila mihaŋ naŋ miɗiɗi wureˀe liɓasl liɓasl, yi naŋ i magala ruŋ, a zum ta, a sa hiryi ngataraŋ, ko a pul gir da mbur ta.

⁶Asi ziri miyaka taŋ ti jiviɗ ngi ɓimujuwa ngi Buymisemuŋ ta na, tapas gi kiita, masa gaka sedewo ngi malambaˀ cine taŋhay migam na, i taŋ.

⁷Mbur mijeŋŋe na, ko da a muc daf tekeɗe kwana, a sa lum li musuko vu na si.

⁸Mbur midigila na, a ndila le ɓa ki ŋsaˀaŋ, na anta asi vi naŋ mihaɗi malla asi a zik le haɗi ta.

⁹Sin mijileŋ na, naŋ avi mbur misi hol tullo, joˀ ngi mbur midigila na, i cifi manja hereweɗ avaŋ.

¹⁰Naŋ mitiri mezle avi Buymisemuŋ na, Buymisemuŋ a ra wuɗaŋ, yo naŋ misi awuzla migi mungrahay tuwa na, Buymisemuŋ a ru di ng’ar li mekelem.

¹¹A zuɓaka ng’ar li mekelem na, vur gwat malambaˀ masa hiryaŋ kiita naŋ, malla vur misi wer masa tikinaŋ.

¹²Asi wuɗa pura gwat lambaˀhay ngrimme na, a tukuw gwat mupuɗaw migisiŋ gisiŋheye, yo wus haɓar haɓar asi may gwata kwana, a ziza wuluk ngi mbur misi ti jiviɗ naŋ.

¹³Mbur nah a tiri mbur mezle ar vi neˀkini si, hã a ndila mbur mezle migi vi mbeˀ mbeˀe.

¹⁴Gwat ngi gi naŋ a cira hiri le da Bumbulvuŋ, naŋ muzuɓa tir li malambaˀa ng’ar li mekelem kutum na vurˀe. Mizli a puraka le ɓula, amma a slaka wala naŋ ta, gwat masli wala ta nah na, a ci ar lesl taŋ ta.

¹⁵Buymisemuŋ, a ra vula leleŋ, yo a ra pura ircece da mizli muwuna naŋhay, waɗ a sa cici ar mizli mipal naŋhaya ma.

¹⁶Mbur mijeŋŋe, ko da a muc le kwana, a ga kiita da mizli misi ti siifahay mazirɗaka mi da Buymisemuŋ na. Mbur zuŋ zuŋ aruŋ, mindila gi mezle kutumo si tuwa na, gwat ngi gi naŋ a ga kiita da mizli magam midigila ar li gi malambaˀ na.

¹⁷A sa puraka mbur mijeŋŋe mamuco, amma gwat Bumbulvuŋ mawuɗ avaŋ, yo naŋ mawi di vu na vur mike na, ko anta slaka wala naŋ ta.

¹⁸A sa puraka ɓula, a sa hirsaka ti hiris tewle, amma Bumbulvuŋ a sa singir ar taŋ

¹⁹Yo taŋ mumucam le na, mizli anta sa kam slimiɗ ar vagay taŋhaya ta, ar li ngi mizli mumucahay ma na, a sa pam mesem ngi sete. Buymisemuŋ a sa po taŋ haŋ hirnga jik ti ruwuy, ko a mbiɗam mi ŋwew ta. a sa ngila taŋ meɗ meɗ wãˀ, li a sa ndir leɗeɗ hã avi kiɗa mi naŋ, yo a sa ndiram ti vu ngi ji, ko mbur masa wuluka taŋ keŋ anta wãˀ.

²⁰Ti taŋ masa cufuɗaka taŋ vur mungra taŋhay na, a sa kurohoko ti zluwun, mungra taŋ madiɗahaya, a cicam zlak zlak ar taŋ ngi kupa taŋ ɓi.