Read South Giziga Sin Ji 5 Bible Online

Sin Ji 5 - South Giziga bible

Sin Ji 5

¹Aŋheh na, mbur mijeŋŋe a sa slikiɗ deŋ, a mbuŋ mizli muguzuvurakaŋ waɗ mahirsaka gidaŋ naŋ na, ti wuluk naŋ mitaˀ gisiŋ gisiŋ.

²Mizli tayna masa purakaŋ keɗ na, a sa gidigilam ti zluwun, asi ɓa a sa lih na, taŋ a wulukam zleˀe daˀ ta, a zuma taŋ hirnga le.

³Didak a ra muɗa taŋ le, a ra niˀicam, a ra musuwunam nga muŋ ngamuŋ, a sa ɓam ar wala taŋ:

⁴«Hana i mbur ndra mapuraka hiris le zleˀe, i singiram kiraw a ra tuwa. Ndr’i gilaway, i puraka gwat ngi gi naŋ kaɓa mibi hirngaŋ, yo i puraka a muc muc ngi mesem.

⁵Na, a sa gi mbri mbri ɓa a ci nga wuzla ziri ngi Buymisemuŋhoy, a cifam ati mizli mipalaya ka?

⁶Ndra mizizam kileŋ avi jiviɗ mikaslsla na kahana so, li minjahha ngi gi gwat mijeŋŋe, a ciɗik ar ndra ta, yo pas a bo njah vur ndra ta.

⁷Ndr’i zizam tos tos ng’ar li malambaˀ ngi gi gwat mijeŋ ta, i ngirakawuzla ɓuh manja jiviɗe, amma ko i sinaka jiviɗ ngi Bumbulvuŋ ta.

⁸Jijih ndra na, a pula ndra gir ngi mike? Zlili ndra mahuhumom di tuwa, i lumam di mike?

⁹Gwat tayna gar, a susuyumom kaɓa susuɗuk ngi gwat, kaɓa labara ka mapuyuk di hirnga kutum.

¹⁰Kaɓa palalam mangira diɓel ngi yam, ko ba raf naŋ anta ndir ti dirba ta, ko anta pul gwat neˀ le avi yam mifin fine ta.

¹¹Kaɓa ɗiyuw maslikiɗ a dadala muŋ na, li naŋ maru anga gar na, anta pul gwat neˀ le ɓa ki pura ta. Naŋ makiɗa kirpasl na, a kiɗa himiɗ mifiɗek fiɗeke, a ngira taˀ dibiɗ ti kirpasl naŋ makiɗa tuwa, a cuhu, amma a dirba nah, ko ki pur gwat mabuga a cuh le ti ka na, anta neˀ ta.

¹²Ka malaha luvut ngi mula gwat na, himiɗ luvut makursa na, a mo a hahãŋ ng’ar li naŋ amuŋ, ko ki sina li naŋ mibi a ra a ra mata.

¹³Ndra vuna, kanah ya, taŋ miyam ndra le si na, i susuyumom kutumo si, gwat mezle masa ndir a dirba ndra, ko i gam ta, mbak i ra kiɗam mi ar sulome.»

¹⁴Haˀaw, mbur mizirɗa mi ngi Buymisemuŋ manjih hiri njah na, naŋ kaɓa cekwesl himiɗ makil di, mallakaɓa mongofok a hirnga yam himiɗ makursaŋ, a zliɗ hirnga mber mber kaɓa cunju ar himiɗi, a susuyum kaɓa mbur mulak maso ngi hin pal.

¹⁵Amma mizli mijeŋŋehey a ndiram ti siifa ngi sete, mavula taŋ migir taŋ i Bumbulvuŋ, Buymisemuŋ Mimadiɗa, a ra ki slimiɗ ar taŋ.

¹⁶Yo ma na, a sa lumam zuma buy mimezle haɗi waɗ lopon misi ɓi naŋ a ɓi ta tisi haŋ ngi Bumbulvuŋ. Buymisemuŋ a sa jigina taŋ ti gidaŋ ngi hirbazla naŋ, yo a sa njira haŋ naŋ njar ar taŋ.

¹⁷Wir wir naŋ ngi pula cuwal na, a sa gi di kaɓa gwat ngi vurum, yo gwat naŋ miga taŋ na kwana, a sa gi taŋ kaɓa gwat ngi kuta mesene naŋhay.

¹⁸A sa ka gi jeŋŋe avu vu kaɓa libiti, a sa ca kiita mikiɗ mi le wãˀa a hirnga kaɓa jiiku ngi gandafa.

¹⁹Naŋ Mipal na, sa zuɓa pal nga naŋ matik’ay ta na, kaw a haŋ kaɓa mbaray,

²⁰Humaˀ nga naŋ mamuc ta na, a sa mbisa mbes mbes kaw a haŋ kaɓa maslalam, joˀ duniya kurzluˀ gar, a sa kiɗam vu ati naŋ ar deɗe ngi mizli manja lesley.

²¹Vuŋ a sa wucuɗo tir gazlavaya, cir cir ng’ar taŋ, kaɓa luvut mumula ti lek mingirɗa le kuy kuy.

²²Milaha vẽvẽlu, a sa laha taŋ slaslalay muloˀ loˀo ti gidaŋ, yam ngir mubuliyey a sa ngiloko fiŋyoh ng’ar taŋ, jo yam ngir mizaway a sa ndaka taŋ manja ircece.

²³Himiɗ a sa slikiɗo ti gidaŋ dididi ng’ar taŋ, a sa kil ti taŋ leɗeɗ kaɓa burkataŋ gambara. Li gar a sa tiri kirɗak kirɗak, asi malambaˀ ngi milzi, yo gwat ngi gi malambaˀa kwana, a sa putukuso janga ngi buy misi gidaŋhaya.